Isaia 60:1-22
60 “A tia i nia, e tera vahine,+ a turama ˈtu, ua tae mai hoi to oe maramarama.
Te anaana ra te hanahana o Iehova i nia ia oe.+
2 Inaha hoi, e tapoˈi te poiri i te fenuaE te rumaruma rahi i te mau nunaa.Ei nia râ ia oe e anaana ˈi Iehova,E ei nia ia oe e itehia ˈi to ˈna hanahana.
3 E haere atu te mau nunaa i to oe ra maramarama+E te mau arii+ i to oe ra hanahana anaana.*+
4 A hiˈo i nia e a hiˈo ati aˈe!
Ua haaputuputuhia ratou pauroa. Te haere mai ra ratou ia oe.
Na te atea roa e haere noa mai ai ta oe mau tamaiti,+E ta oe mau tamahine e amohia ra i nia i te tauupu.+
5 I tera taime e ite ai oe e e anaana ˈi oe,+E e popou to oe aau e e î i te oaoa,No te mea ei ia oe e faataehia ˈi te faufaa a te moana.E tae mai te faufaa a te mau nunaa ia oe.+
6 E apǐ to oe fenua* i te nǎnǎ kamela,E oni apî no Midiana e no Epha.+
Pauroa to Seba te haere mai.E auro e e tapau libano ta ratou e hopoi mai.
E faaite ratou i te mau arueraa a Iehova.+
7 Pauroa te nǎnǎ no Kedara+ te haaputuputuhia i ǒ oe.
E tavini te mau mamoe oni no Nebaiota+ ia oe.
E haere mai te reira i ta ˈu fata ma te fariihia,+E e faanehenehe au i to ˈu fare hanahana.*+
8 O vai tera e rere ra mai te ata,Mai te uupa i to ratou fare?*
9 O vau hoi ta te mau motu e tiaturi.+To mua* te mau pahi no Taresisa,No te faauta mai i ta oe mau tamarii na te atea roa,+E ta ratou ario e ta ratou auro,I te iˈoa ra o Iehova to oe Atua e i Tei Moˈa o Iseraela,E faahanahana* hoi oia ia oe.+
10 E patu te feia ěê i to oe mau aua,E e tavini to ratou mau arii ia oe,+I roto i to ˈu riri rahi hoi ua tairi au ia oe,I to ˈu râ farii maitai* e aroha hamani maitai au ia oe.+
11 E matara noa to oe mau uputa.+Eita te reira e tapirihia ia ao aore ra ia po,Ia hopoihia mai te faufaa a te mau nunaa,E to mua to ratou mau arii.+
12 E mou hoi te mau nunaa e te mau faatereraa arii atoa o te ore e tavini ia oe,E e haamou-roa-hia tera mau nunaa.+
13 E tae mai te hanahana o Lebanona ia oe,+Te tumu berusi, te tumu tedara e te tumu tasura atoa,+No te faanehenehe i te vahi o to ˈu nao.*E faahanahana vau i te vahi no to ˈu avae.+
14 E haere mai te mau tamarii a tei haavî na ia oe e e piˈo ratou i mua ia oe.Pauroa tei faatura ore na ia oe, ia piˈo ïa i to oe pae avae,E ia pii ratou ia oe te oire o Iehova,O Ziona o Tei Moˈa o Iseraela.+
15 Noa ˈtu ua faarue au ia oe e ua hae te taata ia oe, e aita e taata mea na to oe vahi i te haere,+E faariro vau ia oe ei tumu no te haapeuraa mure ore,Ei tumu no te oaoa no te mau uˈi atoa.+
16 E e inu mau â oe i te û o te mau nunaa,+Ei nia i te ouma o te mau arii e hiihia ˈi oe.+E e ite mau â oe o vau o Iehova to oe Faaora,E Tei Puai o Iakoba, oia ïa Tei hoo mai ia oe.+
17 E ere te veo ta ˈu e hopoi mai, e auro râ,E e ere te auri ta ˈu e hopoi mai, e ario râ,E ere te raau, e veo râ,E e ere te ofai, e auri râ.E e faatoroa vau i te hau ei tiaau no oeE te parau-tia ei tiaau ohipa no oe.+
18 Eita e faaroo-faahou-hia te haavîraa uˈana i to oe fenuaAore ra te haamouraa e te ano i roto i to oe mau otia.+
E e pii oe i to oe mau aua Faaoraraa+ e to oe mau uputa Arueraa.
19 E ere faahou na te mahana e turama ia oe ia ao,E ere atoa na te anaana o te avaˈe e horoa i te maramarama no oe,E riro hoi Iehova ei maramarama mure ore no oe,+E to oe Atua ei nehenehe no oe.+
20 Eita to oe mahana e topa faahou,Eita atoa to oe avaˈe e pohe,E riro hoi Iehova ei maramarama mure ore no oe,+E ua hope te mau mahana o to oe otoraa.+
21 E e feia parau-tia anaˈe to oe mau taata atoa.E fatu ratou i te fenua e a muri noa ˈtu.
O ratou te ohi ta ˈu i tanu,Te ohipa a to ˈu rima,+ no te faanehenehe ia ˈu.+
22 E riro te mea iti ei tausaniE te mea nainai ei nunaa puai.
Na ˈu, o Iehova, e faatupu oioi i te reira i to ˈna taime.”
Nota i raro i te api
^ Aore ra “te anaana o to oe mahana e hiti ra.”
^ Heb: “oe.”
^ Aore ra “nehenehe.”
^ Aore ra “te mau apoo o te fare o te manu.”
^ Aore ra “Mai na mua ˈˈe ra.”
^ Aore ra “faanehenehe.”
^ Aore ra “hamani maitai.”
