Layinki Saamueeli 8:1-18
8 Yannate gedensaanni Daawiti Filisxeemoota qase qeeli; Meteegi-aamahino angansanni adhi.
2 Moaabootano qase qeeli; hakkiinni insa uulla kare siiwotenni bikki. Isi hatto assinohu bikkeenna lame siiwo ikkiha shaaraati; mitte siiwo ikkiha qole shiikkinni aguraraati. Hakkiinni Moaabootu Daawiti soqqamaano ikkitu; isirano giwire uytusi.
3 Rehoobi beetti, Tsoobahi moote Hadaadiezeri Efiraaxisi Lagi mule noo qoqqowo galagale amadara haꞌranni heeꞌreenna Daawiti iso qase qeeli.
4 Daawiti isire 1,700 faradaasinenna 20,000 lekkatenni hadhanno olanto qafadi. Hakkiinni Daawiti 100 saragalla calla gatise wole baalaho dagaadonsa muri.
5 Demaasqote heeꞌrannohu Sooriyu manni Tsoobahi moote Hadaadiezeri kaaꞌlara dayta, Daawiti 22,000 Sooriyu manna waxaaxo ganino.
6 Hakkiinni Daawiti Sooriyaho Demaasqote olantote qacha qixxeessi; Sooriyu manni Daawiti soqqamaano ikke, isira giwire uy. Yihowano Daawitira mariwa baalawa qeelle* uysi.
7 Hatteeno agurranna Daawiti, Hadaadiezeri soqqamaanowiinni qunqumadda culku wonquwa haaꞌre Yerusaalame abbi.
8 Qoleno Moote Daawiti Bexahinna Beroota yinanniri Hadaadiezeri katammanni lowo camo adhi.
9 Hakkiinni Hamaati moote Tou Daawiti Hadaadiezeri olanto baala qeelinota macciishshi.
10 Hakko daafira Tou, Moote Daawiti keere afaranna Hadaadiezeri ledo olame qeelino daafira hagiidhinota kulara isiwa beettosi Yooraami soy (korkaatuno Hadaadiezeri Tou ledo duucha hige olamino); Yooraamino birrunni, culkunninna camotenni seekkinoonni uduunne haaꞌre Daawitira abbi.
11 Moote Daawiti konne uduunne, qase qeelino daga baalatewiinni haaꞌre qulleessino birrinna culki ledo Yihowara qulleessi.*
12 Kuni uduunni isi Sooriyunni, Moaabinni, Amoonootuwiinni, Filisxeemootuwiinni, Amaaleeqootuwiinninna Rehoobi beetti Tsoobahi moote Hadaadiezeriwiinni qafade abbinoho.
13 Daawiti Maxinete Xeichira 18,000 Edoomoota qase higi yannara maccaha ikki.
14 Isi Edoomi gobba baalate olantote qacha qixxeessi; Edoomootu baalunkuno Daawiti soqqamaano ikkitu. Yihowano Daawitira mariwa baalawa qeelle uysi.*
15 Daawiti Israeele baalate moote ikke gashshanni mannisira baalaho taashshonna keeraanchimma abbi.
16 Tsiruya beetti Iyyoaabi olantosi hajajaanchooti; Ahiluudi beetti Iyyoosaafiixi kayinni xaggete borreessaanchooti.
17 Akixuubi beetti Saadooqinna Abiyaataari beetti Ahimeleeki kakkalaanote; Seerayahi kayinni borreessaanchoho.
18 Yoodahe beetti Benayahi, Keritaawootunna Pheleetootu hajajaanchooti; Daawitiri labballi oosono qara soqqamaasine* ikkitu.
