Izai 54:1-17
54 “Ou sa madanm ki steril e ki napa zanfan, kriye dan lazwa!+
Ou ki pa’n zanmen ganny douler lakousman,+ ou devret zwaye e kriye dan lazwa,+
Parski sa madanm ki’n ganny abandonnen* i annan plis garson*
Ki sa madanm ki annan en msye.”*+ La sa ki Zeova in dir.
2 “Fer ou latant vin pli gran.+
Redi sa latwal latant ki lo ou gran tabernak.*
Pa bezwen ezite, fer lakord latant vin pli long
E fer bann pike latant vin pli for.+
3 Parski ou pou fer ou lafrontyer vin pli gran lo kote drwat e lo kote gos.
Ou bann desandans pou domin bann nasyon
E zot pou reste dan bann lavil ki’n ganny abandonnen.+
4 Pa bezwen per,+ parski ou pa pou onte.+
Pa bezwen santi ki ou’n ganny imilye, parski ou pa pou dezapwente.
Parski ou pou oubliye ki mannyer ou ti onte ler ou ti zenn
E ou pa pou rapel ki mannyer ou ti anbarase ler ou ti en vev.”
5 “Parski sa Enn ki’n fer ou+ i parey en msye* pour ou,+
I apel Zeova Sef larme
E sa Enn ki Sen Izrael i sa Enn ki delivre ou.+
I pou ganny apele Bondye later antye.+
6 Parski Zeova ti apel ou konmsi ou ti en madanm ki ti’n ganny abandonnen e ki ti sagren,+
Parey en madanm ki’n marye ler i ti ankor zenn e apre i’n ganny rezete.” La sa ki ou Bondye in dir.
7 “Mon ti abandonn ou pour en pti moman
Me mon pou fer ou retournen akoz mon annan bokou konpasyon.+
8 Vi ki mon ti vreman ankoler, mon ti kasyet mon figir pour en pti moman,+
Me mon pou pran pitye pour ou akoz mon lanmour fidel i dire pour touzour.”+ La sa ki sa Enn ki delivre ou,+ Zeova in dir.
9 “Pour mwan, sa i parey dan letan Noe.+
Zis parey mon ti fer serman ki delo dan letan Noe pa pou kouver later ankor,+
Alor mon fer serman ki mon pa pou ankoler avek ou ankor oubyen koriz ou.+
10 Parski bann montanny i kapab ganny tire
E bann pti montanny i kapab ganny sekwe,
Me mon pou toultan demontre lanmour fidel pour ou+
E mon lalyans lape pou toultan egziste.”+ La sa ki Zeova, sa Enn ki pran pitye pour ou+ in dir.
11 “Ou sa madanm ki pe soufer,+ ki’n ganny afekte avek tanpet e ki personn pa pe konsol li,+
Mon pe servi mortye* ki red pour met ou bann ros
E mon pou fer ou fondasyon avek safir.*+
12 Mon pou fer bann miray ou lavil avek ribi,*
Mon pou fer ou bann baro avek bann ros ki klate*
E mon pou fer tou ou bann lafrontyer avek bann pyer presye.
13 Zeova pou ansenny tou ou bann garson*+
E ou bann garson* pou vreman anpe.*+
14 Ou pou ganny byen etabli dan ladrwatir.+
Ou pou lwen avek bann dimoun ki fer ou soufer,+
Ou pa pou per nanryen e ou pou napa rezon pour per,
Parski sa bann keksoz pa pou vin pros avek ou.+
15 Si en dimoun i atak ou,
Pa mwan ki’n donn li lord pour fer sa.
Sa dimoun ki esey atak ou pou tonbe akoz ou.”+
16 “Gete! Mwan menm ki’n kree sa artizan,
Ki soufle labrez
E i fer en zarm.
Mon ti osi kree sa zonm ki detrir pour li detrir.+
17 I pou napa okenn zarm ki’n ganny fer kont ou ki pou reisi+
E ou pou kondann nenport dimoun ki akiz ou ler ou pe ganny zize.
Sa i leritaz bann serviter Zeova
E zot ladrwatir i sorti kot mwan.” La sa ki Zeova in dir.+
Bann not
^ Oubyen “madanm steril.”
^ Oubyen “zanfan.”
^ Oubyen “sef.”
^ Vwar Leksplikasyon bann mo.
^ Oubyen “sef.”
^ Oubyen “siman.”
^ Sa i en pyer presye. Sapphire an Angle.
^ Sa i en pyer presye ki kouler rouz. Ruby an Angle.
^ Oubyen “bann ros dife.”
^ Oubyen “pou annan lape annabondans.”
^ Oubyen “zanfan.”
^ Oubyen “zanfan.”
