Layinki Saamueeli 11:1-27
11 Diru hanafora* mootoolla olaho fultanno yannara, Daawiti Amoonoota qassanno gede Iyyoaabi, soqqamaanosinna Israeelete olanto baala soy; insano Raaba doyissite amaddu; hatte yannara Daawiti Yerusaalamete gati.
2 Mitto hashsha* Daawiti daallasisinni kae mootete minira mineho aanaanni seekkinoonni darga* kawanna kaꞌa haꞌramanni no. Isi mineho aanaanni seekkinoonni darga* heeꞌre mitte mancho biso hayishshidhanna lai; ise lowo geeshsha xumate.
3 Daawitino manchote ewelumma xaꞌmara sokkaancho soy. Sokkaanchuno, “Mancho Hitichu Ooriyo minaama Eeliyaami beetto Bersaabehiiti” yee kulisi.
4 Hakkiinni Daawiti ise abbanno gede manna soy. Konnira ise Daawitiwa eꞌu; isino ledose goxi. (Kuni ikkinohu ise battesenni iseneeto keereensidhanni heedheennaati.*) Hakkunni gedensaanni ise minisera higgu.
5 Manchono godobbu; hakkiinni ise, “Godowu gatinoe” yite Daawitira sokka sokku.
6 Hatte yannara Daawiti, “Hiticha Ooriyo anewa soy” yee Iyyoaabiwa sokka soy. Hakko daafira Iyyoaabi Ooriyo Daawitiwa soy.
7 Ooriyo Daawitiwa dayta Daawiti iso, Iyyoaabinna olanto keere nooro hattono olu hiittootiro xaꞌmi.
8 Hakkiinni Daawiti Ooriyo, “Hadhe minekki fooliishshiꞌri”* yii. Ooriyono mootete mininni fule haꞌrita, moote soyanno afansha* sonkisi.
9 Ooriyo kayinni wole mootichisi soqqamaano baalate ledo mootete mini xullichira goxi; isi minisira dihaꞌrino.
10 Hakko daafira Daawitira, “Ooriyo minisira dihaꞌrino” yine kullisi. Daawitino Ooriyo, “Haꞌroottowiinni higoottohu dixaatilla? Minikkira haꞌroottokkihu mayraati?” yii.
11 Ooriyono Daawitira togo yee qoli: “Taawootu hattono Israeeletenna Yihudu olanto daaseho no; mootichiꞌya Iyyoaabinna mootichiꞌya soqqamaanono xawoho mullawa no. Ikkina ani itammoranna agammora hattono galteꞌya ledo goxammora miniꞌyara mayra haꞌro? Heeshshonniha ikkakkinni* xaareemmona, konne coye horo diasseemmo!”
12 Hakkiinni Daawiti Ooriyo, “Techono kowiicho keeshshi; gaꞌa haꞌrattona” yiisi. Hakko daafira Ooriyo hakko barranna aananno barra Yerusaalamete keeshshi.
13 Daawitino Ooriyo ledosi itaranna agara woshshi; hakkiinni dimba geeshsha aganno gede assi. Ooriyo kayinni hashsha minisira haꞌra agure mootichisi soqqamaano ledo gali.
14 Soodita Daawiti sokka borreesse Ooriyo Iyyoaabira massanno gede assi.
15 Isi togo yee borreessino: “Ooriyo olu goola ikkino widoonni albaanni sayisse wori. Hakkiinni iso qanseenna reyanno gede kiꞌne badhe higgine xooqqe.”
16 Iyyoaabi katama seekke laino; isi wolqaataamma olanto noo baycho afino daafira, Ooriyo albaanni sayse wori.
17 Katamu manni fule Iyyoaabi ledo olamita Daawiti soqqamaano giddonni gamu reytu; Hitichu Ooriyono rey.
18 Hakkiinni Iyyoaabi Daawitira olu daafira kulanno gede sokkaancho soy.
19 Isi sokkaancho togo yee hajaji: “Mootete olu daafira baalankare kulittohu gedensaanni,
20 moote hanqe togo yaahera dandaanno: ‘Olantini yannara katamunniwa gamba yitinoonnihu mayraati? Insa huxxu guunxora heedhe maxxa oltannoꞌneta diaffinoonni?
21 Yerubesheeti beetto Abemeleeki shiinohu ayeti? Iso Teebeetsi huxxu guunxora heedhe aanasi daammi-beetto tugge mitte mancho dishitino? Ikkina kiꞌne huxxunniwa togo gamba yitinoonnihu mayraati?’ Hakkiinni, ‘Soqqamaanchikki Hitichu Ooriyono reyno’ yite kulisi.”
22 Konnira sokkaanchu haꞌre Iyyoaabi hajajinosire baalankare Daawitira kuli.
23 Sokkaanchuno Daawitira togo yii: “Manninsa wolqisinonke; qoleno ninke qasara xawo dayno; ninke kayinni insa katamu waalchi xullichi geeshsha shorrinoommo.
24 Digaana amaddinori huxxu guunxora heedhe soqqamaanokkira maxxa oltino; hakkiinni mootete soqqamaano giddonni gamu reytino; soqqamaanchikki Hitichu Ooriyono reyno.”
25 Hatte yannara Daawiti sokkaancho togo yii: “Iyyoaabira togo yite kuli: ‘Wonanni bise aye egemmitannoro anfoonnikki daafira, kuni coy yaachishoonkehe. Jawaatte olante katama qasi.’ Atino iso jawaachishisi.”
26 Ooriyo minaama minaannise Ooriyo reynota macciishshituti, isira wiꞌlitu.
27 Wiꞌla gooffanni heedheennanni, Daawiti ise minisira haaꞌre abbanno gede manna soy; iseno galtesi ikkitu; labbaa qaaqqono iltusi. Ikkollana Daawiti assinori Yihowa baasa dadillisino.*
Lekkaalliidi Qaagiishshuwa
^ Badheessu woggara yaate.
^ Woy “hawarro.”
^ Woy “sagannatete.”
^ Woy “sagannatete.”
^ Godowu dayennase battaabbinoha ikkara dandaanno.
^ Noo gedeenni tirriro, “lekka hayishshiꞌri.”
^ Woy “mootete qeecha.” Mittu manchi ayirradu wosinchisira soyanno qeechaati.
^ Woy “lubbokkinni.”
^ Noo gedeenni tirriro, “Yihowa albaanni busha coye assino.”
