Izai 20:1-6
-
Siny kont Lezip ek Etyopi (1-6)
20 Dan sa lannen ki Sargonn lerwa Asiri ti fer Tartann* al Asdod,+ i ti lager avek Asdod e i ti pran sa lavil.+
2 Sa letan, Zeova ti koz avek Izai+ garson Amoz e i ti dir li: “Ale, tir sa latwal goni* dan ou leren e tir ou sandalet dan ou lipye.” Izai ti fer sanmenm sa. I ti mars touni* e nipye.
3 Apre, Zeova ti dir: “Zis parey mon serviter Izai ti mars touni e nipye pour trwa-z-an konman en siny+ e konman en lavertisman kont Lezip+ ek Etyopi,+
4 koumsanmenm ki lerwa Asiri pou anmenn bann Ezipsyen ki i pran konman prizonnyen+ ek bann Etyopyen ki i anmenn an egzil, bann garson ek zonm aze e zot pou touni, nipye e zot deryer pou deor. Lezip pou touni.*
5 Zot pou per e zot pou onte akoz Etyopi, sa pei ki zot ti annan lespwar ladan e akoz Lezip, sa pei ki ti fer zot fyer.*
6 Sa zour, bann zabitan lo sa lakot pou dir: ‘Get sa ki’n arive avek nou lespwar, kot nou ti ale pour rod led e pour zot sov nou dan lanmen lerwa Asiri! Aprezan, ki mannyer nou pou sove?’”
