Izai 43:1-28
43 Aprezan, Zakob, la sa ki Zeova i dir,
Ou Kreater, sa Enn ki’n fer ou, Izrael:+
“Pa bezwen per, parski mon’n sov* ou.+
Mon’n apel ou par ou non.
Ou pour mwan.
2 Ler ou mars dan delo, mon pou avek ou+
E ler ou mars dan bann larivyer, delo pa pou kouver ou.+
Ler ou mars dan dife, ou pa pou ganny brile
E menm laflanm dife pa pou bril ou.
3 Parski mwan, mon Zeova ou Bondye,
Sa Enn ki Sen Izrael, mon ou Sover.
Mon’n donn Lezip konman en ranson* pour ou,
Mon’n donn Etyopi ek Seba pour mwan reganny ou.
4 Parski ou ti presye pour mwan,+
Ou ti ganny onore e mon’n kontan ou.+
Alor, mon pou donn lezot dimoun
Ek bann nasyon dan ou plas pour ou pa mor.
5 Pa bezwen per, parski mon avek ou.+
Mon pou fer ou desandans sorti dan les,
Mon pou fer zot sorti dan was e rasanble zot.+
6 Mon pou dir avek nor, ‘Larg zot!’+
Mon pou dir avek sid, ‘Pa bezwen anpes zot.
Anmenn mon bann garson ki byen lwen ek mon bann fiy ki dan bann landrwa pli lwen lo later,+
7 Tou dimoun ki port mon non,+
Ki mon’n kree pour mon laglwar
E ki mon’n formen e fer.’+
8 Fer en pep sorti. Sa pep i aveg, menm si zot annan lizye
E zot sourd, menm si zot annan zorey.+
9 Les tou bann nasyon rasanble dan en sel landrwa
E les tou bann pep rasanble ansanm.+
Lekel parmi zot ki kapab dir sa?
Oubyen eski zot kapab fer nou tann sa bann premye keksoz?*+
Les zot anmenn zot bann temwen pour prouve ki zot annan rezon
Oubyen les zot tande e dir, ‘Sa i laverite!’”+
10 La sa ki Zeova i dir, “Zot mon bann temwen,+
Wi, mon serviter ki mon’n swazir,+Pour zot kapab konn mwan e annan lafwa dan mwan*
E konpran ki mon ankor parey.+
I ti napa okenn Bondye ki ti ganny fer avan mwan
E i napa okenn Bondye ki’n ganny fer apre mwan.+
11 Mwan, mon Zeova+ e napa en lot ki pou sov zot apard mwan.”+
12 La sa ki Zeova i dir, “Mwan sa Enn ki ti anonse, ki ti sov zot e ki ti fer konnen
Ler i ti napa okenn fo bondye* parmi zot.+
Alor, zot mon bann temwen e mwan mon Bondye.+
13 “Osi, mon toultan parey.+
Personn pa kapab pran nanryen ki dan mon lanmen.+
Lekel ki kapab anpes mwan fer en keksoz?”+
14 La sa ki Zeova, sa Enn ki delivre zot,+ sa Enn ki Sen Izrael+ i dir:
“Akoz zot, mon pou anvoy en dimoun Babilonn pour zet tou bann bar lo bann baro ater+
E bann Kaldeen ki dan zot bato pou kriye dan maler.+
15 Mwan, mon Zeova, zot Bondye Sen,+ Kreater Izrael,+ zot Lerwa.”+
16 La sa ki Zeova,
Sa Enn ki pe fer en semen dan lanmer
E en santye dan delo ki azite,+
17 Sa Enn ki fer sorti saret lager ek seval+
E osi larme ek bann gerye ki for, i dir:
“Zot pou dormi e zot pa pou leve.+
Zot pou ganny tennyen parey lanmes en lalanp ki pe alimen.”
18 “Pa bezwen mazin bann keksoz lepase
E pa bezwen kontinyen mazin letan lontan.
19 Gete! Mon pe fer en keksoz nouvo,+
I pe deza konmans bourzonnen.
Eski zot pa vwar sa?
Mon pou fer en semen dan dezer+
Ek bann larivyer dan dezer.+
20 Bann zannimo sovaz dan lakanpanny pou onor mwan,
Bann sakal* ek bann lotris* osi,
Parski mon’n donn zot delo dan dezer,
Bann larivyer dan dezer,+
Pour mon pep, sa enn ki mon’n swazir,+ kapab bwar,
21 Sa pep ki mon’n fer pour mwan menm
Pour zot kapab loue mwan.+
22 Me ou pa’n priy avek mwan, Zakob,+
Parski ou’n fatige avek mwan, Izrael.+
23 Ou pa’n anmenn bann mouton kot mwan pour ou bann lofrann brile*
Oubyen glorifye mwan avek ou bann sakrifis.
Mon pa’n fors ou pour anmenn en kado pour mwan,
Ni fer ou fatige par demann ou lansan blan.*+
24 Ou pa ti aste zon* ki santi bon pour mwan avek ou larzan
E ou pa ti fer mwan kontan avek lagres ou bann sakrifis.+
O kontrer, ou bann pese in vin en fardo pour mwan
E ou’n fer mwan fatige avek ou bann fot.+
25 Mwan, mon sa Enn ki pe efas ou bann lofans*+ akoz mon non+
E mon pa pou rapel ou bann pese.+
26 Fer mwan rapel, annou anmenn nou ka devan ziz.
Rakont ou versyon pour prouve ki ou ki annan rezon,
27 Ou premye zanset ti fer pese
E ou prop portparol* in rebel kont mwan.+
28 Alor, mon pou imilye bann prens ki dan landrwa sen.
Mon pou les Zakob ganny detrir
E mon pou fer Izrael ganny ensilte.+
Bann not
^ Oubyen “reaste.”
^ Vwar Leksplikasyon bann mo.
^ Posibleman sa pe refer avek bann premye keksoz ki pou arive dan lavenir.
^ Oubyen “e annan konfyans dan mwan.”
^ Oubyen “bondye etranze.”
^ Sa i en kalite lisyen maron. Jackal an Angle.
^ Sa i en gro zwazo ki pa kapab anvole. Ostrich an Angle.
^ Vwar Leksplikasyon bann mo.
^ Vwar Leksplikasyon bann mo.
^ Cane an Angle.
^ Oubyen “rebelyon.”
^ Posibleman sa pe refer avek bann ansenyan Lalwa.
