Izai 19:1-25
19 En mesaz kont Lezip:+
Gete! Zeova i lo en nyaz ki pe al vit e i pe vin Lezip.
Bann bondye Lezip ki pa vo nanryen pou tranble devan li+
E Lezip pou per.*
2 “Mon pou fer bann Ezipsyen ankoler avek kanmarad
E zot pou lager avek kanmarad.
Sak dimoun pou lager avek son frer ek son vwazen,
Lavil pou lager avek en lot lavil, rwayonm pou lager avek en lot rwayonm.
3 Lezip pou konfize
E mon pou kas son bann plan.+
Zot pou al kot bann bondye ki pa vo nanryen,
Kot bann dimoun ki zwe lanmizik pour serpan, bann dimoun ki kominik avek bann ki’n mor e bann dimoun ki predir lavenir.+
4 Mon pou livre Lezip dan lanmen en met ki move
E en lerwa ki kriyel pou diriz zot.”+ La sa ki sa vre Senyer, Zeova Sef larme in dir.
5 Lanmer pou sek
E larivyer pou sek.+
6 Bann larivyer pou pi.
Delo dan bann transe Larivyer Nil Lezip pou diminyen e i pou vin sek.
Bann zon* ek bann fatak pou pouri.+
7 Bann plant o bor Larivyer Nil, kot larivyer i zwenn avek lanmer
Ek tou later kot bann lagrenn in ganny senmen o bor Larivyer Nil+ pou sek.+
I pou ganny soufle dan divan e i pou nepli la.
8 Bann peser pou dan dey,
Dimoun ki zet lanmson dan Larivyer Nil pou plennyen
E dimoun ki anvoy lasenn dan delo pou vin deplizanpli ptigin.
9 Bann dimoun ki fer latwal avek len*+
E bann ki fer latwal blan pou onte.
10 Dimoun ki fer latwal kot li pou ganny kraze.
Tou bann travayer pou sagren.
11 Bann prens Zoann+ i bet.
Bann konseye Faraon ki pli saz i donn bann konsey ki pa fer sans.+
Ki mannyer zot kapab dir Faraon:
“Mon en desandans bann dimoun saz,
En desandans bann lerwa ki ti la lontan”?
12 Alor, oli ou bann dimoun saz?+
Ki zot dir ou sa ki Zeova Sef larme in deside konsernan Lezip.
13 Bann prens Zoann in azir dan en fason bet.
Bann prens Nof*+ in ganny anbete.
Bann sef dan son bann tribi in anbet Lezip.
14 Zeova in fer li konfize+
E zot in anbet Lezip dan tou sa ki i fer,
Parey en dimoun sou ki pe drive dan son vomi.
15 Lezip pa pou kapab fer nanryen.
I pa pou kapab fer nanryen pour latet oubyen lake, bann pti brans oubyen fatak.*
16 Sa zour, Lezip pou vin parey bann madanm. I pou tranble e i pou per akoz Zeova Sef larme pou lev son lanmen avek li.+
17 Lezip pou per Zida. Zot pou per ler zot pou tann nonm li, akoz sa ki Zeova Sef larme in deside pou fer avek zot.+
18 Sa zour, i pou annan senk lavil dan pei Lezip e sa bann dimoun pou koz langaz Kanaan+ e zot pou fer serman ki zot pou reste fidel avek Zeova Sef larme. Enn sa bann lavil pou ganny apele Lavil Destriksyon.
19 Sa zour, i pou annan en lotel pour Zeova dan milye pei Lezip ek en pilye pour Zeova kot son lafrontyer.
20 Sa pou en siny e en temwannyaz konsernan Zeova Sef larme, dan pei Lezip, parski zot pou demann Zeova led akoz bann dimoun ki fer zot soufer e i pou fer en dimoun vin sov zot, en dimoun ki enportan.
21 Sa zour, Zeova pou fer bann Ezipsyen konn li e bann Ezipsyen pou konn Zeova. Zot pou ofer bann sakrifis ek bann kado e zot pou fer en ve avek Zeova e respekte sa ve.
22 Zeova pou atak Lezip,+ i pou atak li e geri li. Zot pou retourn kot Zeova e i pou reponn zot bann lapriyer e i pou geri zot.
23 Sa zour, i pou annan en gran semen+ ki pou sorti Lezip pour al Asiri. Apre, Asiri pou al Lezip e Lezip pou al Asiri. Lezip ek Asiri pou servi Bondye ansanm.
24 Sa zour, Izrael pou vin trwazyenm avek Lezip ek Asiri,+ en benediksyon pour later,
25 parski Zeova Sef larme pou beni zot e i pou dir: “Mon pep, Lezip pou ganny beni e osi Asiri, sa enn ki mon’n fer e Izrael, mon leritaz.”+
