Izai 44:1-28
44 “Aprezan ekoute, Zakob mon serviter
E ou, Izrael, sa enn ki mon’n swazir.+
2 La sa ki Zeova i dir,
Sa Enn ki’n fer ou e form ou,+
Sa Enn ki’n ed ou depi ler ou ti dan vant:*
‘Pa bezwen per, Zakob mon serviter+
E ou, Zesouroun,*+ sa enn ki mon’n swazir.
3 Parski mon pou vid delo lo sa dimoun* ki swaf+
E mon pou fer bann pti larivyer koul lo later ki sek.
Mon pou vid mon lespri sen lo ou desandans+
E mon pou beni ou bann desandans.
4 Zot pou pouse parey bann plant parmi bann zerb ver,+
Parey bann pye pepliye* o bor bann pti larivyer.
5 En dimoun pou dir: “Mwan, mon pour Zeova.”+
En lot dimoun pou apel son lekor Zakob
E en lot dimoun pou ekri lo son lanmen: “Mon pour Zeova.”
I pou pran sa non Izrael.’
6 La sa ki Zeova,
Lerwa Izrael+ e sa Enn ki delivre li,+ Zeova Sef larme i dir:
‘Mwan ki premye e mwan ki dernyen.+
Napa en lot Bondye apard ki mwan.+
7 Lekel ki parey mwan?+
Les li dir byen for, les li koze e les li montre mwan ki sa i vre!+
Zis parey mon ti fer depi ler mon ti etabli sa pep depi lontan,
Les zot koz lo bann keksoz ki pe vini
E lo sa ki pou arive pli tar.
8 Pa bezwen per
E pa bezwen les lafreyer paraliz zot.+
Eski pa mon ti dir zot sa e fer zot konnen depi avan?
Zot mon bann temwen.+
Eski i annan en lot Bondye apard ki mwan?
Non, napa en lot Ros.+ Mon pa konn en lot.’”
9 Tou sa bann dimoun ki fer bann stati* pa vo nanryen
E sa bann lobze ki zot kontan pa pou anmenn okenn byenfe pour zot.+
Konman zot bann temwen, zot* pa vwar nanryen e zot pa konn nanryen,+
Alor, sa bann ki’n fer zot pou onte.+
10 Lekel ki pou fer en bondye oubyen fer en stati an metal*
Ki pa pou anmenn okenn byenfe pour li?+
11 Gete! Tou bann dimoun ki pas letan avek li pou onte!+
Bann artizan i bann imen.
Les zot rasanble ansanm e pran zot plas.
Zot tou zot pou per e zot pou onte.
12 Sa forzron* i servi son zouti* pour travay avek fer lo labrez.
I servi marto pour fer son laform
E i travay avek sa fer avek son lebra for.+
Apre, i konmans lafen e i perdi son lafors.
I pa bwar delo e i konmans fatige.
13 Sa dimoun ki travay avek dibwa i servi sa lakord ki mezire e i desin en laform avek lakre rouz.
I travay avek en sizo dibwa e i mark li avek en konpa.
I fer li dan laform en dimoun,+
I fer li vin parey en dimoun ki zoli,
Pour li asiz dan en lakaz.*+
14 I annan dimoun ki son travay i koup pye sed.
I swazir en serten kalite pye dibwa, en pye senn*
E i les li vin en gro pye dibwa parmi bann pye dibwa dan lafore.+
I plant en pye lorye* e lapli i fer li grandi.
15 Apre, en dimoun i servi sa pye dibwa pour fer dife.
I servi en bout sa dibwa pour sof li.
I alim dife e i fer dipen.
Me i osi fer en bondye avek sa dibwa e i ador li.
I fer en stati avek sa dibwa e i azenou devan li.+
16 I bril lanmwatye sa dibwa dan dife.
I servi sa lanmwatye pour griy sa lavyann ki i pou manze e i byen kontan.
I osi sof li e i dir:
“Sa wi! Mon pe sofe an menm tan ki mon pe get sa dife.”
