Layinki Saamueeli 9:1-13
-
Daawiti Memfibostera ammanamino baxille leellishi (1-13)
9 Hakkiinni Daawiti togo yii: “Yoonaataanira yee ammanamino baxille leellisheemmohu Saaooli mini giddonni gatino manchi nookka?”
2 Hatte yannara Saaooli mine soqqamannohu Siiba yinanni manchi no. Konnira insa iso Daawitiwa woshshitu; mooteno iso, “Siiba yinannihu ateeti?” yee xaꞌmi. Isino, “Ee, mootichaꞌya aneeti” yee qoli.
3 Moote lede, “Saaooli mini giddonni Maganunniha ammanamino baxille leellisheemmohu gatino manchi nooni?” yee xaꞌmi. Siibano, “Lamenta lekka naafinohu mittu Yoonaataani beetti no” yee qoli.
4 Mooteno iso, “Isi xa mama no?” yee xaꞌmi. Siibano, “Lodebaari yinanniwa Amieeli beetti Makiiri mine no” yee qoli.
5 Hakkiinni Moote Daawiti baychonkonni, iso haaꞌre abbanno gede Lodebaari yinanniwa Amieeli beetti Makiiri minira manna soy.
6 Saaooli beetti Yoonaataani beetti Memfiboste Daawitiwa dayti uulla gombisame uwe kumbuuli. Hakkiinni Daawiti, “Memfiboste!” yee woshshi. Isino, “Yee mootichaꞌya” yii.
7 Daawiti isira togo yii: “Annikki Yoonaataanira yee ammanamino baxille leellisheemmohena waajjitooti; ahaahikki Saaooli baatto baalano qoleemmohe; atino woꞌmanka woyte sagale* ledoꞌya itatto.”
8 Hatte yannara isi uulla kumbuule togo yii: “Ane gedeehura reyno woshichira kageeshshi danchumma assattoera ani soqqamaanchikki ayeti?”
9 Hakkiinni moote, Saaooli soqqamaanchira Siibara manna soye togo yii: “Saaoolihanna minisi manniha baalanka coye mootichikki beetti beettira oommo.
10 Ati, oosokkinna soqqamaanokki isira baatto loossinanni; hakkiinni baatto uytanno guma gamba assitine mootichikki beetti beettihu minisi mannira sagale ikkannonsa gede uytinanni. Mootichikki beetti beetti Memfiboste kayinni woꞌmanka woyte sagale ane ledo itanno.”
Siibara 15 oosonna 20 soqqamaano noosi.
11 Hakkiinni Siiba mootete, “Ani soqqamaanchikki mootichiꞌya hajajinoere baala asseemmo” yii. Hakko daafira Memfiboste mootete ooso gede ikke sagale Daawiti ledo iti.
12 Memfibosterano Miika yinannihu wedellichu beetti noosi; Siiba mine heedhannori baaluno Memfiboste soqqamaano ikkitu.
13 Memfibosteno woꞌmanka woyte sagale mootete ledo itanno daafira, Yerusaalamete heeꞌranno; isi lamenta lekka naafichaho.
Lekkaalliidi Qaagiishshuwa
^ Noo gedeenni tirriro, “daabbo.”
