Layinki Saamueeli 22:1-51
22 Daawiti, Yihowa diinnasi baalate anganninna Saaooli anganni gatisisi barra, Yihowara tenne faarso faarsi.
2 Isi togo yee faarsino:
“Yihowa qiishoꞌyaatinna goloꞌyaati; gatisannoehuno isooti.
3 Maganiꞌya gaaꞌleemmo kinchoꞌyaati;Isi wonqoꞌyaati, gatote buudaꞌyaatinna* addaxxeemmo goloꞌyaati;Xooqe maaxameemmo baychoꞌyaati, gatisaanchoꞌyaati; finqilletenni gatisattoehu ateeti.
4 Guweenyu hasiisannosiha Yihowa woshshiꞌreemmo;Diinnaꞌya angannino gateemmo.
5 Reyote dambali doyisse amadinoe;Tidhinokki manni lolahu gede shabbarsinoe.
6 Waammate* siiwo aanaho xaaxantinoe;Reyote woshshaadono amaddinoe.
7 Yaaddo amaddue yannara Yihowa woshshiꞌrummo;Maganoꞌya hige hige woshshiꞌrummo;
Isino qullaawa minesi heeꞌre huuroꞌya macciishshi;Kaaꞌlo afiꞌrate raareemmo raare isiwa iillitu.
8 Baatto huxidhe shafama hanaffu;Gordu safono milli yitu;Isi hanqino daafira daaqqu.
9 Sanosinni wiliile fultu;Afiisinnino ittanno giira fultu;Buwanno kashili isiwiinni fuli.
10 Isi uullara dirriti, gordu heeshshi yaanno gede assi;Lekkasira woroonnino tunsino gomichi no.
11 Isi kirubeelete aana ofolle buuwanni day.
Ayyaanu* qoolla aana heeꞌre leelli.
12 Hakkiinni tunsicho gaangaawisira dukko assiꞌri;Tunsichoho wayinna kolishshu gomichi woꞌmino.
13 Albasiinni noo xawaabbinni kashilu fuli.
14 Hakkiinni Yihowa gordoho heeꞌre beleqi;Woꞌmunkura Aliidihu huurosi macciishshiishi.
15 Maxxichasi ole diinnasi billaallisi;Banqote beleqinnino gurcheessinsa.
16 Yihowa rufita,Sanosi giddonni fulino foorarinni,Baaru hundi leelli; baattote safono reqecci yitu.
17 Isi iima heeꞌre angasi diriirse amadie;Diimete way giddonnino fushshie.
18 Isi wolqaataamma diinnaꞌya anganni gatisinoe;Anenni roore jawaatoota ikkitinori gibbannoeriwiinni gargare gatisinoe.
19 Insa yaaddote uwummo barra ane aana kaꞌu;Yihowa kayinni irko ikkinoe.
20 Teense heeꞌnanni darga* abbinoe;Anenni hagiidhino daafira gatisinoe.
21 Yihowa keeraanchimmaꞌya garinni baꞌraasannoe;Angaꞌya keeraanchimma* garinnino qolannoe.
22 Korkaatuno Yihowa doogo agadhoommo;Maganoꞌya agure bushare diassoommo.
23 Yoosi baala albaꞌyaanni no;Wodhosino dixeiseemmo.
24 Albasiinni minshe nookkiha ikke heeꞌreemmo;Cubbo loosano qoropheemmo.
25 Yihowa keeraanchimmaꞌya garinni,Coꞌichimmaꞌya garinnino qolannoe.
26 Ammanamino manchira atino ammanamoottoha ikkatto;Minshe noosikkihu wolqaataamu manchira, minshe nookkiha ikkatto.
27 Coꞌichu manchira atino coꞌicha ikkatto;Shokkashshu manchira kayinni busule* ikkoottota leellishatto.
28 Korkaatuno umonsa heeshshi assitannore gatisatto;Illekki kayinni booꞌnaleeyye laꞌanno; atino shollishattonsa.
29 Yihowaꞌya, ati caabbichoꞌyaati;Tunsichoꞌya xawisannohu Yihowaati.
30 Ate kaaꞌlonni horranno diina qeeleemmo;Maganiꞌya wolqanni, qiisho kubbe saeemmo.
31 Halaalaanchu Magani doogo guutate;Yihowa qaali filaminoho;
Isi golo assidhannosirira baalaho wonqonsaati.