17 Me i fer en bondye avek sa bann dibwa ki reste, wi, i fer en stati.
I azenou devan li e i ador li.
I priy avek li e i dir li:
“Sov mwan parski ou mon bondye.”+
18 Zot pa konn nanryen, zot pa konpran nanryen,+
Parski zot lizye i fermen e zot pa kapab vwar.
Zot* napa bon zizman.
19 Napa en dimoun ki reflesir
Oubyen ki annan konnesans ek lentelizans pour dir:
“Mon ti bril lanmwatye sa dibwa dan dife
E mon ti fer dipen e griy lavyann lo sa labrez pour mwan manze.
Alor, eski mon devret fer en keksoz degoutan avek sa bann dibwa ki reste?+
Eski mon devret ador en bout dibwa* ki sorti dan en pye dibwa?”
20 I parey en dimoun ki manz lasann.
Son leker in anbet li e i’n fer li fer sa ki mal.
I pa kapab sov son lekor e i pa dir:
“Pa i annan en mansonz dan mon lanmen drwat?”
21 “Rapel sa bann keksoz, Zakob e ou Izrael,
Parski ou mon serviter.
Mon ti fer ou e ou mon serviter.+
Izrael, mon pa pou oubliy ou.+
22 Mon pou efas ou bann fot konmsi en nyaz in kouver zot+
E mon pou efas ou bann pese konmsi en gro nyaz in kouver zot.
Retourn kot mwan, parski mon pou sov ou.+
23 Lesyel, kriye dan lazwa
Parski Zeova in azir!
Bann landrwa pli fon lo later, kriye e selebre!
Bann montanny,+
Lafore ek tou zot bann pye dibwa, kriye dan lazwa!
Parski Zeova in sov Zakob
E i’n servi Izrael pour montre son laglwar.”+
24 La sa ki Zeova, sa Enn ki delivre ou,+
Sa Enn ki ti fer ou ler ou ti dan vant, i dir:
“Mwan mon Zeova, sa Enn ki’n fer tou keksoz.
Mon’n redi lesyel mon tousel+
E mon’n fer* later.+
Lekel ki ti avek mwan?
25 Mon pe anpes bann siny bann dimoun ki koz dan vid* vin vre
E mwan, mon sa Enn ki fer dimoun ki predir lavenir fer sa ki bet.+Sa Enn ki fer bann zonm saz konfize
E ki fer zot konnesans vin bet.+
26 Sa Enn ki pe fer parol son serviter vin vre
E ki pe akonpli tou sa ki son bann mesaze in predir.+
Sa Enn ki pe dir sa lo Zerizalenm, ‘I pou annan dimoun ki pou reste laba’+
E ki pe dir sa lo bann lavil Zida, ‘Zot pou ganny rekonstri+
E mon pou rekonstri li.’+
27 Sa Enn ki pe dir avek delo profon, ‘Evapore
E mon pou fer tou ou bann larivyer sek.’+
28 Sa Enn ki pe dir sa lo Siris,+ ‘I mon berze
E i pou fer tou sa ki mon anvi fer.’+
Sa Enn ki pe dir sa lo Zerizalenm, ‘I pou ganny rekonstri’
E ki pe dir sa lo tanp, ‘Ou fondasyon pou ganny mete.’”+
Bann not
^ Oubyen “depi ler ou’n ne.”
^ Sa non i vedir “sa Enn ki fer sa ki byen.” En tit pour Izrael.
^ Oubyen “pei.”
^ Sa pe refer avek en kalite pye dibwa ki normalman pous o bor larivyer. Poplar an Angle.
^ Setadir, bann stati.
^ Oubyen “stati ki’n ganny skilpte.”
^ Oubyen “metal ki’n ganny fonn.”
^ En dimoun ki travay avek metal.
^ Oubyen “en kouto ki tournen dan bout.” Billhook an Angle.
^ Oubyen “tanp.”
^ Oak an Angle.
^ Laurel an Angle.
^ Oubyen “Zot leker.”
^ Oubyen “en bout dibwa sek.”
^ Literalman, “tal.”
^ Oubyen “bann fo profet.”
