“Tumana sa Bug-os ang Imong Ministeryo”

“Buhata ang imong pag-alagad sa masangkarong paagi.”—2 TIMOTEO 4:5, Byington.

1, 2. Bisan tuod ang tanang Kristohanon maoy mga tig-ebanghelyo, unsay gikinahanglan sa mga ansiyano sumala sa Kasulatan?

 IKAW ba usa ka magmamantala sa Gingharian? Kon mao, pasalamati si Jehova nga Diyos tungod niining maanindot nga pribilehiyo. Ikaw ba usa ka ansiyano sa kongregasyon? Kana maoy dugang pribilehiyo gikan kang Jehova. Apan dili gayod nato kalimtan nga ang sekular nga edukasyon o ang pagkalarinong manulti dili mao ang magkuwalipikar kang bisan kinsa kanato alang sa ministeryo o sa pagdumala sa kongregasyon. Si Jehova naghatag kanato ug igong kuwalipikasyon alang sa ministeryo, ug tungod kay may pipila ka lalaki sa atong taliwala nga nakakab-ot sa Kasulatanhong mga kinahanglanon, sila nakapribilehiyo sa pag-alagad ingong mga magtatan-aw.—2 Corinto 3:5, 6; 1 Timoteo 3:1-7.

² Ang tanang dedikadong mga Kristohanon naghimo sa buluhaton sa mga tig-ebanghelyo, apan ang mga ansiyano mao ang ilabinang gikinahanglan nga maghatag ug maayong panig-ingnan diha sa ministeryo. Ang mga ansiyano nga “naghago sa pagpanulti ug sa pagpanudlo” namatikdan sa Diyos ug ni Kristo, maingon man sa mga isigka-Saksi ni Jehova. (1 Timoteo 5:17; Efeso 5:23; Hebreohanon 6:10-12) Ilalom sa tanang sirkumstansiya, ang pagpanudlo sa usa ka ansiyano kinahanglang magpalambo ug espirituwal nga kahimsog, kay giingnan ni apostol Pablo ang magtatan-aw nga si Timoteo: “Aduna unyay yugto sa panahon nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan; ug ilang ilingiw ang ilang mga dalunggan gikan sa kamatuoran, samtang sila moliso ngadto sa bakak nga mga sugilanon. Apan, ikaw, maghupot ug maayong panghunahuna sa tanang butang, antosa ang daotan, himoa ang buluhaton sa usa ka tig-ebanghelyo, tumana sa bug-os ang imong ministeryo.”—2 Timoteo 4:3-5.

3. Unsay kinahanglang buhaton aron ang bakak nga mga pagtulon-an dili magpameligro sa espirituwalidad sa kongregasyon?

³ Aron maseguro nga ang bakak nga mga pagtulon-an dili magpameligro sa espirituwalidad sa kongregasyon, ang usa ka magtatan-aw kinahanglang motuman sa tambag ni Pablo: “Maghupot ug maayong panghunahuna sa tanang bahin, . . . buhata ang imong pag-alagad sa masangkarong paagi.” (2 Timoteo 4:5, Byington) Oo, ang usa ka ansiyano kinahanglang ‘bug-os nga magtuman sa iyang ministeryo.’ Kinahanglang himoon niya kana sa hingpit nga paagi. Ang usa ka ansiyano nga bug-os nga naghimo sa iyang ministeryo naghatag ug hustong pagtagad sa tanan niyang mga responsibilidad, nga walay napasagdan o wala mahimo sa bug-os. Ang maong tawo matinumanon bisan sa gagmayng mga butang.—Lucas 12:48; 16:10.

4. Unsay makatabang kanato sa pagtuman sa bug-os sa ministeryo?

⁴ Ang bug-os nga pagtuman sa atong ministeryo dili kanunayng magkinahanglan ug dugang panahon, apan nagkinahanglan kinig panahon nga nagugol sa maayong paagi. Ang pagkamakanunayon makatabang sa tanang Kristohanon sa pagtuman sa mga butang diha sa ministeryo. Aron makagugol ug dugang panahon diha sa pag-alagad sa kanataran, ang usa ka ansiyano nagkinahanglan ug maayong personal nga organisasyon aron mabalanse ang iyang eskedyul ug mahibaloan kon unsa ang idelegar ug kon sa unsang paagi himoon kana. (Hebreohanon 13:17) Siyempre, ang usa ka tinahod nga ansiyano mohimo usab sa iyang bahin, sama kang Nehemias, kinsa nakigbahin mismo sa pagtukod pag-usab sa mga paril sa Jerusalem. (Nehemias 5:16) Ug ang tanang alagad ni Jehova angayng makigbahin nga regular diha sa buluhatong pagsangyaw sa Gingharian.—1 Corinto 9:16-18.

