Izai 30:1-33
30 La sa ki Zeova i dir, “Maler pour bann garson antete,+
Ki pe akonpli bann plan ki pa mon bann plan,+
Ki fer bann lalyans,* me pa avek gidans mon lespri sen,
Pour ki zot kontinyen fer plis pese ankor.
2 Zot desann Lezip+ san demann mwan konsey,+
Pour zot rod proteksyon Faraon*
E pour zot kasyet anba lonbraz Lezip!
3 Me proteksyon Faraon pou fer zot onteE zot pou ganny imilye akoz zot in al kasyet anba lonbraz Lezip.+
4 Parski son bann prens i dan lavil Zoann+
E son bann mesaze in ariv Anes.
5 En pep ki pa ni menm kapab ed zot
Pou fer zot tou onte.
I pa kapab ed zot e i pa pou donn zot nanryen,
I pou zis fer zot onte e anbarase.”+
6 En mesaz kont bann zannimo sovaz ki dan sid:
Dan sa pei ki annan maler ek problenm,
Pei kot i annan lyon, lyon ki kriye,
Kot i annan serpan anpwazonnen* ek sa serpan dife ki anvole,*
Zot anmenn zot larises lo ledo bann bourik
E zot anmenn zot bann provizyon lo ledo bann samo.
Me sa bann keksoz pa pou ed sa pep.
7 Parski led ki Lezip i donnen pa fer okenn sans.+
Sanmenm sa mon’n apel li: “Raab,+ sa enn ki asize e ki pa fer nanryen.”
8 “Aprezan, ale e ekri sa lo en plak devan zot
E ekri li dan en liv,+
Pour ki dan lavenir i kapab ganny servi
Konman en temwannyaz permanan.+
9 Parski zot en pep ki rebel,+ bann garson ki anbet lezot,+
Bann garson ki pa oule ekout lalwa* Zeova.+
10 Zot dir bann dimoun ki ganny vizyon, ‘Aret ganny bann vizyon’
E zot dir bann profet, ‘Pa bezwen dir nou bann profesi ki vre.+
Dir nou bann keksoz ki pou enpresyonn nou,* imazin bann keksoz ki pa vre.+
11 Sorti lo sa semen. Aret mars lo sa semen.
Aret koz avek nou lo sa Enn ki Sen Izrael.’”+
12 Alor, la sa ki sa Enn ki Sen Izrael i dir:
“Vi ki zot rezet mon parol,+
Zot annan konfyans dan mansonz ek frod
E zot depan lo sa bann keksoz,+
13 Alor pour zot, sa fot pou parey en miray ki’n kase,
Parey en miray ki o ki’n kabannen e ki pros pour tonbe.
I pou degrengole en sel kou, byen vit.
14 I pou kase parey en gro resipyan ki en potye in fer,
I pou’n telman kraze ki i pa pou reste ni en pti bout
Pour anmas labrez dan dife
Oubyen pour anmas delo ater.”*
15 Parski la sa ki Souvren Senyer Zeova, sa Enn ki Sen Izrael, i dir:
“Si zot retourn kot mwan e zot esper mwan, zot pou ganny sove.
Zot pou annan lafors si zot reste kalm e annan konfyans dan mwan.”+
Me zot pa ti oule fer sa.+
16 O kontrer, zot ti dir: “Non, nou pou mont lo bann seval e nou pou sove!”
Alor zot pou sove.
Zot ti dir: “Nou pou mont lo bann seval ki tay vit!”+
Alor bann dimoun ki pe tay deryer zot pou tay vit zot osi.+
17 En dimoun pou fer mil dimoun per.+
Senk dimoun pou fer zot taye
Ziska lakantite dimoun ki reste parmi zot i vin parey en lema lo latet montanny,
Parey en poto sinyal lo en montanny.+
18 Me Zeova pe espere avek pasyans* pour demontre konpasyon anver zot+
E i pou leve e pran pitye pour zot.+
Parski Zeova i en Bondye lazistis.+
Tou dimoun ki kontinyen esper li,* pou zwaye.+
19 Ou pa pou plere ler bann dimoun i al reste Siyon, Zerizalenm.+ I pou sirman demontre konpasyon ler ou demann li led. I pou reponn ou dek ki i tann ou.+
20 Menm si Zeova pou donn zot maler pour manze parey dipen e soufrans pour bwar parey delo,+ ou Gran Ansenyan pou nepli kasyet e ou pou vwar ou Gran Ansenyan+ avek ou prop lizye.
21 An ka ou devret al a drwat oubyen al a gos,+ ou pou tann en lavwa deryer ou ki pou dir ou, “La sa semen.+ Mars lo la.”
