Jesu-Kristo—Hin-o Hiya?
“BISAN an damu nga mga tawo nga diri mga Kristiano natoo nga Hiya usa ka bantogan ngan makinaadmananon nga magturutdo. Sigurado nga usa hiya han pinakamaimpluwensya nga mga tawo nga nabuhi.” (The World Book Encyclopedia) Hin-o “Hiya”? Hi Jesu-Kristo, an nagtukod han Kristianidad. Kilala mo ba kon hin-o hiya? Hiya ba ha anoman nga paagi nakakaapekto ha imo kinabuhi?
An mga hitabo han ministeryo ni Jesus iginsurat ha Biblia ha upat makasaysayan nga mga asoy nga tinatawag mga Ebanghelyo. Mationan-o katotoo ini nga mga asoy? Katapos usisahon ito, an kilala nga historyador nga hi Will Durant nagsurat: “Nga an pipira simple nga kalalakin-an ha usa nga henerasyon nag-imbento hin gamhanan ngan makaruruyag gud nga personalidad, hitaas gud an moral ngan makapabantad gud nga ideya han tawhanon nga pagminagburugto, usa nga milagro nga labi ka urusahon kay ha anoman nga iginsurat ha mga Ebanghelyo.”
Kondi, ha minilyon nga mga tawo ha Oriente ngan ha iba nga lugar, diri-kilala hi Jesu-Kristo. Bangin natoo hira nga nag-eksister hiya, kondi diri hira naghuhunahuna nga mayada kalabotan hiya ha ira mga kinabuhi. An iba naghuhunahuna kan Jesus sugad nga diri-takos han atensyon tungod han ginbubuhat han nag-aangkon nga iya mga sumurunod. ‘Naghulog hira hin bomba atomika ha Nagasaki,’ siring han iba ha Japan, ‘usa nga siyudad nga mas damu an mga Kristiano kay ha kadam-an nga mga siyudad ha Japan.’
Kondi, babasulon mo ba an usa nga doktor tungod ha sakit han pasyente kon mapakyas an pasyente ha pagsunod ha reseta han doktor? Matin-aw nga diri. Maiha na nga ginbabalewaray han mga tawo ha Kakristianohan an reseta ni Jesus basi malamposan an ira adlaw-adlaw nga mga problema. Salit imbes nga igsalikway hi Jesus tungod han tinatawag nga mga Kristiano, nga diri nasunod ha iya mga instruksyon, kay ano nga diri mo pag-adman an mahitungod ha iya? Usisaha an Biblia, ngan kitaa kon hin-o gud hi Jesus ngan kon paonan-o niya mababag-o an imo kinabuhi.
Gugma—An Iya Sugo
Hi Jesu-Kristo usa ka daku nga magturutdo nga nag-ukoy ha Palestina haros 2,000 ka tuig na an naglabay. Gutiay gud la an hinbabaroan mahitungod han iya pagkabata. (Mateo, kapitulo 1 ngan 2; Lukas, kapitulo 1 ngan 2) Han 30 anyos na an iya edad, nagtikang hi Jesus ha iya ministeryo ha ‘pagtestigo han kamatuoran.’ (Juan 18:37; Lukas 3:21-23) An upat nga nagsumat han kasaysayan han kinabuhi ni Jesus nakasentro ha iya ministeryo ha publiko, ha kataposan tulo ngan tunga ka tuig nga iya pag-ukoy ha tuna.
Durante han iya ministeryo, iginhatag ni Jesus ha iya mga disipulo an yawi ha pagsulbad han magkalainlain nga mga problema ha ira kinabuhi. Ano ito nga yawi? Amo an gugma. Ha usa han pinakabantogan nga mga sermon ha kasaysayan, tinatawag nga Sermon ha Bukid, gintutdoan ni Jesus an iya mga disipulo kon paonan-o ipapakita an gugma ha mga igkasi-tawo. Hiya nagsiring: “Busa, an ngatanan nga mga butang, nga buot niyo ipapagbuhat han mga tawo ha iyo, buhata man niyo ha ira.” (Mateo 7:12) Ini nga prinsipyo tinatawag nga an Bulawanon nga Sugo. An “mga tawo” nga gin-unabi ni Jesus dinhi nag-uupod bisan han mga kaaway han usa. Ha pariho nga sermon, hiya nagsiring: ‘Padayon nga higugmaon niyo an iyo mga kaaway ngan mag-ampo kamo para hadton nagtitimaraot ha iyo.’ (Mateo 5:44) Diri ba an sugad nga gugma makakagsulbad han damu nga mga problema nga inaatubang naton yana nga adlaw? Iton an ginhunahuna han Hindu nga lider nga hi Mohandas Gandhi. Ginkotar hiya nga nasiring: “Kon magkaurosa [kita] ha mga katutdoan nga igintutdo ni Kristo hini nga Sermon ha Bukid, masusulbad naton an mga problema . . . han bug-os nga kalibotan.” An mga katutdoan ni Jesus ha gugma, kon iaplikar, makakatambal ha mga sakit han katawohan.
