Layinki Saamueeli 20:1-26
20 Hatte yannara Biiniyaamichu Bikiiri beetti Saaba yinannihu bushu* manchi no. Isi xurumba ufuufe, “Ninkera Daawiti ledo mittu qeechino dinonke; Issey beetti ledono xaadu dinonke. Israeelete manna, mittu mittunku magannaꞌnewa* higge!” yii.
2 Konnira Israeelete manni baalu Daawiti haꞌrunsa agure, Bikiiri beetto Saaba haꞌrunsi; Yihudu manni kayinni Yordaanoosinni kayse Yerusaalamete geeshsha mootensawiinni dibaxxino.
3 Daawiti Yerusaalamete noo minesi* higiti, mine agarara wore haꞌrinoha tonne irkote meentosi abbe agaraasine agartanno mine wori. Isi insara sagale shiqishannonsaha ikkirono, ledonsa goxe horo dieginnino. Insara minaanninsa lubbote nooha ikkirono, insa rey barri geeshsha gunnoota ikke heeꞌrino.
4 Moote Ameesayra togo yii: “Yihudu manna sasu barri giddo woshshite anewa gamba assi; atino gattooti.”
5 Hakko daafira Ameesay Yihudu manna woshshara haꞌri; ikkollana isi moote yiino barrinni dihigino.
6 Hakkiinni Daawiti Abisara togo yii: “Bikiiri beetti Saaba Abeseloominni roore gawajjankera dandaanno. Isi qiinshoonni katamma afiꞌre ninkewiinni xooqe gatannokki gede, mootichikki soqqamaano adhite iso shorri.”
7 Hakko daafira Iyyoaabi manni, Keritaawootu, Pheleetootunna wolqaataamu manni baalu iso shorranni haꞌri; insa Bikiiri beetto Saaba shorritanni Yerusaalametenni hadhu.
8 Insa Gebaooni noohuwa jawu kinchiwa iillituta, Ameesay insanni xaadara day. Iyyoaabi olu uduunne uddiꞌre, bise kou giddo wore halloho qodhe no. Isi alba hige haꞌrita bise fulte ubbu.
9 Iyyoaabi Ameesay, “Rodooꞌya keere nootto?” yii. Hakkiinni Iyyoaabi sunqannosiha lawe qiniiticho angasinni Ameesay ereeda amadi.
10 Ameesay Iyyoaabi anga noo bise diqorophino; hakkiinni Iyyoaabi bisetenni godowasi qaseenna hellee duꞌnantu. Isi layinki nafa assikkinni mitte hige qase shiino. Hakkiinni Iyyoaabinna rodiisi Abisa Bikiiri beetto Saaba shorritanni hadhu.
11 Iyyoaabi manni giddonni mittu Ameesay mule uurre, “Iyyoaabi wido ikkinohunna Daawitiha ikkinohu baalu Iyyoaabi haꞌrunso!” yii.
12 Hatte yannara Ameesay doogote mereeroho dana mundeetenni bainohu mitu fittifatanni no. Manchuno, mannu baalu hakkira iillanno woyte uurranna laiti, Ameesay doogotenni hoole xawoho masse wori. Xaano mannu hakkira iillanno woyte uurranni noota laiti, aanaho uddano diwi.
13 Isi Ameesay doogotenni hoolihu gedensaanni, mannu baalu Bikiiri beetto Saaba shorrara Iyyoaabi hoode haꞌri.
14 Saaba Israeelete gaꞌre baalate widoonni sae Beeti-maꞌꞌaaka noo Aabeeli haꞌri. Bikiriyaawootuno gamba yite isi hoode hadhu.
15 Iyyoaabinna mannisi* daye Saaba Beeti-maꞌꞌaaka Aabeeli doyisse amadi; katamahono bushsha duuni; katamuno bushshu mereero no. Iyyoaabi ledo noo manni baaluno katamu huxxa tugara woriido uma hanafi.
16 Hakkiinni mitte hayyitte mancho katamunni fulte huurose naggi assite, “Manna, hanni macciishshe, macciishshe! Eeggatena Iyyoaabira, ‘Kuleemmaheri noona kawira amo’ yitine kullesi” yitu.
17 Hakkiinni isi manchonniwa mari; iseno, “Iyyoaabi ateeti?” yite xaꞌmitusi. Isino, “Ee aneeti” yee qoli. Hakkiinni ise, “Soqqamaanchokki yitannore macciishshi” yitu. Isino, “Macciishsheemmona kuliexa” yii.
18 Hakkiinni ise togo yitu: “Biꞌre mannu, ‘Qarriꞌnera mala hasidhiniro Aabeeli katama hadhine amaaꞌle’ yaanno; mannuno qarrinsara mala afiꞌranno.
19 Ani Israeelenniha keere baxannohanna ammanamino manna riqiweemmate. Ati Israeelete giddo amate gede ikkino katama hunattora kaootto. Yihowa ragge hunate* kaoottohu mayraati?”
20 Iyyoaabino togo yee qoli: “Ani katama hunateno diigateno horo dihedoommo.
21 Coy dihattooti. Kayinni Efireemihu ilaalaamu qooxeessinni daynohu Bikiiri beetti Saaba Moote Daawitira finqilino.* Konne mancho angaꞌyara sayissine uytiniero, konne katama agure haꞌreemmo.” Hakkiinni mancho Iyyoaabira, “Konni manchi umo huxxaho aanaanni qolle tungannihena!” yitu.
22 Hayyitte mancho baychonkonni mannu baalunniwa hadhu; insano Bikiiri beetti Saaba umo murte Iyyoaabira tuggu. Hakkiinni Iyyoaabi xurumba ufuufi; mannuno katamunni fule raga baala billaalle mine minensa haꞌri; Iyyoaabino mootenniwa Yerusaalame higi.
23 Iyyoaabi Israeelete olanto baalate hajajaanchoho; Yoodahe beetti Benayahi kayinni Keritaawootahonna Pheleetootaho aliidiho.
24 Adooraami mootete loossara woshshinoonnirira aliidiho; Ahiluudi beetti Iyyoosaafiixi kayinni xaggete borreessaanchooti.
25 Shaawe borreessaanchoho; Saadooqinna Abiyaataari kakkalaanote.
26 Yaiirichu Iira kayinni Daawitira qara soqqamaancho* ikke soqqamanno.
