Layinki Saamueeli 18:1-33
18 Hakkiinni Daawiti ledosi noo manna kiire insa aana kumunna xibbu roorroota shoomi.
2 Daawiti ledosi noo manna sase gaamo asse soy; umi gaamo Iyyoaabi massaganno gede,* layinki gaamo Iyyoaabi rodii Tsiruya beetti Abisa massaganno gede, sayikkita qole Geeti manchi Itay massaganno gede assi. Hakkiinni moote mannaho, “Anino ledoꞌne fuleemmo” yii.
3 Insa kayinni togo yitu: “Ati ledonke fula dihasiissannohe; ninke xoonqummoro insara ninkeri dixiwannonsa;* qoleno ninke giddo daratu reynummoro nafa insara mittoreno dilawannonsa; korkaatuno ati mittu ninke 10,000 rooratto. Hakko daafira ati katamaho gatte hasiisannonkere sokke kaaꞌlittonkero woyyanno.”
4 Mooteno, “Dancha lawe leelliꞌnere baala asseemmo” yii. Konnira moote katamu waalchi mule uurri; mannu baalunkuno xibbe xibbenna kume kume ikke fule haꞌri.
5 Hakkiinni moote Iyyoaabi, Abisanna Itay, “Anera yitine wedellicha Abeseloomi mararresi” yee hajaji. Moote roorroota baalaho Abeseloomi daafira konne coye coyiꞌri yannara baalunku manni macciishshanni no.
6 Mannuno Israeelete ledo xaadara xawo fuli; hakkiinni insa Efireemi dubbi giddo olantu.
7 Hakkiicho Daawiti soqqamaano Israeelete manna qeeltu; hakko barra olu goola ikkeenna 20,000 manni goofi.
8 Olu halaꞌlanni haꞌri. Hakko barra bise guddino manninni dubbu giddo goofino manni rooranno.
9 Gedensoonni Abeseloomi hedeweelcho Daawiti soqqamaanonni xaadi. Abeseloomi gaango gulufe haꞌranni heeꞌreenna, gaango lowo sinna afidhinote jawa haqqicho woroonni saꞌanna haqqicho Abeseloomi umi danancho amaddu; hakkiinni gaango saꞌe hadhuta isi iima* rarrae gati.
10 Hakkiinni mittu manchi lae Iyyoaabira, “Abeseloomi jawa haqqichora rarrae nooha laoommo!” yee kuli.
11 Iyyoaabino hakko manchira togo yii: “Laittona gante uulla tugoottokkihu mayraati? Hatto assoottoro, anino tonne birru saantenna qawatto eemmohehu baino.”
12 Manchu kayinni Iyyoaabira togo yii: “Kume birru saante uyniero nafa,* mootete beetti aana anga dikayseemmo; korkaatuno moote ate, Abisanna Itay, ‘Kiꞌne giddo mittuno wedellicha Abeseloomi kisoonke’ yee hajajanna macciishshinoommo.
13 Hajajama giwe heeshshosi hunummoro,* kuni coy mootetewiinni maaxame horo digatanno; atino gatisattoera didandaatto.”
14 Hatte yannara Iyyoaabi, “Kawiinni sae ate ledo keeshshe yanna diguxxeemmo!” yii. Hakko daafira isi sase maxxicha* haaꞌre Abeseloomi reyikkinni jawa haqqichora rarrae noohura ole gagaso* qasi.
15 Hakkiinni Iyyoaabiha olu bagado dukkinori tonne soqqamaano dagge Abeseloomi qasse shitu.
16 Iyyoaabino xurumba ufuufi; Israeele shorranni noo mannino agure higi; konni garinni Iyyoaabi manna hooli.
17 Insano Abeseloomi haadhe hadhe dubbu giddo nootera jawa balera tugge, aanaho jajjabba kinna duuntu. Israeele baalano xooqqe mine minensa hadhu.
18 Abeseloomi lubbote noo waro, “Suꞌmiꞌya hawamannokki gede assanno beetti dinoe” yee Mootete Xeichira* sooddicha qasiꞌrino. Hakko daafira isi sooddichaho suꞌma fushshi; konne sooddicha techo barri geeshsha Abeseloomi Hawulte yine woshshinanni.
19 Hakkiinni Saadooqi beetti Akimaꞌꞌaasi Iyyoaabira togo yii: “Yihowa moote diinnasi anganni gatise wolassinosi daafira, dodanni mare konne duduwo kuleemmosina fajjie ballo.”