5. Unsay angay natong bation labot sa ministeryo?

⁵ Kita adunay makapalipay gayod nga sugo ingong mga magmamantala sa natukod na nga  langitnong Gingharian! Seguradong gipabilhan nato ang pribilehiyo nga makapakigbahin sa pagsangyaw sa maayong balita sa tibuok gipuy-ang yuta sa dili pa moabot ang kataposan. (Mateo 24:14) Bisan tuod kita dili hingpit, madasig kita sa giingon ni Pablo: “Nabatonan namo kini nga bahandi [sa ministeryo] diha sa mga sudlanan nga kulonon, aron ang gahom nga labaw sa kasarangan maiya sa Diyos ug dili gikan sa among kaugalingon.” (2 Corinto 4:7) Oo, makahimo kitag dalawatong pag-alagad—apan uban lamang sa hinatag-Diyos nga kusog ug kaalam.—1 Corinto 1:26-31.

Pagsumbalik-Silaw sa Himaya sa Diyos

6. Unsay kalainan tali sa kinaiyanhong Israel ug sa espirituwal nga Israel?

⁶ Nagtumong sa dinihogang mga Kristohanon, si Pablo nag-ingon nga ang Diyos “naghimo kanamo nga makabaton ug igong katakos ingong mga ministro sa usa ka bag-ong pakigsaad.” Gipakita sa apostol ang kalainan tali sa bag-ong pakigsaad nga gihimo uban sa espirituwal nga Israel pinaagi kang Jesu-Kristo ug sa daang Balaod sa pakigsaad nga gihimo uban sa kinaiyanhong Israel pinaagi kang Moises. Midugang si Pablo nga sa dihang si Moises nanaog gikan sa Bukid sa Sinai dala ang mga papan nga bato nga nasudlan sa Napulo ka Sugo, ang iyang nawong misilaw pag-ayo nga ang mga Israelinhon dili makatutok niana. Apan, sa ngadtongadto, adunay mas seryosong butang nga nahitabo tungod kay “ang ilang gahom sa pangisip nahabol” ug ang ilang kasingkasing gitaptapan. Apan, sa dihang mobalik sila kang Jehova uban ang tibuok-kasingkasing nga debosyon, ang taptap kuhaon. Dayon nagtumong sa ministeryo nga gihatag niadtong sakop sa bag-ong pakigsaad, si Pablo miingon: “Kitang tanan, . . . uban ang dili-tinaptapan nga mga nawong atong ginasumbalik-silaw samag mga salamin ang himaya ni Jehova.” (2 Corinto 3:6-8, 14-18; Exodo 34:29-35) Ang “ubang mga karnero” ni Jesus karon nakapribilehiyo usab sa pagsumbalik-silaw sa himaya ni Jehova.—Juan 10:16.

7. Sa unsang paagi ang mga tawo makasumbalik-silaw sa himaya sa Diyos?

⁷ Sa unsang paagi ang makasasalang katawhan makasumbalik-silaw sa himaya sa Diyos, sa dihang walay tawo ang arang makakita sa iyang nawong ug mabuhi pa? (Exodo 33:20) Aw, gawas pa sa personal nga himaya ni Jehova, anaa usab ang iyang mahimayaong katuyoan sa pagbindikar sa iyang pagkasoberano pinaagi sa iyang Gingharian. Ang mga kamatuoran nga nalangkit sa Gingharian maoy bahin sa “halangdong mga butang sa Diyos” nga sugod nga gimantala niadtong gibuboan sa balaang espiritu sa Pentekostes 33 K.P. (Buhat 2:11) Uban sa giya sa espiritu, sila bug-os nga makatuman sa ministeryo nga gipiyal kanila.—Buhat 1:8.

