Maan e suan Ɲanmiɛn Ndɛ’n nun like

?Jɔlɛ dilɛ cɛn’n nun’n, sa benin yɛ ɔ́ jú ɔ?

Ndɛ nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle amun bɔbɔ amun Biblu’n i lika nga amun kwla kanngan nun naan amun a wun be su tɛlɛ’n. Zoova i Lalofuɛ’m be klo kɛ be nin amun kókó ndɛ sɔ’m be su yalɛ.

1. ?Ngue yɛ be flɛ i jɔlɛ dilɛ cɛn’n niɔn?

Kɛ nga be fa yili i nglo desɛn ng’ɔ o fama su lɛ’n nun’n sa’n, sran sunman be bu i kɛ jɔlɛ dilɛ cɛn’n nun’n, bé fá sran akpi ngbinngbin nga be wuli’n bé kɔ́ Ɲanmiɛn ja su. Yɛ Ɲanmiɛn jrán sa nga be yoli ka naan b’a wu’n su dí be jɔlɛ. Kɛ ɔ ko yo sɔ’n, wie’m bé trán nguan nun ɲanmiɛn su lɔ, yɛ wie’m be liɛ’n bé klé be ɲrɛnnɛn sin fɛtɛ kun nun. Sanngɛ Biblu’n kle kɛ Ɲanmiɛn sieli jɔlɛ dilɛ cɛn’n naan sran’m b’a kwla ɲan be ti. (Jue Mun 96:13) Ɲanmiɛn sieli Zezi Jɔlɛ Difuɛ naan ɔ yo naan sran’m be yo sa i nuan su.​—An kanngan Ezai 11:1-5 nin Sa Nga Be Yoli’n 17:31 nun.

2. ?Wafa sɛ yɛ jɔlɛ dilɛ cɛn’n ti’n bé wá yó sa i nuan su ekun ɔn?

Kɛ Adam m’ɔ ti sran klikli’n i ɲinfu yoli ɲin kekle Ɲanmiɛn su’n, ɔ fali sa tɛ yolɛ’n nin ɲrɛnnɛn’n ɔ nin wie’n yili i osu’n nunfuɛ’m be kwlaa be su. (Rɔmfuɛ Mun 5:12) Kɛ ɔ ko yo naan i sɔ liɛ’n w’a wie’n, Zezi wá cɛ́n sran akpi ngbinngbin mɔ be wuli’n mun. Sa Nglo Yilɛ fluwa’n kle kɛ Zezi Klist i afuɛ akpi famiɛn dilɛ blɛ’n nun yɛ i sɔ sa liɛ’n jú ɔ.​—An kanngan Sa Nglo Yilɛ 20:4, 11, 12 nun.

Be nga bé cɛ́n be’n, nán sa nga be yoli ka naan b’a wu’n i su yɛ bé jrán bé dí be jɔlɛ ɔ. Sanngɛ “fluwa” nga Sa Nglo Yilɛ ndɛ tre 20 kan be ndɛ’n, mɛn uflɛ’n nun’n, kɛ be ko yi be nun ndɛ’m be nglo’n, be su yɛ bé jrán bé dí be jɔlɛ ɔ. (Rɔmfuɛ Mun 6:7) Sran nga bé wá cɛ́n mɔ bé kwlá súan Ɲanmiɛn i su like’n, akoto Pɔlu seli kɛ “sran kpa mun o, sran tɛ mun o,” be o nun.​—An kanngan Sa Nga Be Yoli’n 24:15 nun.

  3. ?Jɔlɛ dilɛ cɛn’n i bo’n gúa sɛ?

Be nga b’a kwlá ɲanman atin b’a siman Ɲanmiɛn Zoova naan b’a su i mɔ be wuli’n, bé kwlá ɲán kacilɛ nin sa kpa yolɛ’n wun atin. Sɛ be yo sa kpa’n, “bé cɛ́n bé nyán nguan.” Sanngɛ be nga bé cɛ́n be’n, be nun wie’m be su kloman kɛ bé nánti Zoova i mmla’m be su. Be liɛ’n, “bé cɛ́n, yɛ bé fá be kɔ́ jɔlɛ difuɛ’n i ja su.”​—An kanngan Zan 5:28, 29 nin Ezai 26:10; 65:20 nun.

Jɔlɛ dilɛ cɛn sɔ’n ɔ́ dí afuɛ akpi. Lele m’ɔ́ fá wíe’n nn Zoova w’a yo maan fɔ’n w’a tu klɔ sran’m be nun yɛ b’a kaci kɛ i nun mɔ fɔ nunman klɔ sran klikli’n nun’n sa. (1 Korɛntfuɛ Mun 15:24-28) I sɔ like mɔ klɔ sran’m bé wá ɲɛ́n i’n, ɔ yo ɲɛnmɛn dan o! Kasiɛn su’n, Ɲanmiɛn wá sá sran mun nían. Blɛ sɔ’n nun’n, ɔ́ yí mmusu’m be si Satan m’ɔ wlɛli i bisua kunman dan m’ɔ be simɛn i bo’n nun lele afuɛ akpi kun’n, ɔ́ fíte. Satan wá kúnndɛ yó ekun naan sran’m be kpɔci Zoova. Sanngɛ be nga be su suman Satan su’n bé ɲán anannganman nguan asiɛ’n su wa.​—An kanngan Ezai 25:8 nin Sa Nglo Yilɛ 20:7-9 nun.

4. ?Jɔlɛ dilɛ cɛn uflɛ benin yɛ ɔ́ wá yó sran’m be ye ɔ?

Biblu’n kan “jɔlɛ dilɛ cɛn’n” i wafa kun ekun ndɛ. I lifuɛ’n kan sa nga bé wá jú mɔ maan mɛn nga ɔ́ núnnún’n, i ndɛ. Jɔlɛ dilɛ cɛn sɔ’n ɔ́ fú sran’m be nun kɛ nga Nowe blɛ su’n nzue dan’n fa tɔli m’ɔ nunnunnin klunwifuɛ’m be kwlaa’n sa. Ndɛ ng’ɔ yo fɛ’n yɛle kɛ “sran nga be sro-man Nyanmiɛn’n” be nunnunlɛ blɛ nga w’a mantan koko kpa yɛ’n, ɔ́ wá yó maan be nga bé trán asiɛ’n su’n be kwlaa ‘bé yó sa kpa’ yofuɛ.​—An kanngan 2 Piɛr 3:6, 7, 13 nun.

Sɛ amun kunndɛ kɛ amún sí nun ekun’n, an nian fluwa Ngue like yɛ Biblu’n kle i sakpasakpa ɔ? i bue 213-215 nun. Zoova i Lalofuɛ mun yɛ be yili ɔ.

[Foto, bue 16]

“Jɔlɛ dilɛ kasiɛn’n,” Gustave Doré, Afuɛ 1832-1883.

[Foto cifuɛ]

Engravings by Doré