Fetela kwa tshedimosetsong

Fetela go diteng

 THUTO 14

Lekgoba le le Neng la Ikobela Modimo

Lekgoba le le Neng la Ikobela Modimo

Josefa e ne e le mongwe wa bana ba ga Jakobe. Bomogoloe ba ne ba lemoga gore rraabone o ne a mo rata thata. O akanya gore seo se ne sa dira gore ba ikutlwe jang? Ba ne ba fufegela Josefa le go mo tlhoa. Fa Josefa a ne a lora dilo tse di sa tlwaelegang, o ne a di bolelela bomogoloe. Ba ne ba akanya gore ditoro tseo di kaya gore letsatsi lengwe ba tlile go mo obamela. Seo se ne sa dira gore ba mo tlhoe le go feta.

Letsatsi lengwe bomogoloe Josefa ba ne ba disitse dinku gaufi le motse wa Shekema. Jakobe o ne a romela Josefa gore a ye go ba tlhola. Ba ne ba mmona a tla a le kgakala mme ba raana ba re: ‘Raditoro ke yoo o etla. A re mmolayeng!’ Ba ne ba mo tshwara ba bo ba mo latlhela mo khuting e e boteng. Mme mongwe wa bone e bong Juda o ne a re: ‘Lo se ka lwa mmolaya! Bogolo a re mo rekiseng gore e nne lekgoba.’ Ka jalo, ba ne ba mo rekisa ka madi a tshipi a diselefera di le 20 ba mo rekisetsa bagwebi ba Bamidiana ba ba neng ba ya Egepeto.

Go tswa foo, bomogoloe Josefa ba ne ba ina seaparo sa gagwe mo mading a podi, ba bo ba se isa kwa go rraabone ba re: ‘A seno ga se seaparo sa ngwana wa gago?’ Jakobe o ne a akanya gore Josefa o bolailwe ke phologolo ya naga. Jakobe o ne a utlwile botlhoko thata. Go ne go se na ope yo o neng a ka mo gomotsa.

Fa Josefa a le kwa Egepeto, o ne a rekisediwa Kgosi Potifaro gore e nne lekgoba la gagwe. Mme Jehofa ga a ka a tlogela go thusa Josefa. Potifaro o ne a lemoga gore Josefa ke motho yo o ratang go bereka e bile o a ikanyega. Fa nako e ntse e ya, Potifaro o ne a dira gore e nne ene a tlhokomelang dilo tsotlhe tsa gagwe.

Mosadi wa ga Potifaro o ne a lemoga gore Josefa o ne a le montle  e bile a le maatla. Letsatsi le letsatsi o ne a kopa Josefa gore a tlhakanele dikobo le ene. Josefa o ne a tla dira eng? O ne a gana mme a re: ‘Nnyaa! Nka se kgone. Potifaro o a ntshepa, mme wena o mosadi wa gagwe. Fa nka tlhakanela dikobo le wena, ke tla bo ke leofela Modimo!’

Letsatsi lengwe mosadi wa ga Potifaro o ne a leka go pateletsa Josefa gore a tlhakanele dikobo le ene. O ne a mo phamola ka diaparo mme Josefa a tshaba. Fa Potifaro a boela gae, mosadi wa gagwe o ne a mmolelela gore Josefa o ne a mo tlhasetse. Mme o ne a bua maaka. Potifaro o ne a galefile thata mme a tsenya Josefa mo kgolegelong. Mme Jehofa ga a ka a lebala Josefa.

“Ikokobetseng kafa tlase ga seatla se se thata sa Modimo, gore a tle a lo godise mo nakong e e tshwanetseng.”—1 Petere 5:6