Izai 26:1-21
26 Sa zour, sa sanson pou ganny sante+ dan pei Zida:+
“Nou annan en lavil ki for.+
I* fer bann miray ek ranpar pour sov nou.+
2 Ouver baro+ pour sa nasyon ki fer sa ki byen* antre,
En nasyon ki pe kontinyen azir avek fidelite.
3 Ou pou protez bann ki konpletman depan lo ou.*
Ou pou kontinyen fer zot anpe,+
Parski zot annan konfyans dan ou.+
4 Annan konfyans dan Zeova pour touzour,+
Parski Ya* Zeova i sa Ros eternel.+
5 Parski i’n imilye bann dimoun ki reste dan landrwa o, sa gran lavil.
I fer li desann,
I fer li desann ater.
I zet li dan lapousyer.
6 Bann ki pe soufer, ki pa enportan
Pou pil pil lo li.”
7 Semen bann dimoun ki fer sa ki byen i drwat.*
Vi ki ou drwat,
Ou pou fer semen bann dimoun ki fer sa ki byen vin plat.
8 O Zeova, anmezir ki nou mars lo semen lazistis,
Nou annan lespwar dan ou.
Nou kontan ou non e nou anvi ki tou dimoun i mazin ou non.*
9 Pandan lannwit, mon rod ou avek tou mon leker,
Wi, mon kontinyen rod ou.+
Parski ler ou ziz later,
Bann zabitan sa pei i aprann konsernan ladrwatir.+
10 Menm si ou fer bann bon keksoz pour en move dimoun,
I pa pou aprann konsernan ladrwatir.+
Menm dan pei ladrwatir,* i pou fer sa ki mal+
E i pa pou vwar laglwar Zeova.+
11 O Zeova, ou’n lev ou lanmen me zot pa vwar li.+
Zot pou vwar ki ou devoue pour ou pep e zot pou onte.
Wi, sa dife ki pour ou bann lennmi pou bril zot.
12 O Zeova, ou pou fer nou anpe,+
Parski tou sa ki nou’n fer,
Ou menm ki’n fer pour nou.
13 O Zeova nou Bondye, apard ou, i’n annan lezot sef ki’n diriz nou,+
Me zis ou non ki nou koz lo la.+
14 Zot in mor. Zot pa pou viv.
Zot in mor e zot napa lafors, zot pa pou leve.+
Parski ou’n pini zot,
Ou’n detrir zot e personn pa pou koz lo zot.
15 O Zeova, ou’n fer sa nasyon vin pli gran,
Wi, ou’n fer sa nasyon vin pli gran.
Ou’n glorifye ou lekor.+
Ou’n agrandi teritwar sa pei e ou’n fer tou son bann lafrontyer vin pli gran.+
16 O Zeova, zot ti tourn ver ou ler zot ti dan maler.
Ler ou ti disiplin zot, zot ti devid zot leker e fer lapriyer dousman.+
17 Zis parey en madanm ansent ki pe al ganny pti baba
I dan douler e i kriye,
Ou’n fer nou santi menm parey, O Zeova.
18 Nou ti tonm ansent, nou ti ganny douler,
Me i ti konmsi nou ti’n donn nesans divan.
Nou pa’n sov sa pei
E personn pa’n ganny en zanfan pour li reste dan sa pei.
19 “Ou bann dimoun mor pou vin vivan.
Lekor mon bann dimoun mor* pou leve.+
Leve e kriye dan lazwa,
Zot ki reste dan lapousyer!+
Parski ou laroze i parey laroze dan bomaten*
E later pou les bann dimoun ki’n mor e ki napa lafors viv ankor.*
20 Mon pep, ale, antre dan ou bann lasanm anndan
E ferm ou bann laport par deryer ou.+
Kasyet pour en pti moman
Ziska ki mon aret ankoler.*+
21 Parski gete! Zeova pe sorti kot i ete
Pour fer bann zabitan dan sa pei rann kont pour zot fot.
Sa pei pou les zot vwar sa bann dimoun ki i’n touye
E i pou nepli kasyet son bann dimoun ki’n ganny touye.”
Bann not
^ Setadir, Bondye.
^ Oubyen “nasyon ki drwat.”
^ Oubyen posibleman, “bann dimoun ki konfidan dan sa ki zot anvi.”
^ “Ya” i non Zeova dan sa form pli kourt.
^ Oubyen “menm nivo.”
^ Setadir, ki zot mazin Bondye ek son non e ki zot fer dimoun konn Bondye ek son non.
^ Oubyen “onnet.”
^ Literalman, “En lekor mor ki pour mwan.”
^ Oubyen posibleman, “laroze lo bann zerb (mallows an Angle).”
^ Oubyen “pou donn nesans bann dimoun ki’n mor e ki napa lafors.”
^ Oubyen “aret kondann zot.”
