Layinki Saamueeli 17:1-29
17 Hakkiinni Akixoofeeli Abeseloomira togo yii: “Techo hashsha 12,000 manna doore, Daawiti shorreemmona fajjie ballo.
2 Isi daafurenna wolqa bae heeꞌreenna* mare aanasi bala tugeemmo; ledosi noo manni baaluno xooqe goofeenna, moote calla qaseemmo.
3 Hakkiinni manna baala atewa qoleemmo. Ati hassanni nootto manchi reyro, mannisi baalu atewa hige keere afiꞌranno.”
4 Tenne hedo Abeseloominna Israeelete cimeeyye baala baxxu.
5 Ikkollana Abeseloomi, “Hanni Arkaawicha Kuusi woshshe; isi yaannoreno macciishshineemmona” yii.
6 Konnira Kuusi Abeseloomiwa day. Hakkiinni Abeseloomi isira, “Tini Akixoofeeli amaaleeti. Isi yiinore assino? Kaꞌa woyte maa assineemmoro kulinke” yii.
7 Kuusino Abeseloomira, “Tenne yannara nafa Akixoofeeli amaale dancha diꞌꞌikkitino!” yii.
8 Kuusi lede togo yii: “Annikkinna mannisi wolqaataamma olamaano ikkitinotanna xawoho oososi hooginohu dibi yinanni moychi* gede waajjishshannore* ikkitinota seekkite afootto. Annikki qole olamaanchoho; isi hashsha mannu ledo digalanno.
9 Kawoote isi xa godu* giddo woy wole baycho maaxame no; isi balaxe bala tugiro, tenne macciishshitannori ‘Abeseloomi haꞌrunsanno manni qeelamino!’ yitanno.
10 Doobbiichu gedee bareedi nafa waajje quubbi yaanno; korkaatuno Israeelete manni baalu annikki wolqaataamo olamaancho ikkinotanna ledosi noo mannino worbuulle ikkinota afino.
11 Ani togo yee amaaleemmohe: Daaninni Bersaabehi geeshsha noohu baaru gami shaafi gede batiꞌrinohu Israeelete manni baalu, atewa gamba yaanno gede assi; atino insa olaho haadhe fuli.
12 Iso eiwa eꞌne qanseemmo; loju baatto amadannohu gede ikkine aanaho dirrineemmosi; isino ledosi noo manni giddonni mittuno digatanno.
13 Isi xooqe katama eiro, Israeele baala hakko katamira siiwo ganteenna shiimu kinchi nafa gatikkinni goshoonshe xeichoho hunneemmo.”
14 Hakkiinni Abeseloominna Israeelete manni baalu, “Arkaawichu Kuusi amaale Akixoofeeli amaalenni woyyitanno!” yii. Korkaatuno Yihowa dancha Akixoofeeli amaale shuffitanno gede assara murciꞌrino. Yihowa hatto assinohu Abeseloomira bao abbara yeeti.
15 Gedensoonni Kuusi, kakkalaanchu Saadooqiranna Abiyaataarira, Akixoofeeli Abeseloominna Israeelete cimeeyye amaalino amaalenna isi umisi amaalino amaale kulinsa.
16 Qoleno isi, “Daawitira rakkine sokka sokkine togo yitine qorophisiisse yiinsa: ‘Techo hashsha halalla noo lawora* galtooti; hatteentenni Yordaanoosi tayisse sai; hakkunni kaꞌa mootenna ledosi noo manni baalu coꞌo yee goofanno.’”*
17 Yoonaataaninna Akimaꞌꞌaasi Yerusaalamete katamira gobbaanni Eni-roogeeli keeshshitu; insa hatto assitinohu mannu laꞌꞌannonke yiteeti; hakko daafira mitte soqqamaancho marte, insara baalare kultu; insano mootete kultara hadhu.
18 Ikkollana insa mittu wedellichi lae Abeseloomira kuli; hakko daafira lamunku baychonkonni xooqqe Bahuriimi heeꞌrannohu mittu manchi minira hadhu; isira hoowete giddo way bale noosi. Insano hatte bale giddora eꞌu;
19 manchu galteno balete afiira hocco dibbe aanaho gide haggu; kayinni tenne daafira afinohu dino.
20 Abeseloomi soqqamaano manchote minira dagge, “Akimaꞌꞌaasinna Yoonaataani mama no?” yite xaꞌmitu. Manchono, “Waa tayisse saꞌe hadhino” yite qoltu. Hakkiinni mannootu insa hassanni hadhu; kayinni diaffino; hakko daafira agurte Yerusaalame higgu.
21 Insa hadhuhu gedensaanni, Akimaꞌꞌaasinna Yoonaataani balete giddonni fulte Moote Daawitiwa marte tenne kultusi. Insa Akixoofeeli ganino gano kultusihu gedensaanni, “Rakkine laga tayissine hadhe” yitu.
22 Daawitinna ledosi noo manni baalu baychonkonni kae Yordaanoosi tayse sai. Duuꞌmo saaqqa geeshsha Yordaanoosi tayse sainokkihu mittu manchino dino.
23 Akixoofeeli malisi seynokkita afiti, harricho koodhe katamaho noo minisira haꞌri. Isi minisi mannira biddishsha uyhu gedensaanni, qalxiꞌri. Konnira isi reyenna annuwasi waammawa madaarri.
24 Hatte mereero Daawiti Mahanaymi haꞌri; Abeseloomino Israeelete manni baalu ledo Yordaanoosi tayse sai.
25 Abeseloomi Iyyoaabi darga Ameesay olantote hajajaancho asse wori; Ameesay Israeelichu Yitira beettooti; Yitira Iyyoaabi ama Tsiruya rodoo Nahaashi beetto Abigaeeli fiixaati.
26 Israeelenna Abeseloomi Giiliyaadi gobbara dukkaꞌnitu.
27 Daawiti Mahanaymi dayta, Amoonootu katami Raabanni Nahaashi beetti Shobay, Lodebaarinni Amieeli beetti Makiirinna Roogiliiminni Giiliyaadichu Berzeeli
28 daallassa, gawatta, dorunni seekkinoonni uduunne, sinde, hayxe, bullee, xoxxoo, baaqeela, missira, duꞌrinshoonni shoye,
29 malawo, buuro, geꞌreewonna burbuxxo* haadhe abbitu. Insa konne baala abbitinohu, “Halalla mannu hudiꞌrinoha, daafurinohanna gooꞌrinoha ikkara dandaanno” yite heddino daafira, Daawitinna ledosi noo manni itaraati.
