‘Maglipay Kan Jehova’

“Maglipay . . . kan Jehova; ngan hiya mahatag ha imo han mga pinangangaro han imo kasingkasing.”​—⁠SALMO 37:4.

1, 2. Hin-o an Surok han totoo nga kalipay, ngan paonan-o gindani ni Hadi David an atensyon ngada hini nga kamatuoran?

“MALIPAYON adton mahunahunaon han ira espirituwal nga panginahanglan, . . . malipayon an mga maloloy-on, . . . malipayon an mga nakikigmurayaw.” Upod an unom nga iba pa nga mga paghulagway mahitungod hadton maglipayon, ini nga mga pulong amo an makatirigamnan nga introduksyon han bantogan nga Sermon ha Bukid ni Jesus, nga iginsurat han parasurat han Ebanghelyo nga hi Mateo. (Mateo 5:3-11, NW) An mga pulong ni Jesus nagpapasarig nga madadangat naton an kalipay.

² An usa nga salmo nga iginsurat ni Hadi David han kadaan nga Israel nagdadani han aton atensyon ngada ha Surok han totoo nga kalipay, hi Jehova. “Maglipay . . . kan Jehova,” siring ni David, “ngan hiya mahatag ha imo han mga pinangangaro han imo kasingkasing.” (Salmo 37:4) Kondi ano an makakahimo nga magin ‘makalilipay’ an pagkilala kan Jehova ngan paghibaro ha damu nga mga bahin han iya personalidad? Paonan-o an paghisgot mahitungod han iya ginbubuhat ngan pagbubuhaton pa ha pagtuman han iya katuyoan naghahatag ha imo han paglaom nga makarawat an “mga pinangangaro han imo kasingkasing”? An detalyado nga paghisgot ha Salmo 37, bersikulo 1 tubtob 11, naghahatag han mga baton.

“Diri Ka Maawa”

3, 4. Sugad han iginsurat ha Salmo 37:​1, ano an iginsagdon ni David, ngan kay ano nga angayan an pagsunod hito yana?

³ Nagkikinabuhi kita ha “magpakalilisang nga mga panahon,” ngan kaylap an karaotan. Nakikita naton an katumanan han mga pulong ni apostol Pablo: “An mga magraot ngan maglimbong nga mga tawo matubo ha maraot ngan labi pa gud nga maraot, ngan manlilimbong hira ngan panlilimbongan man hira.” (2 Timoteo 3:​1, 13) Masayon gud kita maapektohan han baga in kalamposan ngan kauswagan han magraot nga mga tawo! Ito ngatanan makakaulang ha aton, nga hinungdan nga diri na nakasentro an aton espirituwal nga panan-aw. Tigamni kon paonan-o an siyahan nga mga pulong han Salmo 37 nagpapahamangno ha aton ngada hinin posible nga peligro: “Diri ka magmasamdong [“masina,” NW] tungod han mga magburuhat hin diri-katadongan, bisan liwat diri ka maawa ha ira nga nagbubuhat hin diri-matadong.”

⁴ An media han kalibotan adlaw-adlaw nga nagsusumat ha aton hin damu hinduro nga mga buhat han kawaray-hustisya. An diri-tangkod nga mga negosyante nakakalikay ha sirot ha ira panlimbong. Ginpapahimulsan han mga kriminal an mga magluya. An mga parapamatay padayon nga diri nadidiskobrehan o diri nasisirotan. Ito ngatanan nga mga ehemplo han pagbaliko han hustisya mahimo makaaghat han kasina ngan makasamok han aton kamurayawan ha hunahuna. An baga in kalamposan han mga magburuhat hin maraot bangin makaaghat pa ngani hin mga pagbati hin kaawa. Kondi magpapauswag ba han kahimtang an aton kasina? An kaawa ba ha mga bentaha nga pinahihimulsan han magraot makakagbag-o han magigin resulta  para ha ira? Diri gud! Ngan diri gud kinahanglan nga “masina” kita. Kay ano nga diri?

