Layinki Saamueeli 7:1-29
7 Moote minesi* teese heeꞌri yannaranna Yihowa qooxeessisira heedhanno diinna baalantenni fooliishshiishisi yannara,
2 isi masaalaanchu Naataanira togo yii: “Halaalaanchu Magani Taawooti dunkaanu giddo heeꞌreenna, kuneeti ani daguwunni minnoonni minira heeꞌranni noommo.”
3 Naataanino mootete, “Yihowa ledokki noo daafira, hadhe wodanikkira noore baala assi” yee qoli.
4 Hakko hashsha Yihowa qaali Naataaniwa daye togo yii:
5 “Hadhe soqqamaanchiꞌya Daawitira togo yite kuli: ‘Yihowa togo yaanno: “Ati anera heeꞌreemmo mine mina hasiissannohe?
6 Israeele Gibitsetenni fushshummo barrinni kayse techo geeshsha, baychunni baycho saeemmohu* dunkaanunninna xaadooshshu dunkaaninniiti ikkinnina mine heeꞌre diegennoommo.
7 Israeelete* ledo haꞌrummo yanna baalantera, mannaꞌya Israeele allaaltara shoomoommori gaꞌrete massagaano giddonni ‘Daguwunni mine mayra dimintinoonnie?’ yee egennoommohu nooni?”’
8 Xaano soqqamaanchiꞌya Daawitira togo yii: ‘Olantote mootichi Yihowa togo yaanno: “Qanchoho hoshsha towaattanni noottoha abbe, manniꞌya Israeelete massagaancho assoommohe.
9 Anino haꞌrittowa baalawa ledokki ikkeemmo; diinnakki baalano albikkinni huneemmo;* qoleno suꞌmakki uullate aana noohu ayirradu manni suꞌmi gede maccaha asseemmo.
10 Manniꞌya Israeelete heedhanno darga eemmonsa; insa hakko teesse heedhanno; xaate masisannonsari diheeꞌranno; insa albi gede bushu manni digadadisannonsa;
11 mannaꞌya Israeele, insa aana ejjeetto shoomummo barrinni kayinse gadadinsoonninsa. Anino diinnakki baalantenni fooliishshiisheemmohe.
“‘“Qoleno Yihowa mine* minannoheta, Yihowa umisi kulinohe.
12 Dirikki goofeenna annuwakki ledo fooliishshiꞌratto yannara, ate gedensaanni atewiinni fulannoha sirchokki kayseemmo; gashshootesino kaajjisheemmo.
13 Suꞌmiꞌyara ayirrinye abbanno mine minannoehu isooti; anino gashshootisi zuufaane hegerera kaajjisheemmo.
14 Ani anna ikkeemmosi; isino beettoꞌya ikkanno. Isi sao assanno woyte, mannu siqqonni hattono mannu ooso* halangenni seejjeemmosi.
15 Ammanamino baxille woꞌmanka woyte leellisheemmosi; albikkinni hoolummoha Saaooli agurummo gede tuge diagureemmosi.
16 Minikkinna gashshootikki albakkiinni hegerera kaajje heeꞌranno; zuufaanekkino geedonnita ikkitanno.””’
17 Naataanino Daawitira konne coye baalanna tenne ajuuja gudise kulisi.
18 Hatte yannara Moote Daawiti daye Yihowa albaanni ofolle togo yii: “Woꞌmunkura Aliidi Mooticha Yihowaꞌya, isi ani ayeti? Tenne baala assattoera maateꞌya hiitteeti?
19 Woꞌmunkura Aliidi Mooticha Yihowaꞌya, tenne calla ikkikkinni soqqamaanchikki mini daafira albillitte ikkannoreno kulootto; Woꞌmunkura Aliidi Mooticha Yihowaꞌya, kuni mannu sirchira baalaho uynoonni biddishshaati.*
20 Soqqamaanchikki Daawiti hige kawiinni sae mayyee afanno? Woꞌmunkura Aliidi Mooticha Yihowaꞌya, ati ane seekkite egennoottoe.
21 Coyiꞌrootto qaalira yite wodanikki ledo sumuu yaanno garinni,* konne jawa coye assootto; qoleno soqqamaanchikkira xawisootto.
22 Woꞌmunkura Aliidi Mooticha Yihowaꞌya, ati addinta jawaho. Ate gedeehu dino; ate agurranna wolu Magani dino; maccankenni macciishshinoommori baalu tenne buuxisanno.
23 Uullate aana mannikki Israeelete gedeeti wole daga nooni? Maganu mare insara jajjabbanna dhagge ikkanno coye asse hattono suꞌmisi egennamanno gede asse, mannasi asse woxxinonsa. Gibitsete gobbanni woxxootto mannikkira yite, daganna magannansa shorrootto.
24 Mannakki Israeele hegerera umikki manna assiꞌrootto; Yihowaꞌya atino Maganonsa ikkitto.
25 “Maganoꞌya Yihowa, soqqamaanchikkiranna minisira eootto qaale hegerera wonshi; qaale eootto garinnino assi.
26 Mannu, ‘Olantote mootichi Yihowa Israeelete Maganooti’ yaanno gede, suꞌmikki hegerera gotti gotti yoo; soqqamaanchikki Daawiti minino albakkiinni kaajje heeꞌro.
27 Israeelete Magano olantote mooticha Yihowa, ‘Atera mine* mineemmohe’ yite soqqamaanchikkira ajuuja leellishoottosi. Soqqamaanchikki tenne huuccatto huucciꞌrate worbimma* afiꞌrinohu iseraati.
28 Xaano Woꞌmunkura Aliidi Mooticha Yihowaꞌya, ati halaalaancho Maganooti; qaalikkino halaaleho; qoleno soqqamaanchikkira konne dancha coye aattosira qaale eootto.
29 Konnira soqqamaanchikki mine maassiꞌri ballo; albakkiinnino hegerera kaajje heeꞌro; korkaatuno Woꞌmunkura Aliidi Mooticha Yihowaꞌya, ati umikki qaale eootto; atootikkinni soqqamaanchikki mini hegerera maassamo.”
Lekkaalliidi Qaagiishshuwa
^ Woy “mootete mine.”
^ Noo gedeenni tirriro, “qaafeemmohu.”
^ Noo gedeenni tirriro, “Israeelennite labballi ooso.”
^ Noo gedeenni tirriro, “mureemmo.”
^ Moote ikkannoha Daawiti sircho leellishanno.
^ “Addaami” yaano ikkara dandaanno.
^ Woy “seeraati.”
^ Woy “fajjokki ledo sumuu yaanno garinni.”
^ Moote ikkannoha Daawiti sircho leellishanno.
^ Noo gedeenni tirriro, “wodana.”
