Bakorintha wa Ntlha 4:1-21

  • Balebedi ba tshwanetse go ikanyega (1-5)

  • Bakeresete ba tshwanetse go nna boikokobetso (6-13)

    • ‘Lo se ka lwa ya ka kwa ga se se kwadilweng’ (6)

    • Bakeresete ke selo sa go bogelwa (9)

  • Paulo o amegile ka batho ba a ba rutileng boammaaruri (14-21)

4  Re batla gore batho ba re tseye re le batlhanka ba ga Keresete le balebedi ba ba itsiseng diphiri tse di boitshepo tsa Modimo.+  Mo godimo ga moo, balebedi ba tshwanetse go ikanyega.  Jaanong ga go botlhokwa mo go kalo gore a ke atlholwa ke lona kgotsa ke baatlhodi.* Tota le nna ga ke ikatlhole.  Gonne ke a itse gore ga ke a dira sepe se se phoso. Le fa go ntse jalo, ga ke reye gore ke motho yo o siameng, mme Jehofa* ke ene yo o nkatlholang.+  Ka jalo, lo se ka lwa atlhola+ ope pele ga nako, emang go fitlha Morena a tla. O tla senola dilo tsa sephiri tse di mo lefifing a bo a dira gore se se mo dipelong tsa batho se itsiwe, mme go tswa foo mongwe le mongwe o tla bakwa ke Modimo.+  Jaanong bakaulengwe, ke buile dilo tseno ke dira sekai ka nna le Apolose+ go lo thusa gore lo ithute molao o o reng: “Lo se ka lwa ya ka kwa ga dilo tse di kwadilweng,” gore mongwe le mongwe a se ka a ikgogomosa+ a rata yo mongwe mme a sa rate yo mongwe.  Gonne ke eng se se dirang gore o farologane le yo mongwe? A Modimo ga se ene a go neileng sengwe le sengwe se o nang le sone?+ Fa e le gore o go neile dilo tsotlhe, ke ka ntlha yang fa o ikgantsha jaaka e kete o nnile le tsone ka maatla a gago?  A lo na le sengwe le sengwe se lo se tlhokang? A lo setse lo humile? A lo setse lo simolotse go busa lo le dikgosi kwantle ga rona?+ Ke eletsa gore lo ka bo lo simolotse go busa lo le dikgosi, gore le rona re tle re buse le lona re le dikgosi.+  Gonne go bonala e kete Modimo o dirile gore rona baaposetoloi re nne ba bofelo go atlholelwa loso fa pele ga batho botlhe,+ ka gonne re fetogile selo sa go bogelwa ke lefatshe,+ baengele le batho. 10  Re tsewa re le dieleele+ ka gonne re balatedi ba ga Keresete, mme lona lo itsaya lo le botlhale ka gonne lo balatedi ba ga Keresete; re bokoa, mme lona lo nonofile; lo a tlotlwa, mme rona re tseelwa kwa tlase. 11  Go tla go fitlha gone jaanong re nna re tshwerwe ke tlala,+ re nyorilwe,+ re sa apara, re itewa,+ re se na kwa re nnang teng 12  e bile re dira ka natla.+ Fa batho ba re sotla ka mafoko,* re bua le bone sentle;+ fa ba re bogisa, re a itshoka;+ 13  fa re senngwa leina, re araba ka bonolo;*+ go tla go fitlha jaanong, batho mo lefatsheng ba re tsaya jaaka matlakala, leswe la dilo tsotlhe. 14  Ga ke kwale dilo tseno go lo tlhabisa ditlhong, mme ke a lo tlhagisa ka gonne lo bana ba me ba ba rategang. 15  Gonne le fa lo ka tswa lo na le barutisi ba le 10 000 ba ba lo rutang go nna balatedi ba ga Keresete, ga lo na borre ba bantsi. Le fa go ntse jalo, ke nnile rraalona ka gonne ke ne ka lo tlisetsa dikgang tse di molemo ka ga Keresete Jesu.+ 16  Ka jalo, ke a lo kopa, latelang sekao sa me.+ 17  Ke gone ka moo ke romang Timotheo kwa go lona, ka gonne ke ngwanake yo o rategang le yo o ikanyegang mo Moreneng. O tla lo gopotsa tsela e ke dirang dilo ka yone mo tirong ya ga Keresete Jesu,+ fela jaaka ke e ruta phuthego nngwe le nngwe. 18  Bangwe ba a ikgogomosa ka gonne ba akanya gore ga ke tle kwa go lona. 19  Mme fa Jehofa* a rata, ke tla tla kwa go lona mo bogautshwaneng. Ke batla go bona batho bao ba ba ikgogomosang, mme e seng go utlwa gore ba reng mme go bona gore a ba na le maatla a Modimo kgotsa nnyaa. 20  Re bontsha gore re ikobela Bogosi Jwa Modimo ka se re se dirang e seng se re se buang, mme seno se bontsha gore re na le maatla a a tswang kwa Modimong. 21  Ke eng se lo se batlang? A ke tle kwa go lona ka thupa+ kgotsa ka lorato e bile ke le bonolo?

Dintlha Tse di Kwa Tlase

Kgotsa “kgotlatshekelo.”
Kgotsa “Fa re gobololwa.”
Seger., “re a rapela.”