8. Mahitungod sa ministeryo, unsay determinadong buhaton ni Pablo?

⁸ Si Pablo determinado nga dili tugotan ang bisan unsa nga magpugong kaniya sa pagtuman sa bug-os sa iyang ministeryo. Siya misulat: “Sanglit nakabaton man kami niini nga ministeryo sumala sa kaluoy nga gipakita kanamo, kami wala moangka; apan kami mibiya na sa sinuwitik nga mga butang nga angayng ikaulaw, nga wala magalakaw pinaagig lipatlipat, ni nagasambog sa pulong sa Diyos, kondili pinaagi sa pagpadayag sa kamatuoran nagarekomendar sa among kaugalingon ngadto sa matag tawhanong tanlag diha sa atubangan sa Diyos.” (2 Corinto 4:1, 2) Pinaagi sa gitawag ni Pablo nga ‘kini nga ministeryo,’ ang kamatuoran napadayag ug ang espirituwal nga kahayag napakaylap.

9, 10. Sa unsang paagi masumbalik-silaw ang himaya ni Jehova?

⁹ Mahitungod sa Tuboran sa pisikal ug espirituwal nga kahayag, si Pablo misulat: “Ang Diyos mao ang miingon: ‘Mosidlak ang kahayag gikan sa kangitngit,’  ug siya misidlak sa among mga kasingkasing aron sa pagbanwag kanila sa mahimayaong kahibalo sa Diyos pinaagi sa nawong ni Kristo.” (2 Corinto 4:6; Genesis 1:2-5) Tungod kay gihatagan kita sa bililhon kaayong pribilehiyo nga mahimong mga ministro sa Diyos, huptan nato ang atong kaugalingon nga hinlo aron nga kita samag mga salamin makasumbalik-silaw sa himaya ni Jehova.

¹⁰ Ang mga tawo nga anaa sa espirituwal nga kangitngit dili makakita sa himaya ni Jehova o sa sumbalik-silaw niana gikan kang Jesu-Kristo, ang Mas Dakong Moises. Apan ingong mga alagad ni Jehova, kita makadawat sa mahimayaong kahayag gikan sa Kasulatan ug magsumbalik-silaw niana ngadto sa uban. Aron kadtong anaa karon sa espirituwal nga kangitngit makalingkawas sa kalaglagan, sila nagkinahanglan sa kahayag gikan sa Diyos. Nan, uban ang dakong kalipay ug kasibot, kita motuman sa sugo sa Diyos sa pagpasidlak sa kahayag gikan sa kangitngit alang sa kahimayaan ni Jehova.

Palamdaga ang Imong Kahayag Diha sa mga Pagtuon sa Bibliya sa Balay

11. Unsay giingon ni Jesus bahin sa pagpalamdag sa atong kahayag, ug unsa ang usa ka paagi sa pagbuhat niini diha sa atong ministeryo?

¹¹ Giingnan ni Jesus ang iyang mga sumusunod: “Kamo ang kahayag sa kalibotan. Ang usa ka siyudad dili matago kon mahimutang ibabaw sa bukid. Ang mga tawo magdagkot ug lampara ug magpahimutang niini, dili ilalom sa bukag nga sukdanan, kondili diha sa tangkawan, ug kini molamdag kanilang tanan nga anaa sa balay. Sa susama palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.” (Mateo 5:14-16) Ang atong maayong panggawi makatukmod sa uban sa paghimaya sa Diyos. (1 Pedro 2:12) Ug ang lainlaing mga bahin sa atong buluhatong pag-ebanghelyo makahatag kanato ug daghang kahigayonan sa pagpalamdag sa atong kahayag. Usa sa atong pangunang mga tumong mao ang pagsumbalik-silaw sa kahayag gikan sa Pulong sa Diyos pinaagi sa pagdumala ug epektibong mga pagtuon sa Bibliya sa balay. Kini maoy hinungdanon kaayong paagi sa pagtuman sa bug-os sa atong ministeryo. Unsang mga sugyot ang makatabang kanato sa pagdumala ug mga pagtuon sa Bibliya nga motugkad sa kasingkasing sa mga tawong nangita sa kamatuoran?

