Isaia 21:1-17
21 E parau faahaparaa i te medebara o te miti:*+
Te tae mai ra te ati mai te mataˈi vero mai apatoa mai,Mai te medebara mai, te hoê fenua riariahia.+
2 E orama riaria mau tei faatiahia ia ˈu:
Te taiva ra te taata taiva,Te vavahi ra te taata vavahi.
A pauma, e Elama! A haaati i te oire i ta oe nuu, e Medai!+
E faaore au i te mau autâ atoa ta ˈna i faatupu.+
3 No reira vau i hepohepo roa ˈi.*+
Ua roohia vau i te iriti,Mai to te vahine ia fanau.
E horuhoru roa ino vau no te faaroo atu.Ua peapea roa ino vau no te hiˈo atu.
4 Ua paruparu to ˈu aau. Ua hotaratarahia vau i te mehameha.
Te rûrû nei au no te toparaa mahana ta ˈu i tiai noa na.
5 A faanaho i te amuraa maa e te mau parahiraa!
A tamaa e a inu!+
A tia i nia, outou te huiarii, a faatahinu* i te paruru!
6 Teie hoi ta Iehova i parau mai ia ˈu:
“A haere, a tuu i te tahi taata moemoe, e ia faatia mai oia i ta ˈna e ite ra.”
7 Ite ihora oia i te tahi pereoo e e piti puaahorofenua,Te tahi pereoo asini,Te tahi pereoo kamela.
Ua mataitai maitai atu oia, ma te haapao maite.
8 Tuô ihora oia mai te liona:
“Te tia noa nei au i nia i te pare tiairaa ia ao, e Iehova,E e faaea vau i to ˈu vahi tiairaa i te mau po atoa.+
9 A hiˈo na eaha te haere mai nei:
E taata na nia i te pereoo tamaˈi hutihia e te puaahorofenua!”+
Tuô ihora oia:
“Ua topa oia! Ua topa o Babulonia!+
To raro te mau tii nanaˈohia o to ˈna mau atua, ua huˈahuˈa pauroa!”+
10 E to ˈu nunaa tei taataahihia,Te maa o* to ˈu vahi tairiiriraa huero maa,*+Ua faatia vau ia oe i ta ˈu i faaroo ia Iehova o te mau nuu,* te Atua o Iseraela.
11 E parau faahaparaa ia Duma:*
Te piihia mai nei au mai Seira mai:+
“Taata tiai, eaha ˈtura no teie po?
Taata tiai, eaha ˈtura no teie po?”
12 Parau ihora te taata tiai:
“Fatata te poipoi, e te ahiahi atoa.
Ia hinaaro outou e uiui, a uiui.
A hoˈi mai!”
13 E parau faahaparaa i te vahi papu pâpâmǎrô:
I roto i te uru raau i te vahi papu pâpâmǎrô e taoto ai oe,E te mau ratere no Dedana.+
14 A rave maa pape a afai atu ai na tei poihâ,Outou to te fenua o Têma,+E a hopoi i te faraoa na tei horo ê ra.
15 Ua horo ê hoi ratou i te ˈoˈe, te ˈoˈe tei tatarahia,I te fana tei faatôhia, e i te ino mau o te tamaˈi.
16 Teie hoi ta Iehova i parau mai ia ˈu: “I roto hoê noa matahiti, mai te mau matahiti o te taata tarahuhia,* e ore te hanahana taatoa o Kedara.+
17 E iti roa te toea o te feia teˈa i rotopu i te mau faehau no Kedara, na Iehova te Atua o Iseraela hoi i parau.”
Nota i raro i te api
^ E au ra e o te tuhaa fenua o Babulonia i tahito.
^ Heb: “i mauiui roa ˈi to ˈu tauupu.”
^ Heb: “faatavai.”
^ Heb: “tamaiti a.”
^ Aore ra “sabaota.”
^ “Mamû” te auraa.
^ Aore ra “taio-maitai-hia mai ta te taata tarahuhia e taio,” oia hoi hoê matahiti tia.