32 Yihowa agurranna wolu Magani nooni?
Maganonke agurranna goꞌlinannihu jawu kinchi ayeti?
33 Halaalaanchu Magani kaajjado qiishoꞌyaati;Isi doogoꞌyano guuta assanno.
34 Isi lekkaꞌya geedimunnite gede assanno;Gotti yiino dargano uurrisannoe.
35 Angaꞌya olaho qajeelsanno;Cigileꞌyano camote digaana bedeeda dandiitanno.
36 Gatote wonqokki aattoe;Umo heeshshi assattoha ikkakkino jawa assitannoe.
37 Qaafoꞌyara doogo halashshattoe;Lekkaꞌyano* dishalaqqanno.
38 Diinnaꞌya shorre gudeemmo;Insa coꞌo yite gooffa geeshsha agure dihigeemmo.
39 Higgeno higgannokki gede coꞌo asse gudeemmonsa; qoleno cancaneemmonsa;Insano lekkaꞌyara woroonni ubbanno.
40 Olaho jawaante aattoe;Diinnaꞌya lekkaꞌyara woroonni karatto.
41 Diinnaꞌya anewiinni xooqqanno gede assatto;*Anino gibbannoere huneemmo.*
42 Insa kaaꞌlo afiꞌrate raartanno; gatisannonsahu kayinni diheeꞌranno;Yihowawa higge nafa raartanno; isi kayinni diqolannonsa.
43 Baattote aana noo buko gede asse maniisseemmonsa;Dooggate aana noo sabbi gede asse kakkadeemmonsa; hattono lilleemmonsa.
44 Soꞌro xinqisiisiꞌranno manniꞌyawiinni gatisattoe.
Dagate umo ikkeemmo gede agarattoe;Egennoommokki mannino soqqamannoe.
45 Wole gobba manni saalfate albiꞌyara shiqanno;Ane daafira macciishshe hajajamannoe.*
46 Wole gobba manni wolqa baꞌꞌanno;*Qiishonsa giddonni huxiꞌranni fulanno.
47 Yihowa heeshshonniho! Gaaꞌleemmohu Jawu Kinchiꞌya maassamo!
Gatisannoehu jawu kinchi Maganiꞌya gotti gotti yoo.
48 Halaalaanchu Magani rabba qolannoe;Dagano anera woroonni galtanno gede assanno;
49 Isi diinnaꞌya anganni gatisannoe.
Gawajjitannoerira aleenni qole gotti gotti assannoe;Finqilu manchi anganni gatisattoe.
50 Yihowaꞌya, dagate mereero galaxxeemmohehu iseraati;Suꞌmikkirano togo yee guweenyu faarso faarseemmo:*
51 Isi mootesira jawa qeelle aanno;Buudhinohurano ammanamino baxille leellishanno;Daawitiranna sirchisira hegerera konne baxille leellishanno.”
Lekkaalliidi Qaagiishshuwa
^ Qaallate Tiro lai. Woy “wolqaataamo gatisaanchoꞌyaati.”
^ Woy “Sioolete.” Qaallate Tiro lai.
^ Woy “bubbete.”
^ Woy “halaꞌlado darga.”
^ Noo gedeenni tirriro, “coꞌichimma.”
^ “Gowwu gede ikkatto” yaano ikkara dandaanno.
^ Woy “soodo miqichiꞌya.”
^ Woy “diinnaꞌya badhe aattoe.”
^ Noo gedeenni tirriro, “sammi asseemmo.”
^ Noo gedeenni tirriro, “macca macciishshitinorinni hajajantannoe.”
^ Woy “maniidhanno.”
^ Woy “muuziiqa gananni faarseemmo.”