12. Sa unsang paagi ang pag-ampo nalangkit sa buluhaton sa pagdumala ug mga pagtuon sa Bibliya sa balay?

¹² Ang pag-ampo ngadto kang Jehova bahin niini magpasundayag sa atong dulot nga tinguha sa pagdumala ug mga pagtuon sa Bibliya. Nagpakita usab kini nga atong nasabtan ang kahinungdanon sa pagtabang sa uban nga makabaton ug kahibalo sa Diyos. (Ezequiel 33:7-9) Tinong tubagon ni Jehova ang atong mga pag-ampo ug panalanginan ang atong makugihong mga paningkamot diha sa ministeryo. (1 Juan 5:14, 15) Apan dili kita mag-ampo nga makakaplag lamang ug madumalahan ug pagtuon sa Bibliya sa balay. Human mahimong regular ang pagtuon, ang pag-ampo ug pagpamalandong bahin sa espesipikong mga panginahanglan sa estudyante sa Bibliya motabang kanato sa pagdumala sa matag pagtuon sa epektibong paagi.—Roma 12:12.

13. Unsay makatabang kanato sa pagdumala ug epektibong mga pagtuon sa Bibliya sa balay?

¹³ Aron makadumala ug epektibong mga pagtuon sa Bibliya sa balay, kita kinahanglang mangandam pag-ayo alang sa matag pagtuon. Kon mobati kitang nakulangan sa katakos, makatabang pag-ayo ang pagpaniid kon sa unsang paagi ang magtatan-aw sa Pagtuon sa Libro sa Kongregasyon nagdumala sa tun-anan sa matag semanang pagtuon. Usahay, kita mahimong mokuyog sa mga magmamantala sa Gingharian nga adunay maayong mga resulta sa pagdumala ug mga pagtuon sa Bibliya sa balay. Siyempre, ang tinamdan ug mga pamaagi sa pagtudlo ni Jesu-Kristo ilabinang takos natong tagdon.

14. Sa unsang paagi matugkad nato ang kasingkasing sa usa ka estudyante sa Bibliya?

¹⁴ Si Jesus nalipay sa pagtuman sa kabubut-on sa iyang langitnong Amahan ug sa pagpakigsulti sa uban bahin sa Diyos. (Salmo 40:8) Siya malumog-buot ug milampos sa pagtugkad sa kasingkasing niadtong namati kaniya. (Mateo 11:28-30) Busa maningkamot kita sa pagtugkad sa kasingkasing sa atong ginatun-an sa Bibliya. Aron mahimo nato kana, kita kinahanglang mangandam alang sa matag pagtuon nga maghunahuna sa linaing mga sirkumstansiya sa estudyante. Pananglitan, kon siya sakop sa kultura nga walay kasinatian sa Bibliya, tingali kinahanglang kombinsihon nato siya nga tinuod ang Bibliya. Kon  mao, dayag nga kinahanglang mobasa kita ug daghang teksto ug ipatin-aw kana.

Tabangi ang mga Estudyante sa Pagsabot sa mga Ilustrasyon

15, 16. (a) Sa unsang paagi matabangan nato ang usa ka estudyante nga wala makasabot sa ilustrasyon nga gigamit diha sa Bibliya? (b) Unsay atong mahimo kon ang usa sa atong mga publikasyon naggamit ug ilustrasyon nga lisod sabton sa usa ka estudyante sa Bibliya?

¹⁵ Ang usa ka estudyante sa Bibliya dili tingali sinati sa partikular nga ilustrasyon nga gigamit diha sa Kasulatan. Pananglitan, wala tingali siya makasabot kon unsay kahulogan sa giingon ni Jesus nga ang lampara ibutang ibabaw sa tangkawan. (Marcos 4:21, 22) Ang gitumong ni Jesus mao ang karaang lampara nga adunay nagsigang pabilo. Ang maong lampara gibutang sa usa ka linain nga tungtongan ug busa makalamdag sa usa ka lawak sa balay. Ang pagpanukiduki bahin sa “Lamp” ug “Lampstand” diha sa publikasyon nga sama sa Insight on the Scriptures mahimong gikinahanglan aron mapatin-aw ang ilustrasyon ni Jesus. a Apan magantihon gayod nga moadto sa pagtuon sa Bibliya uban ang katin-awan nga nasabtan ug giapresyar sa estudyante!

¹⁶ Ang usa ka giya sa pagtuon sa Bibliya mahimong maggamit ug ilustrasyon nga lisod sabton sa usa ka estudyante. Paggahin ug panahon sa pagpatin-aw niana, o paggamit ug laing ilustrasyon nga mopalutaw sa mao gihapong punto. Tingali ang usa ka publikasyon nagpasiugda nga ang usa ka maayong kapikas ug ang nahiusang paningkamot hinungdanon sa usa ka kaminyoon. Sa pag-ilustrar niini, mahimong hisgotan ang usa ka tawo nga nagtabyogtabyog gikan sa usa ka trapeze, mibuhi niana, ug nagdepende sa laing sirkiro nga mosalo kaniya. Ingong kapuli, lagmit ang panginahanglan alang sa usa ka maayong kapikas ug sa nahiusang paningkamot mahimong iilustrar sa paagi nga ang mga trabahante nagtinabangay sa pagtunol ug mga kahon ngadto sa usag usa samtang nagdiskarga sa kargamento gikan sa barko.