22 Zot pou fer zot bann stati* ki’n ganny kouver avek larzan* vin enpir e zot pou osi fer bann stati an metal* ki’n ganny kouver avek lor vin enpir.+ Ou pou zet zot parey en sifon ki en madanm ki pe ganny son peryod i servi e ou pou dir zot, “Sorti la!”*+
23 I pou fer lapli tonm lo bann lagrenn ki ou senmen+ e later pou prodwi en kantite bon manze.*+ Sa zour, ou bann zannimo pou manz zerb dan bann gran laplenn zerb.+
24 Bann bef ek bann bourik ki travay later pou manz zerb sek ki’n melanze avek en lot kalite plant,* ki’n ganny vannen* avek lapel ek fork.
25 Sa zour kot en kantite dimoun pou ganny touye, ler bann latour i tonbe, i pou annan bann pti larivyer ek bann sours delo ki pou koule lo tou bann gran montanny e lo tou bann pti montanny.+
26 Sa zour ler Zeova pou pans blesir* son pep+ e geri sa gro blesir ki zot in gannyen akoz i’n bat zot,+ lalimyer plennlin pou vin parey lalimyer soley e lalimyer soley pou vin set fwa pli for,+ parey lalimyer set zour.
27 Gete! Zeova* pe vini sorti byen lwen.
I vreman ankoler e i pe vini avek bann gro nyaz.
I pe koz avek lakoler
E son lalang i parey en dife ki pe bril tou keksoz.+
28 Son lespri sen* i parey en larivyer ki pe deborde e delo i ariv ziska kot likou,
Pour li sekwe bann nasyon dan en tanmi ziska napa nanryen ki reste.*
Bann dimoun pou annan en labrid* dan zot lanmaswar+ ki fer zot al dan en lot semen.
29 Me zot sanson pou parey sa sanson ki zot sante aswar
Ler zot prepare* pour en lafet+
E zot leker pou dan lazwa parey en dimoun
Ki pe marse avek* en laflit
Anmezir i al lo montanny Zeova, kot Ros Izrael.+
30 Zeova pou fer zot tann son lavwa ki pwisan+
E i pou montre zot son lebra+ anmezir ki i desann byen ankoler,+
Avek laflanm en dife ki bril tou keksoz,+
Avek en gro lapli,+ loraz ek lagrel.+
31 Parski Asiri pou per ler i pou tann lavwa Zeova.+
I pou tap li avek en baton.+
32 Sak fwa ki Zeova i tap bann Asiriyen
Avek son baton pour pini zot,
I pou annan bann son tanbourin* ek bann son larp+
Anmezir ki i lev son lebra pour lager avek zot.+
33 Parski son Tofet*+ in fini ganny prepare.
I’n fini ganny prepare pour lerwa tou.+
Sa landrwa ki i’n fer pour met bann dibwa an ta, i fon e larz
E i annan en kantite dibwa ek dife.
Souf Zeova parey en larivyer souf*
Pou met dife ladan.
Bann not
^ Literalman, “vid en keksoz konman en lofrann,” aparaman, sa pe refer avek en lagreman.
^ Literalman, “Pour al kasyet dan landrwa proteksyon Faraon.”
^ Viper an Angle.
^ Oubyen “en serpan anpwazonnen ki vit.”
^ Oubyen “lenstriksyon.”
^ Oubyen “ki pou flat nou.”
^ Oubyen posibleman, “dan en sitern.” Vwar Leksplikasyon bann mo.
^ Oubyen “ki pe esper avek enpasyans.”
^ Oubyen “kontinyen espere.”
^ Oubyen posibleman, “e ou pou dir zot zot sal.”
^ Oubyen “metal ki’n ganny fonn.”
^ Oubyen “stati ki’n ganny skilpte.”
^ Larzan, sa metal.
^ Literalman, “bann manze ki gra e an lwil.”
^ Sorrel an Angle.
^ Vannen i ler lapay i ganny separe avek lagrenn.
^ Oubyen “lezo kase.”
^ Literalman, “Non Zeova.”
^ Vwar Leksplikasyon bann mo.
^ Oubyen “souf.”
^ Literalman, “en tanmi pour tir bann keksoz ki pa vo nanryen.”
^ Oubyen “sanktifye zot lekor.”
^ Oubyen “anmezir ki i pe zwe.”
^ En lenstriman lanmizik ki parey en tanbour.
^ La “Tofet” pe reprezant en landrwa kot zot bril bann keksoz, savedir destriksyon.
^ Sulfur an Angle.
