Layinki Saamueeli 10:1-19
-
Amoonootunna Sooriyootu qeelantu (1-19)
10 Gedensoonni, Amooni moote reyenna beettisi Hanuuni isi darga moohi.
2 Hatte yannara Daawiti, “Annisi ammanamino baxille leellishinoe daafira, anino Nahaashi beetti Hanuunira ammanamino baxille leellisheemmosi” yii. Konnira Daawiti annasi shiiꞌrinohura sheshifachishshasira soqqamaanosi isiwa soy. Ikkollana Daawiti soqqamaano Amoonootu gobba iillituta,
3 Amoonootu roorrooti mootichinsa Hanuunira togo yitu: “Daawiti sheshifachishannohe manna soynohu annakki ayirrisanno daafira lawihe? Isi soqqamaanosi soynohu, katama seekkite laꞌara, qottaranna uullate gantara diꞌꞌikkino?”
4 Hakko daafira Hanuuni Daawiti soqqamaano haaꞌre ereedansa gama darate meedi; uddanonsano ofollaanchu geeshsha mure insa haꞌrisi.
5 Daawitino tenne macciishshiti soqqamaanosiwa wole manna soy; korkaatuno insa lowo geeshsha saalfatte no; konnira moote insa, “Ereediꞌne lopha geeshsha Iyyaarkote keeshshe; hakkiinni galagaltine higginannina” yii.
6 Yannate gedensaanni Amoonootu Daawiti boshshiꞌre giwinonsata affuti, manna sokke Beeti-rehoobi heeꞌrannohu Sooriyu manninna Tsoobahi heeꞌrannohu Sooriyu manni giddonni 20,000 lekkatenni hadhanno olanto, Maꞌꞌaaka moote 1,000 manni ledonna Ishixoobinni* 12,000 manna qaxadhitu.
7 Daawitino tenne macciishshiti, insa ledo olantanno gede Iyyoaabinna olanto baala wolqaataamu mannisi ledo soy.
8 Amoonootuno fulte katamu waalchi xullichira olaho qixxaabbe agartu; Tsoobahinna Rehoobi heeꞌrannohu Sooriyu manni qole Ishixoobinna* Maꞌꞌaaka manni ledo xawoho qixxaawe agari.
9 Iyyoaabi diinu olanto iso qassara albaanninna badheenni dagganni noota afiti, Israeelete giddonni no yinoonni olanto doore Sooriyu ledo olantanno gede assi.
10 Gattinore kayinni rodiisi Abisa hajajanna Amoonootu ledo olantanno gede assi.
11 Hakkiinni Iyyoaabi togo yii: “Sooriyu manni wolqisiero, ati dagge kaaꞌlattoe; Amoonootu wolqissuhero kayinni ani daye kaaꞌleemmohe.
12 Manninkeranna Maganinke katammara yine jawaatootanna worbuulle ikka hasiissannonke; Yihowano dancha lawe leellisire assanno.”
13 Hakkiinni Iyyoaabinna mannisi Sooriyu ledo olamara shiqqi yee dayta, insa albinsanni xooqqe baꞌu.
14 Amoonootu Sooriyu manni xooqinota affuti, insano Abisa albinni xooqqe katama eꞌu. Iyyoaabino Amoonoota qase higiti Yerusaalame day.
15 Sooriyu manni Israeele qeeltinonsata afiti, galagale mitteenni gamba yii.
16 Konnira Hadaadiezeri Lagu* mule noohu Sooriyu mannira sokka soy; insano Hadaadiezerihu olantote roorrichi Shobaaki massagannansa Heelaami daggu.
17 Daawitira tenne kullisita isi baychonkonni Israeele baala gamba asse Yordaanoosi tayse Heelaami day. Sooriyu mannino qixxaawe daye Daawiti ledo olami.
18 Ikkollana Sooriyu manni Israeelete albinni xooqi; Daawitino Sooriyu manni giddonni saragalla gulufinoha 700 mannanna 40,000 faradaasine shii. Qoleno isi olantonsa roorricha Shobaaki qase hakko shii.
19 Hadaadiezeri soqqamaano ikkitino mootoolla baala Israeele qeeltinonsata affuti, baychonkonni Israeelete ledo keere kalaqqe insara maahoyye yite galtu; hatte yannanni kayse Sooriyu manni Amoonoota kaaꞌla waajji.