5. Kay ano nga an mga magburuhat hin maraot iginpapariho ha banwa?

⁵ An salmista binaton: “Kay sugad han banwa madali hira utdon, ngan malalaya hira sugad han hilaw nga urutanon.” (Salmo 37:2) An berde nga natubo pa la nga banwa bangin maopay pagkit-on, kondi an mga dahon nalalaya dayon ngan namamatay. Sugad gud hito an kahimtang han mga magburuhat hin maraot. An ira kauswagan diri permanente. Kon hira mamatay, an ira mga bahandi nga nakuha ha ilegal nga paagi diri makakabulig ha ira. Ha kataposan makakarawat han ngatanan an angayan nga hustisya. “An suhol han sala amo an kamatayon,” nagsurat hi Pablo. (Roma 6:23) An mga magburuhat hin maraot ngan an ngatanan nga diri-magtadong ha kataposan makarawat han ira “suhol” ngan waray na iba. Waray gud pulos ini nga paagi han pagkinabuhi!​—⁠Salmo 37:​35, 36; 49:​16, 17.

6. Ano nga leksyon an mahibabaroan naton tikang ha Salmo 37:​1, 2?

⁶ Salit, sadang ba naton tugotan an lumalabay nga kauswagan han mga magburuhat hin maraot nga makasamok ha aton? An leksyon tikang ha siyahan nga duha nga bersikulo han Salmo 37 amo ini: Ayaw tuguti an ira kalamposan nga magpasimang ha imo tikang ha imo pinili nga pagkinabuhi ha pag-alagad kan Jehova. Lugod, tipigi an imo hunahuna nga nakasentro ha espirituwal nga mga balos ngan mga tumong.​—⁠Proberbios 23:17.

‘Sarig kan Jehova Ngan Buhata an Maopay’

7. Kay ano nga sadang kita sumarig kan Jehova?

⁷ ‘Sarig kan Jehova ngan buhata an maopay,’ ginsasagda kita han salmista. (Salmo 37:3a) Kon naabot ha aton an mga pangarit o mga pagruhaduha pa ngani, kinahanglan magin marig-on an aton pagsarig kan Jehova. Hiya an Usa nga naghahatag hin bug-os nga espirituwal nga seguridad. “An naukoy dida ha pinapahuwayan han Gihitaasi,” nagsurat hi Moises, “maukoy ha ilarom han lambong han Makagarahum.” (Salmo 91:1) Kon naguguol tungod han pagdugang han karaotan dida hini nga sistema han mga butang, kinahanglan labaw nga sumarig kita kan Jehova. Kon napiol an mukubuko han aton tiil, nalilipay kita kon nabulig ha aton an usa nga sangkay. Ha sugad man nga paagi, kon nangangalimbasog kita nga maglakat ha pagkamatinumanon, ginkikinahanglan naton an bulig ni Jehova.​—⁠Isaias 50:10.

8. Paonan-o an pakigbahin ha Kristiano nga ministeryo makakabulig ha aton nga malikyan an kaguol ha kauswagan han magraot?

⁸ An usa nga solusyon ha kaguol ha kauswagan han magraot amo an pagin okupado ha pagbiling ngan pagbulig ha sugad-karnero nga mga tawo nga magkaada husto nga kahibaro ha katuyoan ni Jehova. Ha atubangan han nagdudugang nga karaotan, kinahanglan magin bug-os nga okupado kita ha pagbulig ha iba. “Ayaw niyo hingalimti an pagbuhat hin maopay ngan pagkamahatagon,” siring ni apostol Pablo, “kay ha sugad nga mga halad an Dios nalilipay.” An gidadakui nga “maopay” nga mahihimo naton amo an pagsumat ha iba han mahimayaon nga maopay nga sumat han Ginhadian han Dios. An aton pagsangyaw ha publiko tinuod nga ‘usa ka halad han pagdayaw.’​—⁠Hebreo 13:​15, 16; Galasia 6:10.

