Layinki Saamueeli 24:1-25
24 Daawiti, “Hadhe Israeeletenna Yihudu manna kiiri” yee kakkaysisi woyte, Yihowa hanqi galagale Israeelete aana buwi.
2 Konnira moote ledosi nooha olantote hajajaancho Iyyoaabi togo yii: “Hadhine mannu kiiro afeemmo gede, Daaninni kayse Bersaabehi geeshsha noote baalante Israeelete gaꞌre giddonni manna kiirre.”
3 Iyyoaabi kayinni moote togo yii: “Maganikki Yihowa manna 100 ero batiso; mootichiꞌyano tenne illesinni lao; kayinni mootichiꞌya tenne assa hasiꞌrinohu mayraati?”
4 Ikkollana moote coyiꞌrinori Iyyoaabinna olantote hajajaano qeeli. Hakko daafira Iyyoaabinna olantote hajajaano Israeelete manna kiirtara mootete albinni fulte hadhu.
5 Insano Yordaanoosi tayisse saꞌe xeichu* mereero katamaho qiniiteenni* Aroeeri dukkaꞌnitu; hakkiinni Gaadi manniwanna Yaazeeri yinanniwa hadhu.
6 Gedensoonni Giiliyaadinna Tahitiimi-hodiishi gobba hadhu; hakkiinni Daani-yeaani hadhe doyte Sidooni iillitu.
7 Hakkiinni Xiroosi qiisho hattono Hiwootunna Kanaanootu katamma baala hadhu; jeefote insa Yihudaho Negeebi noote Bersaabehi yinanniwa daggu.
8 Konni garinni insa gobba baala hadhe honsu aganinna 20 barri gedensaanni Yerusaalame higgu.
9 Hakkiinni Iyyoaabi mannu kiiro mootete kulisi. Israeelete, bise qodhitinori 800,000 olamaano no; Yihudu manni kayinni 500,000 ikkanno.
10 Ikkollana Daawiti manna kiirihu gedensaanni tiiꞌꞌisi* bushiishisi. Hakkiinni Daawiti Yihowa togo yii: “Konne coye assaꞌyanni jawa cubbo loosoommo. Konnira Yihowaꞌya ballo, soqqamaanchikki sao aguri; korkaatuno gowwimmate looso loosoommo.”
11 Daawiti soodo kaꞌꞌanno woyte, Yihowa qaali Daawitira ajuuja laꞌꞌannohu masaalaanchu Gaadiwa daye togo yii:
12 “Daawitiwa marte togo yii: ‘Yihowa, “Sase doorsha oommohe. Ate aana abbeemmo gede mitto doodhi” yaanno.’”
13 Hakko daafira Gaadi Daawitiwa eꞌꞌe togo yii: “Lamala diro gobbakkira hude ubburonso, sase agana diinnakki shorritannahe xooqqanni heeꞌrittoronso, sase barra gobbakkira fayya ubburo woyyanno? Xa soynoehura mayyee qoleemmoro seekkite hedi.”
14 Konnira Daawiti Gaadira togo yii: “Tini lowo geeshsha yaachishshinoe. Maarosi jawa ikkitino daafira, Yihowa anga umbummoro woyyanno; mannu anga uweemmo gede assitootie ballo.”
15 Hakkiinni Yihowa soodonni kayse murroonni yanna iillita geeshsha Israeelete fayya soy; konnira Daaninni Bersaabehi geeshsha 70,000 manni goofi.
16 Sokkaasinchu Yerusaalame hunara anga diriirsita, Yihowa iillitino baonni gaabbi;* hakkiinni isi mannaho bao abbanni noo sokkaasinchira, “Xaate ikkinona angakki dirrisi!” yii. Hatte yannara Yihowa sokkaasinchi Iyyaabuusichu Arewuna ayiddumme mule uurre no.
17 Daawiti manna gudanni noo sokkaasincho laiti Yihowa togo yii: “Cubbo loosoommohu aneeti; sao assoommohuno aneeti; ikkina kuni geꞌreewi ma hunino? Eeggatena anenna anniꞌya mine calla qorichishi.”
18 Konnira Gaadi hakko barra Daawitiwa eꞌꞌe, “Marte Iyyaabuusichu Arewuna ayiddummera Yihowara kakkalote darga seekki” yiisi.
19 Hakko daafira Daawiti Gaadi kulinosi garinni Yihowa hajajinosire assara fule haꞌri.
20 Arewuna eela hige laꞌꞌanno woyte, mootenna soqqamaanosi isiwa higge dagganni noore afi; isino baychonkonni fule mootete albaanni uwe kumbuuli.
21 Arewuna, “Mootichiꞌya soqqamaanchisiwa daynohu mayraati?” yee xaꞌmi. Daawitino, “Mannu aana dirranni noo qoomami uurranno gede, Yihowara kakkalote darga seekkammora ayiddummekki hidhammora dayommo” yee qoli.
22 Arewuna kayinni Daawitira togo yii: “Mootichiꞌya ayiddumme adhe dancha lawe leellisire shiqishona. Shilqote kakkalora ikkitanno saada kuneeti; woowanchunna* qambaruno giira giidhate ikkanno.
23 Mootichaꞌya, ani Arewuna konne coye baala mootete oommo.” Hakkiinni Arewuna moote, “Maganikki Yihowa maassiꞌrohe” yii.
24 Ikkollana moote Arewunara togo yii: “Deeꞌni, atewiinni baate adha hasiissannoe. Baatummokkinni adhoommoha Maganiꞌya Yihowara shilqote kakkalo asse dishiqisheemmo.” Hakko daafira Daawiti ayiddummenna saada 50 birru seqilenni* hidhi.
25 Isino hakko kakkalote darga seekke Yihowara shilqote kakkalonna mittimmate kakkalo shiqishi. Hakkiinni Yihowa baattote daafira huuccinoonni huuccatto macciishshi; Israeelete aana dirranni noo qoomamino uurri.