An Iya Gugma nga May Buhat
Ginbuhat ni Jesus an iya igintutdo. Gin-una niya an mga kaopayan han iba kay ha iya kalugaringon ngan ipinakita an gugma nga may buhat. Usa ka adlaw, hi Jesus ngan an iya mga disipulo nagmamangno ha damu nga mga tawo, nga waray na panahon nga kumaon. Nakita ni Jesus an panginahanglan han iya mga disipulo nga ‘pumahuway hin dali,’ salit nagpakadto hira ha mamingaw nga lugar. Kondi nag-una ha ira an mga tawo ngan naghinulat han ira pag-abot. Paonan-o ka magios kon aada ka ha lugar ni Jesus? Bueno, hi Jesus “nalooy ha ira” ngan “nagtikang hiya hin pagpanutdo ha ira hin damu nga mga bagay.” (Markos 6:30-34) Inin daku nga kalooy nagpagios ha iya nga buligan an iba.
Diri la ha espirituwal nga pagtutdo an ginbuhat ni Jesus basi magpahimulos an iba. Binulig liwat hiya ha praktikal nga paagi. Pananglitan, ginpakaon niya an 5,000 nga kalalakin-an (dugang pa ha kababayin-an ngan kabataan) nga nagpinamati ha iya tubtob ha kulop ha usa ka adlaw. Ginpakaon niya an 4,000 ha urhi nga hitabo. Ha nahiuna nga okasyon, ginamit niya an lima nga tinapay ngan duha nga isda ngan, ha urhi, pito nga tinapay ngan pipira ka gudtiay nga isda. (Mateo 14:14-21; 15:32-38; Markos 6:35-44; 8:1-9) Mga milagro ba ito? Oo, magburuhat hiya hin milagro.
Gintambal liwat ni Jesus an damu nga mga magsakit. Gintambal niya an buta, an piang, an mga sanlahon, ngan an bungol. Aw, ginbanhaw pa ngani niya an patay! (Lukas 7:22; Juan 11:30-45) Usa nga sanlahon an nakimalooy ha iya: “Kon imo karuyag, makakalinis ka ha akon.” Paonan-o binaton hi Jesus? “Inunat niya an iya kamot, ngan kinamkam hiya, ngan siniring ha iya: Karuyag ko, malinisan ka.” (Markos 1:40, 41) Napagios hi Jesus han makusog nga hingyap nga buligan hira. Pinaagi han sugad nga mga milagro, ipinakita niya an iya gugma ha mga may sakit.
Makuri ba toohan? Kondi ginbuhat ni Jesus an kadak-an han iya mga milagro ha publiko. Bisan an iya mga parakontra, nga nangalimbasog ha pagbiling hin sayop ha iya ha ngatanan nga okasyon, diri makakagnigar han kamatuoran nga nagbuhat hiya hin mga milagro. (Juan 9:1-34) Dugang pa, an iya mga milagro mayada katuyoan. Binuligan hito an mga tawo nga makilala hi Jesus sugad nga an usa nga sinugo han Dios.—Juan 6:14.
An madaliay la nga paghisgot han mga katutdoan ni Jesus ngan han iya kinabuhi nakakahimo ha iya nga higugmaon naton ngan nagpapagios ha aton nga maruyag nga subaron an iya gugma. Kondi, diri la ito an paagi nga makakaapekto hi Jesus ha imo kinabuhi. Diri la hiya usa ka daku nga magturutdo nga nagtutdo han gugma. Ipinakita niya nga naeksister hiya antes magin tawo sugad nga bugtong nga Anak han Dios. (Juan 1:14; 3:16; 8:58; 17:5; 1 Juan 4:9) Naeksister liwat hiya katapos magin tawo, nga naghihimo ha iya nga labi ka importante ha imo. Ipinapakita han Biblia nga ginbanhaw hi Jesus ngan nahitrono na yana sugad nga Hadi han Ginhadian han Dios. (Pahayag 11:15) Hi Jesus nagsiring: ‘Ini nangangahulogan hin kinabuhi nga waray kataposan, an ira pagkuha hin kahibaro ha imo, an amo la matuod nga Dios, ngan ha usa nga imo sinugo, hi Jesu-Kristo.’ (Juan 17:3; 20:31) Tinuod, an pagkuha hin kahibaro mahitungod kan Jesu-Kristo mahimo mangahulogan hin kinabuhi nga waray kataposan ha Paraiso! Paonan-o? Kay ano nga diri pag-adman an mahitungod kan Jesus ngan kitaon kon paonan-o “an gugma ni Kristo nagpipirit ha aton” nga subaron hiya? (2 Korinto 5:14) Malilipay an mga Saksi ni Jehova ha pagbulig ha imo.—Juan 13:34, 35.
Gawas la kon iba an ipinakita, an ngatanan nga mga kotasyon han Biblia tikang ha Samar-Leyte nga Biblia han PBS nga may moderno nga ortograpiya.