9. Isaysay an pagsagda ni David nga “ukoy ha tuna.”

⁹ “Ukoy ha tuna,” nagpadayon hi David, “ngan makig-upod nga matinumanon.” (Salmo 37:3b, NW) An “tuna” ha panahon ni David amo an teritoryo nga iginhatag ni Jehova ha Israel, an Tuna nga Iginsaad. Durante han pagmando ni Salomon an mga tubtoban hito amo an tikang ha Dan ha norte tubtob ha Beer-seba ha sur. Ini an urukyan han Israel. (1 Hadi 4:25) Yana, diin man kita naukoy ha tuna, ginpapamulat naton an panahon nga an bug-os nga tuna magin paraiso na ha bag-o nga kalibotan han katadongan. Samtang yana, naukoy kita ha espirituwal nga seguridad.​—⁠Isaias 65:​13, 14.

10. Ano an resulta kon kita ‘nakikig-upod nga matinumanon’?

 ¹⁰ Ano an magigin resulta kon kita ‘nakikig-upod nga matinumanon’? An inspirado nga proberbio nagpapahinumdom ha aton: “An tawo nga matinumanon mahuhura hin mga bendisyon.” (Proberbios 28:20) An aton matinumanon nga pagpadayon ha pagsangyaw han maopay nga sumat diin man kita naukoy ngan ha bisan kan kanay sigurado nga magriresulta hin mga balos tikang kan Jehova. Pananglitan, hi Frank ngan an iya asawa, hi Rose, nagpayunir ha usa nga bungto ha norte nga Scotland 40 ka tuig na an naglabay. An pipira didto nga nagpakita hin interes ha kamatuoran hadto waray magpadayon. Tungod kay determinado, inin payunir nga mag-asawa nagtikang ha buruhaton nga pagsangyaw ngan paghimo hin mga disipulo. Yana may-ada mainuswagon nga kongregasyon dida hiton nga bungto. An pagkamatinumanon hini nga mag-asawa tinuod nga ginbendisyonan ni Jehova. “An gidadakui nga bendisyon,” mapainubsanon nga nagsaysay hi Frank, “amo an pagpabilin namon ha kamatuoran ngan paggamita pa ha amon ni Jehova.” Oo, kon kita ‘nakikig-upod nga matinumanon,’ kinakarawat ngan inaapresyar naton an damu nga mga bendisyon.

‘Maglipay kan Jehova’

11, 12. (a) Paonan-o kita mahimo ‘maglipay kan Jehova’? (b) Ano an mahihimo mo nga tumong may kalabotan ha personal nga pag-aram, ngan ano an posible nga resulta?

¹¹ Basi maparig-on an aton relasyon kan Jehova ngan matipigan an aton pagsarig ha iya, kita kinahanglan ‘maglipay kan Jehova.’ (Salmo 37:4a) Paonan-o naton mahihimo ito? Imbes nga magin okupado hinduro ha aton kalugaringon nga kahimtang, bisan kon makuri ito, an aton atensyon nakasentro kan Jehova. Usa nga paagi han pagbuhat hini amo an paggahin hin panahon ha pagbasa han iya Pulong. (Salmo 1:​1, 2) Nalilipay ka ba ha imo pagbasa han Biblia? Malilipay ka kon babasahon mo ito nga may tumong nga mahibaro hin damu pa mahitungod kan Jehova. Kay ano nga diri humunong katapos basahon an usa ka bahin ngan pakianhan an imo kalugaringon, ‘Ano an igintutdo ha akon hini nga bersikulo mahitungod kan Jehova?’ Bangin makabulig an pagkaada notebook o papel kon nagbabasa ka han Biblia. Ha kada panahon nga nahunong ka ha pamalandong ha kahulogan han imo binabasa, isurat an mga pulong nga nagpapahinumdom ha imo han usa han makaruruyag nga mga kalidad han Dios. Ha usa pa nga salmo, hi David nagkanta: “Makarawat [“Magin makalilipay,” NW] unta ha imo atubangan an mga pulong han akon baba ngan an pamalandong han akon kasingkasing, O Jehova nga bantilis nakon, ngan akon manunubos.” (Salmo 19:14) An pagsentro han aton atensyon ha Pulong han Dios “makalilipay” kan Jehova ngan ha aton liwat.

