Layinki Saamueeli 23:1-39
23 Daawiti goofimarchoho coyiꞌrino coy konneeti:
“Gotti gotti assinoonnisi manchi coyiꞌrino qaale;Yaaqoobi Magani buudhinohu,Israeelete faarso dancha gede faarsannohu,*Issey beetti Daawiti coyiꞌrinore.
2 Yihowa ayyaani ane widoonni coyiꞌri;Qaalisi arrawiꞌyara no.
3 Israeelete Magani coyiꞌri;Israeelennihu gaaꞌlinannihu Jawu Kinchi togo yiie:
‘Mannu ooso gashshannohu keeraancho ikkiro,Magano waajjatenni gashshanno woyte,
4 Arrishsho fultanno woyte heeꞌrannohu soodo xawaabbi gede,Gomichu nookki soodo gede ikkanno.
Baatto hayisso fushshitanno gede assannohu,Xeena ganihu gedensaanni fulannohu waraꞌa yiinohu arrishshote xawaabbi gedeeti.’
5 Ane mini Maganu albaanni hattooha diꞌꞌikkino?
Korkaatuno isi ane ledo hegere gondooro eino;Kuni gondoori soorramannokkihonna addaxxinanniho.
Korkaatuno kuni gondoori anera gatoꞌyaatinna hagiirreꞌyaati;Isi miniꞌya latanno gede assannohu diꞌꞌiseraati?
6 Tidhinokki manna baala citu gede tunge hunnanni;Korkaatuno insa mulla anganni gamba assa didandiinanni.
7 Mittu manchi cita kisanno woyte,Siwiilu uduunne qodhanna urde amaxxa hasiissannosi;Konne cita noowa heeꞌreenna coꞌo assine giira hasiissanno.”
8 Daawitiri wolqaataamma olamaasine suꞌmi aane nooho: Sase olamaasinera albisu Tahikimonaawicha Yosheebi-bashebeetiiti. Isi urdesinni mitte hige 800 saꞌꞌanno manna shiino.
9 Layinkihu Ahoohi beetti Doodo beetti Aliaazaariiti; Daawiti ledo noori sase wolqaataamma olamaasine Filisxeemoota qacifattu yannara insa ledo noohu mittu isooti. Filisxeemootu hakko olaho gamba yite no; hakkiinni Israeelete manni badhe hige xooqita,
10 isi uurrinowiinni milli miliqqino yiikkinni, angasi shaqqita geeshshanna bise angasira qaꞌmidha geeshsha Filisxeemoota waxaaxo gani. Hakko daafira Yihowa hakko barra Israeelete lowo qeelle* uy; mannuno shinoonni manna mulqiꞌrara isira badheenni hige day.
11 Sayikkihu kayinni Hararichu Aage beetto Shaamahiiti. Filisxeemootu missira winxoonni baattora Leehi yinanniwa gamba yitu; mannuno Filisxeemootu albinni xooqi.
12 Isi kayinni gatu mereero uurrinowiinni milli miliqqi yiikkinni baatto horrinannikki gede gaaramino; Filisxeemootano qasino; hakko daafira Yihowa Israeelete lowo qeelle* abbino.
13 Midote yannara, 30 massagaano giddonni sasu Daawiti noowa Adulaami goda hadhu; hatte yannara mitte Filisxeemete gaamo Refaymi Xeichira* dukkaꞌnite no.
14 Hatte yannara Daawiti qiishote giddo no; Filisxeemete olantono Beetelihemete no.
15 Hakkiinni Daawiti togo yee hasattosi kuli: “Beetelihemete waalchi mule noo buenni may waa afiꞌrella ago!”
16 Hatte yannara sase wolqaataamma olamaasine Filisxeemete qacha tayisse saꞌe hadhe, Beetelihemete waalchi mule noo buenni waa hinkiilte Daawitira abbitusi; isi kayinni aga giwe Yihowa albaanni uulla duni.
17 Isi togo yii: “Yihowaꞌya, togo assa heda nafa dihedeemmoreeti! Heeshshonsa* qarru giddo tuge haꞌrino manni mundee aga hasiissannoe?” Hakko daafira isi aga giwi. Sase wolqaataamma olamaasine assitino coy konneeti.
18 Tsiruya beetti Iyyoaabi rodii Abisa wolu sasu manni albisaati; isi urdesinni 300 manna shiino; isino sasu wolqaataammi gede maccaha ikki.
19 Isi sasu wolqaataamminni roore egennaminohanna roorrichansa ikkirono, umiri sasu manni afidhino geeshshi biilloonye diafiꞌrino.
20 Yoodahe beetti Benayahi Qabitsieeli lowoha bareendete looso loosinoho worba manchooti.* Isi Moaabichu Arieelita lame labballi ooso shiino; qoleno kaade dirritanni heedheenna mitte way balewa mare doobbiicho shiino.
21 Qoleno mitto jigeessa Gibitsete mancho shiino. Gibitsete manchi anga urde adhe nooha ikkirono, isi kayinni siqqo calla adhe mare Gibitsichu anganni urdesi haaꞌre isenni qase shii.
22 Yoodahe beetti Benayahi assino coy konneeti; isi sase wolqaataamma olamaano gede macca mancho ikkino.
23 Isi sajjuunku wolqaataamminni roore egennaminoha ikkirono, sasunku manni afidhino geeshshi biilloonye diafiꞌrino. Ikkirono Daawiti iso agaraanosira roorricha asse shoominosi.
24 Sajjoo bareeda olamaasine giddo gamu aante nooreeti: Iyyoaabi rodii Asaheeli, Beetelihemete manchi Doodo beetti Elihanaani,
25 Haroodaawichu Shaamahi, Haroodaawichu Eliiqa,
26 Phaleexichu Heleetsi, Teqoichu Iqeeshi beetti Iira,
27 Anaatootichu Abieezeri, Huushaawichu Mebunay,
28 Ahoohichu Tsalmooni, Nexofichu Mahaaray,
29 Nexofichu Baꞌꞌaanahi beetti Heleebi, Biiniyaami gobbara Gibia ilaminohu Riibay beetti Itay,
30 Phiraatoonichu Benayahi, Gaꞌꞌaashi moolu lagichira heeꞌrannohu Hiiday,
31 Arabichu Abii-alboni, Bahuriimichu Azimaaweeti,
32 Shaꞌꞌalibiimichu Eeliyaahiba, Yaasheni ooso Yoonaataani,
33 Hararichu Shaamahi, Hararichu Shaarari beetti Ahiaami,
34 Maꞌꞌaakaatichu beetti, Ahaasibay beetti Elfeleeti, Giilotichu Akixoofeeli beetti Eeliyaami,
35 Qermeloosichu Hetsiro, Arawichu Paꞌꞌaaray,
36 Tsoobahichu Naataani beetti Yigiaali, Gaadichu Baani,
37 Amoonichu Tseleqi, Tsiruya beetti Iyyoaabira bagado duhannohu Beꞌꞌeerootichu Naharay,
38 Yitirichu Iira, Yitirichu Gareebi,
39 hattono Hitichu Ooriyo; mitteenni 37 ikkitanno.