17. Unsay atong makat-onan gikan kang Jesus mahitungod sa mga ilustrasyon?

¹⁷ Ang paggamit ug kapuling ilustrasyon magkinahanglan tingali ug abanteng pagpangandam. Bisan pa niana, kana maoy paagi sa pagpakita sa atong personal nga interes nganha sa usa ka estudyante sa Bibliya. Si Jesus migamit ug yanong mga ilustrasyon sa pagpatin-aw sa lisod nga mga ulohan. Ang iyang Wali sa Bukid naghatag ug mga pananglitan niini, ug ang Bibliya nagpakita nga ang iyang pagpanudlo adunay maayong epekto sa iyang mga mamiminaw. (Mateo 5:1–7:29) Si Jesus mapailobong nagpatin-aw sa mga butang tungod kay siya adunay dulot nga interes sa uban.—Mateo 16:5-12.

18. Unsay gisugyot mahitungod sa mga teksto nga gisitar diha sa atong mga publikasyon?

¹⁸ Ang atong interes sa uban mopalihok kanato sa ‘pagpangatarongan gikan sa Kasulatan.’ (Buhat 17:2, 3) Nagkinahanglan kini ug pagtuon uban ang mga pag-ampo ug maalamong paggamit sa mga publikasyon nga gitagana pinaagi sa “matinumanong piniyalan.” (Lucas 12:42-44) Pananglitan, ang librong Kahibalo nga Motultol sa Kinabuhing Walay Kataposan nagkutlo ug daghang teksto. b Tungod sa kakulang ug luna, ang uban gisitar lamang. Panahon sa pagtuon sa Bibliya, hinungdanon nga basahon ug ipatin-aw ang labing menos pipila niining gisitar nga mga teksto. Kon buot hunahunaon, ang atong pagtulon-an gipasukad sa Pulong sa Diyos, ug kini gamhanan kaayo. (Hebreohanon 4:12) Hisgoti kanunay ang Bibliya diha sa matag pagtuon, nga subsob nga mogamit ug mga teksto nga makita diha sa mga parapo. Tabangi ang estudyante sa pagsabot kon unsay giingon sa Bibliya bahin sa usa ka ulohan o kalihokan. Paningkamot sa pagpakita kaniya kon sa unsang paagi siya makabenepisyo gikan sa pagkamasinugtanon sa Diyos.—Isaias 48:17, 18.

 Pagsukna ug Makapukaw-sa-Hunahuna nga mga Pangutana

19, 20. (a) Nganong angay kitang mogamit ug punto-debistang mga pangutana sa dihang magdumala ug pagtuon sa Bibliya sa balay? (b) Unsay mahimo kon ang usa ka ulohan nagkinahanglan ug dugang panaghisgot?

¹⁹ Ang batid nga paggamit ni Jesus ug mga pangutana nakatabang sa mga tawo sa pagpangatarongan. (Mateo 17:24-27) Kon kita mosukna ug punto-debistang mga pangutana nga dili makapaulaw sa usa ka estudyante sa Bibliya, ang iyang mga tubag mahimong magbutyag kon unsay iyang hunahuna bahin sa usa ka ulohan. Mahibaloan tingali nato nga aduna gihapon siyay dili-kasulatanhong mga panglantaw. Pananglitan, nagtuo tingali siya sa Trinidad. Sa kapitulo 3, ang librong Kahibalo nagpunting nga ang pulong “Trinidad” wala sa Bibliya. Ang libro nagkutlo ug nagsitar sa mga teksto nga nagpakita nga si Jehova bulag kang Jesus ug nga ang balaang espiritu maoy aktibong gahom sa Diyos, dili usa ka persona. Ang pagbasa ug paghisgot niining maong mga teksto sa Bibliya mahimong igo na. Apan komosta kon labaw pa niana ang gikinahanglan? Tingali human sa sunod nga regular nga eskedyul sa pagtuon, mahimong maggahin ug panahon alang sa mabungahong panaghisgot bahin niining ulohana sumala sa pagpatin-aw niini diha sa laing publikasyon sa mga Saksi ni Jehova, sama sa brosyur nga Angay ba Nimong Tuohan ang Trinidad? Human niana, mahimong ipadayon nato ang pagtuon ginamit ang librong Kahibalo.