¹² Paonan-o kita malilipay ha aton pag-aram ngan pamalandong? Himoon naton nga tumong an paghibaro hin damu pa gud mahitungod kan Jehova ngan han iya mga paagi. An mga publikasyon sugad han The Greatest Man Who Ever Lived ngan Magin Duok kan Jehova⁠ * naghahatag ha aton hin damu hinduro nga mga impormasyon nga mahimo naton pamalandungon nga may pagpasalamat. Tungod hito, hi David nagpapasarig ha matadong nga tawo nga hi Jehova “mahatag ha imo han mga pinangangaro han imo kasingkasing.” (Salmo 37:4b) Ini nga klase hin pagsarig an nagpagios kan apostol Juan nga isurat an mga pulong: “Ini amo an aton pagsarig ha iya, nga, kon mangaro kita hin bisan ano nga bagay sumala ha iya kaburut-on, mamamati hiya ha aton: ngan kon hibaroan naton nga pinamamatian niya an ngatanan nga aton pinangangaro, hibabaroan ta nga may-ada han pinangangaro ta ha iya.”​—⁠1 Juan 5:​14, 15.

13. Ha bag-o la nga mga tuig, ano nga pagpahaluag han pagsangyaw-han-Ginhadian nga buruhaton an naoobserbahan ha damu nga mga nasud?

 ¹³ Sugad nga mga magtiripig-han-integridad, an aton gidadakui nga kalipay amo an pakakita han pagbindikar han pagkasoberano ni Jehova. (Proberbios 27:11) Diri ba nagsasap-ay an aton mga kasingkasing hin kalipay kon hinbabaroan naton an daku hinduro nga buruhaton nga pagsangyaw nga ginbubuhat han aton kabugtoan ha mga nasud nga ilarom hadto han pagmando han mga diktador? Ginpapamulat gud naton nga makita an dugang nga kagawasan nga mahimo mahitabo antes matapos ini nga sistema. Damu han mga surugoon ni Jehova nga naukoy ha mga nasud ha weste nga bahin han kalibotan an madasigon nga nakikigbahin ha pagsangyaw ha mga estudyante, mga pinalagiw, ngan ha iba nga temporaryo nga naukoy ha weste ngan nagpapahimulos hin kagawasan ha pagsingba. Ginhahandom gud naton nga kon ini nga mga indibiduwal bumalik na ha ira mga lugar, magpapadayon hira ha pagpasanag han kalamrag han kamatuoran bisan ha mga lugar nga igindidiri an pagsangyaw.​—⁠Mateo 5:14-16.

“Itubyan Mo kan Jehova an Imo Agian”

14. Ano an ebidensya nga makakasarig kita kan Jehova?

¹⁴ Usa gud nga katalwasan an paghibaro nga an aton mga kabaraka ngan ginhuhunahuna naton nga mabug-at nga mga problema mahimo kuhaon! Paonan-o? “Itubyan mo kan Jehova an imo agian; sarig liwat ha iya,” siring ni David, nagdugang pa, “ngan iya iton pagbubuhaton.” (Salmo 37:5) Ha aton mga kongregasyon may-ada kita damu nga ebidensya nga makakasarig kita ha bulig ni Jehova. (Salmo 55:22) An ngatanan nga aada ha bug-os-panahon nga ministeryo sugad nga mga payunir, nagbibiyahe nga mga paramangno, mga misyonero, o mga boluntaryo nga nagtatrabaho ha Bethel, makakagpamatuod han pagkamasasarigan han pagmangno ni Jehova. Kay ano nga diri makiistorya ha mga kilala niyo nga aada ha bug-os-panahon nga pag-alagad ngan magpakiana kon paonan-o binubuligan hira ni Jehova? Sigurado nga makakabati ka hin damu nga mga eksperyensya nga nagpapakita nga bisan ha makuri nga mga panahon, an mabinuligon nga kamot ni Jehova diri gud halipot. Pirme hiya naghahatag han mga kinahanglanon ha kinabuhi.​—⁠Salmo 37:25; Mateo 6:25-34.

