Izai 17:1-14
17 En mesaz kont Damas:+
“Gete! Damas pou nepli egziste konman en lavil
E i pou vin en ta debri.+
2 Bann lavil Aroer+ pou ganny abandonnen.
Zot pou vin bann landrwa kot bann troupo i alonze
E personn pa pou fer zot per.
3 I pou nepli annan bann lavil for Efraim+
E i pou nepli annan en rwayonm Damas.+
Larestan dimoun ki reste Siri
Pou perdi zot laglwar parey bann Izraelit.”* La sa ki Zeova Sef larme in dir.
4 “Sa zour, laglwar Zakob pou diminyen
E son lekor an bonn sante* pou megri.
5 I pou parey ler sa dimoun ki rekolte dible
I anmas bann zepi,
Parey ler dimoun i anmas lagrenn ki’n reste dan Vale Refaim.+
6 Zis sa ki’n ganny kit deryer apre rekolt ki pou reste,
Parey ler zot sakouy* en pye zoliv:
Zis de oubyen trwa zoliv mir ki reste lo sa brans ki pli o,Zis kat oubyen senk zoliv ki reste lo son bann brans ki raport fri.”+ La sa ki Zeova Bondye Izrael in dir.
7 Sa zour, en dimoun pou rod led avek sa Enn ki’n fer li e i pou annan lespwar dan sa Enn ki Sen Izrael.
8 I pa pou get bann lotel,+ sa bann lotel ki i’n fer.+ I pa pou get bann keksoz ki i’n fer, bann poto sakre* oubyen lotel pour lansan.
9 Sa zour, son bann lavil ki annan landrwa proteksyon pou vin parey en landrwa abandonnen dan lafore,+
Parey en brans ki’n ganny abandonnen devan bann Izraelit.
I pou vin en dezer.
10 Parski ou’n oubliy sa Bondye+ ki sov ou.
Ou pa’n mazin sa Ros+ ki ou landrwa proteksyon.
Sanmenm sa ou annan bann zoli plantasyon
E ou plant bourzon en etranze* ladan.
11 Dan lazournen, ou fer sir ki ou met baraz otour ou plantasyon,
Dan bomaten, ou fer ou lagrenn bourzonnen,
Me ou pou perdi ou rekolt ler ou malad e ler ou dan douler ki pa pase.+
12 Ekoute! I annan en kantite dimoun ki pe fer tapaz
Zot azite parey ler lanmer i move!
Bann nasyon pe fer tapaz
Parey bann gro laroul!
13 Bann nasyon pou fer tapaz parey en kantite delo i fer tapaz.
I pou koriz zot, zot pou taye e al byen lwen.
Zot pou sove parey lapay dible lo montanny ler divan i soufle,
Parey en touf pikan ki pe roule dan en tanpet divan.
14 Aswar, tou bann dimoun i per.
Avan lizour i fer, zot nepli la.
Sanmenm sa ki pou arive avek dimoun ki pran tou nou keksoz,
Avek bann dimoun ki vin vol nou bann keksoz.
