Izai 52:1-15
52 Leve! Leve! Siyon, abiy ou avek lafors!+
Zerizalenm, sa lavil sen, met ou bann zoli lenz!+
Parski bann dimoun ki pa’n ganny sirkonsi e ki enpir pa pou antre kot ou ankor.+
2 Zerizalenm, leve, tir lapousyer lo ou e asize.
Fiy Siyon ki en prizonnyen, delarg sa lasenn dan ou likou.+
3 Parski la sa ki Zeova i dir:
“Zot ti ganny vann pour nanryen+
E zot pou ganny reaste me pa avek larzan.”+
4 Parski la sa ki Souvren Senyer Zeova i dir:
“O konmansman, mon pep ti desann Lezip pour reste laba konman bann etranze.+
Apre, bann Asiriyen ti fer zot soufer san okenn rezon.”
5 La sa ki Zeova i dir, “Aprezan, ki mon devret fer?”
La sa ki Zeova i dir, “Parski mon pep ti ganny pran pour nanryen.
Bann dimoun ki ti pe diriz zot ti kontinyen selebre akoz zot ti’n ganny laviktwar+
E lazournen antye zot ti kontinyen mank respe pour mon non.+
6 Sanmenm sa, mon pep pou konn mon non.+
Sanmenm sa, sa zour, zot pou konnen ki mwan sa Enn ki pe koze.
Wi, mwan menm!”
7 Pa i vreman zoli pour vwar lipye sa enn ki pe anmenn bon nouvel lo bann montanny,+
Sa enn ki pe anons lape,+
Sa enn ki pe anmenn bon nouvel pour en keksoz ki pli bon,
Sa enn ki pe anonse ki zot pou ganny sove,
Sa enn ki pe dir Siyon: “Ou Bondye in vin Lerwa!”+
8 Ekoute! Ou bann gardyen i kriye.
Zot kriye ansanm dan lazwa,
Parski zot pou vwar byen* ler Zeova i fer Siyon retournen.
9 Bann debri Zerizalenm, zot devret kontan e kriye ansanm dan lazwa,+
Parski Zeova in konsol son pep.+ I’n sov* Zerizalenm.+
10 Zeova in montre tou bann nasyon son lebra ki sen.+
Dimoun dan bann landrwa pli lwen lo later pou vwar sa ki nou Bondye pou fer pour sov nou.*+
11 Ale, ale, sorti laba,+ pa bezwen tous nanryen ki enpir!+
Sorti kot li,+ gard zot lekor pir,
Zot ki pe anmenn bann keksoz Zeova.+
12 Parski zot pa pou panik ler zot sorti
E zot pa pou ni bezwen taye,
Parski Zeova pou al par devan zot+
E Bondye Izrael pou protez zot par deryer.+
13 Gete! Mon serviter+ pou azir avek bon zizman.
I pou vin en dimoun enportan,
I pou ganny en pozisyon ki o e i pou ganny glorifye en kantite.+
14 Zis parey i ti annan en kantite dimoun ki ti etonnen ler zot ti vwar li,
Parski son laparans ti’n defigire plis ki tou lezot dimoun
E son zoli lekor ti’n vin pli vilenn ki pour tou dimoun,
15 Alor, i pou fer en kantite nasyon soke.+
Bann lerwa pou ferm zot labous* devan li,+
Parski zot pou vwar bann keksoz ki personn pa ti’n dir zot
E zot pou reflesir lo bann keksoz ki zot pa ti’n tande.+