15. Paonan-o nasanag an pagkamatadong han katawohan han Dios?

¹⁵ Kon ginhihimo naton hi Jehova nga aton tinaporan ngan marig-on nga nasarig ha iya, makakaeksperyensya kita han dugang nga mga pulong han salmista: “Hiya magpapahayag han imo katadongan sugad han sugâ, ngan an imo pagkamatadong sugad han adlaw han pangudtohan.” (Salmo 37:6) Sugad nga mga Saksi ni Jehova, agsob nga sayop an pagkakilala ha aton han mga tawo. Kondi inaabrihan ni Jehova  an mga mata han mga tawo nga tangkod an kasingkasing basi buligan hira nga masabtan nga an aton ministeryo ha publiko ginpapagios han gugma kan Jehova ngan ha aton igkasitawo. Ha pariho nga panahon, diri maitatago an aton matadong nga paggawi, bisan kon sayop an pagkakilala ha aton han damu nga mga tawo. Hi Jehova nagpaparig-on ha aton ha ngatanan nga klase hin pagkontra ngan pagtimaraot. Sugad nga resulta, an pagkamatadong han katawohan han Dios nasanag sugad hin adlaw ha udto.​—⁠1 Pedro 2:12.

“Magpabilin nga Hilom . . . Maghulat nga May Paghingyap”

16, 17. Uyon ha Salmo 37:​7, yana an panahon para ha ano, ngan kay ano?

¹⁶ An sunod nga mga pulong han salmista amo an: “Magpabilin nga hilom ha atubangan ni Jehova ngan maghulat nga may paghingyap ha iya. Ayaw kasina ha bisan hin-o nga nagmamalampuson ha iya dalan, ha tawo nga nagbubuhat han iya mga panhunahuna.” (Salmo 37:​7, NW) Pinabubug-atan dinhi ni David an panginahanglan nga mapailubon nga maghulat kita kan Jehova nga gumios. Bisan kon diri pa naabot an kataposan hini nga sistema, diri ini sadang magin hinungdan ha pagreklamo. Diri ba nakikita naton nga mas labaw gud yana an kalooy ngan pagpailob ni Jehova kay ha siyahan nga paghunahuna naton hito? Maipapakita ba naton yana nga kita liwat mapailubon nga naghuhulat samtang nagpapadayon kita nga okupado ha pagsangyaw han maopay nga sumat antes umabot an kataposan? (Markos 13:10) Yana an panahon ha paglikay han waray-pagtagad nga mga paggios nga mahimo magwara ha aton han kalipay ngan espirituwal nga seguridad. Yana an panahon ha mas marig-on pa gud nga pag-ato ha nakakadaot nga impluwensya han kalibotan ni Satanas. Ngan yana an panahon nga tipigan an kaputli ha moral ngan diri gud ibutang ha peligro an aton matadong nga relasyon kan Jehova. Padayon nga isalikway naton an imoral nga mga panhunahuna ngan likyan an diri-angayan nga mga paggawi ha diri-kapariho ha sekso, o bisan ha kapariho ha sekso.​—⁠Kolosas 3:5.

¹⁷ “Bayai an kasina, ngan bayai an kangalas,” nagsasagdon ha aton hi David. “Diri ka magmasamdong, iton tikadto la ha pagbuhat hin maraot. Kay paglalaglagon an mga magburuhat hin maraot; kondi an mga nahulat kan Jehova, makakapanunod hira han tuna.” (Salmo 37:​8, 9) Oo, may pagsarig nga aton pamulaton an panahon​—⁠nga hirani na gud yana​—⁠kon wad-on na ni Jehova an ngatanan nga karaotan ha tuna ngan adton nagbubuhat hito.

“Diri Mag-iiha”

18, 19. Ano nga pagdasig an makakarawat mo tikang ha Salmo 37:10?

¹⁸ “Diri mag-iiha, ngan an mga magraot pagwawad-on: ngan imo pagsususihon hin maopay an iya kahimurutangan, ngan an maraot waray dida.” (Salmo 37:10) Nagdadasig gud ha aton iton nga mga pulong samtang nagtitikahirani na kita ha kataposan hini nga sistema ngan ha pungkay han nakakadaot nga pagbulag kan Jehova! Anoman nga klase han gobyerno o awtoridad nga hinimo han tawo pakyas gud. Ngan yana nagtitikahirani na kita ha panahon han pagbalik ngadto ha pagmando han Dios, an Ginhadian ni Jehova ha mga kamot ni Jesu-Kristo. Bug-os nga magmamando ito ha mga buruhaton ha kalibotan ngan bubungkagon hito an ngatanan nga mga nakontra ha Ginhadian han Dios.​—⁠Daniel 2:44.