²⁰ Ibutang ta nga ang tubag sa estudyante sa punto-debistang pangutana makapakurat o makapahigawad pa gani. Kon ang pagtabako, o ubang sensitibong mga ulohan, ang gihisgotan, mahimong isugyot nato nga atong ipadayon ang pagtuon ug unya na lang hisgotan ang maong ulohan. Ang pagkahibalo nga ang estudyante nagtabako gihapon makapaarang kanato sa pagpangitag napatik nga impormasyon nga makatabang kaniya nga mouswag sa espirituwal. Samtang naningkamot kita sa pagtugkad sa kasingkasing sa estudyante, makaampo kita nga tabangan siya ni Jehova nga mouswag sa espirituwal.

21. Unsay mahimong mahitabo kon atong ipahaom ang atong mga pamaagi sa pagpanudlo ngadto sa espesipikong mga panginahanglan sa estudyante?

²¹ Uban sa maayong pagpangandam ug sa tabang ni Jehova, sa walay duhaduha mapasibo nato ang atong mga paagi sa pagpanudlo aron mohaom sa espesipikong mga panginahanglan sa estudyante sa Bibliya. Sa paglabay sa panahon, kita makatabang kaniya sa pag-ugmad ug halalom nga gugma alang sa Diyos. Mahimong molampos usab kita sa pag-ugmad ug pagtahod ug apresasyon alang sa organisasyon ni Jehova. Ug pagkamakapatagbaw sa dihang ang mga estudyante sa Bibliya moila nga ‘ang Diyos anaa gayod sa atong taliwala’! (1 Corinto 14:24, 25) Busa hinaot nga kita magdumala ug epektibong mga pagtuon sa Bibliya ug mobuhat sa tanan natong maarangan sa pagtabang sa uban nga mahimong mga tinun-an ni Jesus.

Usa ka Bahandi nga Angayng Pabilhan

22, 23. Unsay gikinahanglan aron bug-os natong matuman ang atong ministeryo?

²² Aron matuman sa bug-os ang atong ministeryo, kita kinahanglang mosalig sa hinatag-sa-Diyos nga kusog. Nga nagtumong sa ministeryo, si Pablo misulat sa isigkadinihogang mga Kristohanon: “Nabatonan namo kini nga bahandi diha sa mga sudlanan nga kulonon, aron ang gahom nga labaw sa kasarangan maiya sa Diyos ug dili gikan sa among kaugalingon.”—2 Corinto 4:7.

²³ Sakop man sa mga dinihogan o sa “ubang mga karnero,” kita nahisama sa huyang nga mga sudlanang kulonon. (Juan 10:16) Hinunoa, si Jehova makahatag kanato ug kusog nga gikinahanglan sa pagtuman sa atong tinudlong mga buluhaton bisan pa sa mga pagpit-os nga gipahamtang kanato. (Juan 16:13; Filipos 4:13) Busa sa walay pagduhaduha mosalig kita kang Jehova, pabilhan ang atong bahandi sa pag-alagad, ug bug-os nga tumanon ang atong ministeryo.

[Mga footnote]

Unsaon Nimo Pagtubag?

• Unsay mahimo sa mga ansiyano aron matuman sa bug-os ang ilang ministeryo?

• Sa unsang paagi mapauswag nato ang kaepektibo sa atong mga pagtuon sa Bibliya sa balay?

• Unsay imong buhaton kon ang usa ka estudyante sa Bibliya wala makasabot sa usa ka ilustrasyon o nagkinahanglan ug dugang impormasyon bahin sa usa ka ulohan?

[Mga Pangutana sa Pagtuon]

[Hulagway sa panid 16]

Ang Kristohanong mga ansiyano manudlo diha sa kongregasyon ug motabang sa pagbansay sa mga isigkamagtutuo diha sa ministeryo

[Hulagway sa panid 18]

Ang pagdumala ug epektibong mga pagtuon sa Bibliya sa balay maoy usa ka paagi sa pagpalamdag sa atong kahayag