20 Ikkollana Iyyoaabi togo yiisi: “Techo duduwo kulattohu ate diꞌꞌikkootto. Duduwo wole barra kulattosina; mootete beetti reyno daafira, techo dikulatto.”
21 Hakkiinni Iyyoaabi Kushi gobba* mancho, “Marte laoottore mootete kuli” yii. Kushi gobba manchino Iyyoaabira kumbuule kae dodanni haꞌri.
22 Saadooqi beetti Akimaꞌꞌaasi Iyyoaabira lede, “Dayrino dayro, anino Kushi gobba manchi ledo dodeemmo gede fajjie ballo” yii. Iyyoaabi kayinni, “Beettoꞌya, kulatto duduwi nookkiha mayra dodatto?” yii.
23 Xaano isi, “Dayrino dayro dodeemmona fajjie” yii. Iyyoaabino, “Maahoyyena dodixa!” yii. Akimaꞌꞌaasino Yordaanosi qoqqowo massitanno doogo amade dodanni Kushi gobba mancho balaxe sae haꞌri.
24 Hatte yannara Daawiti katamaho giddoydinna gobbaydi waalchi mereero ofolle no; agaraanchuno huxxu aana waalchoho aleenni seekkinoonni dargira* fuli. Isi alba hige laꞌꞌanno woyte, mittu manchi callisi dodanni nooha afi.
25 Konnira agaraanchu woshshe mootete kuli. Mooteno, “Isi callisi nooha ikkiro, duduwo haaꞌre dayno” yii. Manchuno iilla rahita,
26 agaraanchu dodanni nooha wole mancho lai. Hakkiinni agaraanchu waalcho agare nooha woshshe, “Kune wolu manchino callisi dodanni daanni no!” yii. Mooteno, “Kunino duduwo haaꞌre daynoha ikkanno” yii.
27 Agaraanchuno, “Umi manchi Saadooqi beetti Akimaꞌꞌaasi gede ikke dodanno” yii. Mooteno, “Isi dancha manchootina kawoote dancha duduwolla haaꞌre dayno” yii.
28 Akimaꞌꞌaasino moote woshshe, “Baalunkuri keereholla!” yii. Hakkunni gedensaanni isi uulla gombisame mootete kumbuuli. Hakkiinni isi, “Mootichiꞌyara finqilino manna* angasira sayse uynohu Maganikki Yihowa maassamo!” yii.
29 Ikkirono moote, “Wedellichu Abeseloomi keere no?” yee xaꞌmi. Akimaꞌꞌaasino, “Iyyoaabi mootete soqqamaanchonna ane soqqamaanchokki soy woyte, lowo manni koocanna laoommo; kayinni may makkinoro diafoommo” yii.
30 Mooteno, “Maahoyyena kaꞌa higge shiqqi yite uurri” yii. Isino kaꞌa hige shiqqi yee uurri.
31 Hakkiinni Kushi gobba manchi daye togo yii: “Mootichiꞌyara abboommo duduwi konneeti: Techo Yihowa atera finqilino manni baalu anganni gatise wolassinohe.”
32 Ikkollana moote Kushi gobba mancho, “Wedellichu Abeseloomi keere no?” yii. Kushi gobba manchino, “Mootichiꞌya diinna baalanna ate gawajjate kaꞌinori baalu hakko wedellichi gede ikkito!” yii.
33 Mooteno tennera lowo geeshsha dadilli; isi waalchoho aleenni noo kifile fule kawa kaꞌa haꞌramanni togo yaanni wiꞌli: “Beettoꞌya Abeseloomi, beettoꞌya, beettoꞌya Abeseloomi! May ate darga anilla reyo; beettoꞌya Abeseloomi, beettoꞌya!”
Lekkaalliidi Qaagiishshuwa
^ Noo gedeenni tirriro, “Iyyoaabi anga wori.”
^ Noo gedeenni tirriro, “wodanansa ninkewa diqoltanno.”
^ Noo gedeenni tirriro, “gordunna baattote mereero.”
^ Noo gedeenni tirriro, “hoowiꞌyara worre keenniro nafa.”
^ Woy “gano gane lubbosi hunummoro.”
^ “Digaana, urde” yaano ikkara dandaanno. Noo gedeenni tirriro, “siqqo.”
^ Noo gedeenni tirriro, “wodana.”
^ Woy “Xeichaamu Xawira.”
^ Woy “Itiyophiyu.”
^ Woy “sagannate.”
^ Noo gedeenni tirriro, “anga kaysino manna.”