¹⁹ Ha bag-o nga kalibotan ilarom han Ginhadian han Dios, bisan kon bilngon mo, diri ka makakaagi hin ‘usa nga maraot.’ Oo, bisan hin-o nga nakontra kan Jehova hiton nga panahon kukuhaon dayon. Waray makikita didto nga nakontra ha iya pagkasoberano o nadiri magpasakop ha awtoridad han Dios. An ngatanan nga imo mga amyaw magkakaurosa ha panhunahuna ha ira hingyap nga lipayon hi Jehova. Daku gud nga seguridad an resulta hito​—⁠waray na mga kandado, waray na mga trangka, waray na bisan ano nga makakadaot han bug-os nga pagsarig ngan kalipay!​—⁠Isaias 65:20; Mika 4:⁠4; 2 Pedro 3:13.

20, 21. (a) Hin-o an mga “maaghop” han Salmo 37:​11, ngan diin hira makakabiling hin “kahuraan han kamurayaw”? (b) Ano an makakarawat naton nga mga bendisyon kon subaron naton an Mas Bantogan nga David?

²⁰ Dida hito, “an maaghop makakapanunod han  tuna.” (Salmo 37:11a) Kondi hin-o ini nga mga “maaghop”? An pulong nga iginhubad nga “maaghop” nagtitikang ha pulong nga nangangahulogan hin “pagsakit, pagpaubos, pagtamay.” Oo, an mga “maaghop” amo adton mapainubsanon nga naghuhulat kan Jehova ha pagtadong han ngatanan nga kawaray-hustisya nga nagpapasakit ha ira. “Maglilipay hira tungod han kahuraan han kamurayaw.” (Salmo 37:11b) Bisan yana nakikita naton an hura nga kamurayawan ha espirituwal nga paraiso dida ha totoo nga Kristiano nga kongregasyon.

²¹ Bisan kon diri pa natatalwas ha mga kasakitan, binubuligan naton an usa kag usa ngan ginliliaw adton nasusubo. Sugad nga resulta, nakikita an totoo nga pagkakontento dida ha katawohan ni Jehova. An kabugtoan nga kalalakin-an nga pinili sugad nga mga magbarantay mahigugmaon nga nagmamangno ha aton espirituwal​—⁠ngan usahay ha pisikal pa ngani​—⁠nga mga panginahanglan, nga nabulig ha aton nga makailob han kasakitan tungod han pagkamatadong. (1 Tesalonika 2:​7, 11; 1 Pedro 5:​2, 3) Birilhon gud nga panag-iya ini nga kamurayawan! May-ada liwat kita paglaom ha kinabuhi nga waray kataposan ha mamurayawon nga Paraiso nga hirani na. Salit, hinaot subaron naton an Mas Bantogan nga David, hi Kristo Jesus, nga an kadasig para kan Jehova nagpagios ha iya nga mag-alagad nga matinumanon tubtob ha kataposan. (1 Pedro 2:21) Ha pagbuhat hito, padayon nga magigin malipayon kita, nga nagdadayaw ha usa nga aton nalilipayan, an aton Dios, hi Jehova.

[Footnote]

Mababaton Mo Ba?

• Ano nga mga leksyon an hinbaroan mo tikang ha Salmo 37:​1, 2?

• Paonan-o ka mahimo ‘maglipay kan Jehova’?

• Ano an ebidensya nga makakasarig kita kan Jehova?

[Mga Pakiana]

[Retrato ha pahina 9]

An mga Kristiano ‘diri naaawa ha mga nagbubuhat hin diri-matadong’

[Retrato ha pahina 10]

‘Sarig kan Jehova ngan buhata an maopay’

[Retrato ha pahina 11]

Malipay kan Jehova pinaagi han paghibaro hin damu pa gud mahitungod ha iya

[Retrato ha pahina 12]

“An maaghop makakapanunod han tuna”