Jobo 3:1-26
3 Ke ka mor’a sena Jobo a ileng a ahlamisa molomo ’me a qala ho rohaka letsatsi la hae.+
2 Joale Jobo a araba ’me a re:
3 “Letsatsi leo ke ileng ka tsoaloa+ ka lona le ke le timele,Le bosiu boo ka bona e mong a ileng a re, ‘Ho emotsoe monna ea shahlileng!’
4 Ha e le letsatsi leo, e ke e be lefifi.Molimo a se ke a le batla a le holimo,Kapa khanya e se ke ea le khantšetsa.
5 Botšo le moriti o lefifi li le nke.Leru la pula le lule holim ’a lona.Lintho tse fifatsang letsatsi li ke li le tšose.+
6 Bosiu boo—bo ke bo nkoe ke botšo;+Bo se ke ba ikutloa bo nyakaletse har’a matsatsi a selemo;Bo se ke ba kena palong ea likhoeli.
7 Bonang! Bosiu boo—bo ke bo fetohe bo se nang thuso;Mohoo oa thabo o se ke oa ba teng ka bona.+
8 Ba rohakang letsatsi ba ke ba bo rohake,Ba itokiselitseng ho tsosa Leviathane.+
9 Linaleli tsa meso ea bona li ke li fifale;Bo ke bo letele leseli ’me le se ke la e-ba teng;Bo se ke ba bona mahlaseli a mafube.
10 Etsoe ha boa ka ba koala mamati a mpa+ ea ’Mè,Kahoo bo patele mahlo a ka khathatso.
11 Ke hobane’ng ha ke sa ka ka shoa ha ke tsoa ka pōpelong?+Ke hobane’ng ha ke sa ka ka tsoa ka pōpelong ebe kea shoa?
12 Ke hobane’ng ha mangole a ile a nkamohela,Ke hobane’ng ha matsoele+ a ile a nkamohela e le hore nka anya?
13 Etsoe joale nka be ke robetse e le hore ke se ke ka khathatsoa;+Nka be ke robetse nakong eo; nka be ke phomotse+
14 Hammoho le marena le baeletsi ba lefatše,+Ba ikahelang masupi,+
15 Kapa hammoho le likhosana tse nang le khauta,Tse tlatsang matlo a tsona ka silevera;
16 Kapa, joaloka mpa e senyehileng+ e patehileng, nka be ke sa ka ka ba teng,Joaloka bana ba sa kang ba bona leseli.+
17 Ba khopo ba tlohetse pherekano moo,+Ba feletsoeng ke matla ba phomotse moo.+
18 Batšoaruoa ba lutse hammoho ka boiketlo;Ha e le hantle ha ba utloe lentsoe la ea ba qobellang ho sebetsa.+
19 Ba banyenyane le ba baholo ba moo ka ho tšoanang,+Lekhoba le lokolotsoe ho mong’a lona.
20 Ke hobane’ng ha a fa ea khathatsong leseli,A fa bao meea ea bona e utloileng bohloko bophelo?+
21 Ke hobane’ng ha ho e-na le ba letetseng lefu, ’me le le sieo,+Le hoja ba ntse ba le cheka ho feta ha ba cheka matlotlo a patiloeng?
22 Ba thabang ka nyakallo e fetisisang,Ba thaba kahobane ba fumana sebaka sa lepato.
23 [Ke hobane’ng ha a fa] monna ea shahlileng [leseli], eo tsela ea hae e patehileng,+Le eo Molimo a mo etsetsang lekhoakhoa?+
24 Etsoe ho feheloa ha ka ho tla pele ho lijo tsa ka,+Sello sa ho lumaela ha ka se tšoloha joaloka metsi;+
25 Kahobane ke tšabile ntho e tšabehang, ’me e nkoela holimo;Seo ke se tšohileng se tla ho ’na.+
26 Ha kea lula ke se na matšoenyeho, kapa hona hore ke lutse ke sa khathatsoe,Hape ha kea phomola, leha ho le joalo pherekano ea tla.”
