Isaia 7:1-25
7 E i te mau mahana o Ahaza+ te tamaiti a Iotama te tamaiti a Uzia, te arii o Iuda, pauma maira te arii Rezina no Suria e te arii Peka+ no Iseraela, te tamaiti a Remalia, e aro ia Ierusalema, aita râ i noaa ia raua* ia haru i te reira.+
2 Faatiahia maira i te utuafare o Davida: “Ua apiti Suria ia Epheraima.”
Rûrû ihora te aau o Ahaza e te aau o to ˈna nunaa, mai te tumu raau o te uru raau e aueue i te mataˈi.
3 Parau maira Iehova ia Isaia: “A haere na e farerei ia Ahaza, oe e ta oe tamaiti o Seare-iasuba,*+ i te hopea o te faahororaa* pape o te pape hopu i nia,+ i pihai iho i te purumu rahi o te vahi raveraa ohipa a te taata puˈa ahu.
4 E parau oe ia ˈna: ‘A haapao maitai ia vai hau noa oe. Eiaha e mǎtaˈu, e eiaha to oe aau e toaruaru no tera nau tâpû raau ama ua fatata i te pau, no te riri uˈana o Rezina e Suria e te tamaiti a Remalia.+
5 Ua opua hoi Suria ratou Epheraima e te tamaiti a Remalia e hamani ino ia oe, a na ô ai:
6 “E pauma anaˈe e aro ia Iuda, e hahae* anaˈe ia ˈna, e haru anaˈe ia ˈna,* e e faatoroa anaˈe i te tamaiti a Tabeela ei arii i nia ia ˈna.”+
7 “‘Teie ta te Arii hau ê e Fatu ra o Iehova e parau ra:
“Eita e haere,Eita atoa e tupu.
8 O Damaseko hoi te oire pu o Suria,E o Rezina te arii o Damaseko.
I roto noa e 65 matahitiE purara roa ˈi Epheraima, a ore atu ai e parau-faahou-hia e nunaa.+
9 O Samaria te oire pu o Epheraima,+E o te tamaiti a Remalia te arii o Samaria.+
Aita anaˈe to outou e faaroo papu,Eita outou e mau papu.”’”
10 Paraparau noa maira Iehova ia Ahaza:
11 “A ani i te tahi tapao no ǒ mai ia Iehova to oe Atua.+ E nehenehe te reira e riro mai te Apoo* ra te hohonu, aore ra mai te raˈi ra te teitei.”
12 Na ô ihora râ Ahaza: “Eita vau e ani, eita atoa vau e tamata ia Iehova.”
13 Parau atura Isaia: “A faaroo mai na, e te huaai o Davida. Aita anei e navai ra ia tamata outou i te faaoromai o te taata? E tamata atoa anei ïa outou i te faaoromai o te Atua?+
14 No reira, na Iehova e horoa ia oe i te tahi tapao: Inaha, e hapû te vahine apî* e e fanau mai i te tahi tamaiti,+ e e topa oia ia ˈna i te iˈoa o Imanuela.*+
15 E amu oia i te pata e te meri i te taime oia e ite ai e nafea ia haapae i te ino e ia maiti i te maitai.
16 Hou hoi te tamaroa a ite ai i te haapae i te ino e i te maiti i te maitai, e faaruehia te fenua o na arii e piti ta oe e mǎtaˈu ra.+
17 E hopoi mai hoi Iehova i nia ia oe, to oe nunaa e te utuafare o to oe metua tane i te mau mahana fifi roa mai tei ore i faaruruhia mai te mahana mai â i taa ê ai Epheraima ia Iuda,+ e hopoi mai hoi oia i te arii o Asura.+
18 “I tera mahana, e hio Iehova i te raˈo na te mau taheraa pape atea o te Nile o Aiphiti e i te manu meri i te fenua o Asura,
19 e e tae mai ratou pauroa e e tau mai i nia i te taha o te mau peho, i te mau afâ mato, i te mau raau taratara atoa, e pauroa te vahi pape.
20 “I tera mahana, maoti te tahi hahu tarahuhia i te tuhaa fenua o te Anavai,* na roto i te arii o Asura,+ e hahu Iehova i te upoo e te avae, e e faaore-atoa-hia te huruhuru taa.
21 “I tera mahana, e tapea ora mai te taata i te puaatoro ufa apî o te nǎnǎ e e piti mamoe.
22 E no te rahi o te û, e amu oia i te pata, pauroa te taata e toe ra i nia i te fenua te amu i te pata e te meri.
23 “I tera mahana, i te mau vahi atoa i vai na na mua ˈˈe 1 000 tumu vine hoohia no 1 000 moni ario, e raau taratara noa e te zizania te tupu.
24 E haere te taata i reira ma te fana e te teˈa, no te mea e riro te fenua taatoa ei raau taratara e ei zizania.
25 E pauroa te mouˈa tei utaruhia na i te toˈi, eita oe e tapiri atu no te mǎtaˈu i te raau taratara e te zizania. E riro te reira ei vahi e amu ai te puaatoro i te aihere e ei taataahiraa na te mamoe.”
Nota i raro i te api
^ Huri-atoa-hia “ia ˈna.”
^ “Hoê toea noa te hoˈi” te auraa.
^ Aore ra “taheraa.”
^ Huri-atoa-hia “haamehameha.”
^ Aore ra “faaamaha anaˈe i to ˈna aua.” Heb: “vahi anaˈe ia ˈna.”
^ Aore ra “potii.”
^ “Tei ia tatou ra te Atua” te auraa.
^ Oia hoi Eupharate.
