Layinki Saamueeli 21:1-22
21 Daawiti moohe noo yannara sase diro woꞌma hude ubbu; hakko daafira Daawiti Yihowa amaaꞌlita Yihowano togo yee qoli: “Saaooli Gebaooni manna shiino daafira, isiranna minisi mannira mundeete shedi noonsa.”
2 Hakko daafira moote Gebaooni manna woshshe hasaawisi. (Hige Gebaooni manni Amooraawootuwiinni gatinoho ikkinnina Israeelete gaꞌre diꞌꞌikkino; Israeelete manni insa gudannonsakkita kule xaarino; Saaooli kayinni Israeeletenna Yihudu manna kaaꞌlara laalaate, insa shee guda hasiꞌrino.)
3 Daawiti Gebaooni mannira, “Yihowa ragge maassidhinanni gede kiꞌnera maa assoꞌne? Mundeete shede Israeelete aaninni hiisse hoolo?” yii.
4 Gebaooni mannino isira togo yii: “Saaoolinna minisi manni ledo noonke gibbo birrunni woy culkunni tirrannita diꞌꞌikkitino; ninkera qole Israeelete giddonni mitto manchono shaate qoosso dinonke.” Hakkiinni isi, “Xaꞌmidhinannire baala asseemmoꞌne” yii.
5 Insano mootete togo yitu: “Ninke gudaranna Israeelete qoqqowi giddo mittowano heeꞌneemmokki gede coꞌo asse hunankera gano ganino manchite,
6 labballi ooso giddonni lamala uynonkena. Ninkeno Yihowa doodhino manchi Saaooli gobbara Gibia reeshshansa Yihowa albaanni sunteemmo.”* Mooteno, “Maahoyye eemmoꞌnena” yii.
7 Ikkollana moote, isinna Saaooli beetti Yoonaataani Yihowa albaanni xaartino daafira, Saaooli beetti Yoonaataani beetto Memfiboste mararisi.
8 Hakko daafira moote, Aya beetto Ritsifa Saaoolira iltinore lame labballi ooso yaano Armooninna Memfiboste hattono Saaooli beetto Melkooli* Mehola gobba manchi Berzeeli beetti Adirieelira iltinore onte labballi ooso haaꞌri.
9 Hakkiinni isi Gebaooni mannira sayse uyinsa; insano reeshshansa ilaalaho Yihowa albaanni suttu. Lamalunku mitteenni reytino; insa shinoonnihu gide gamba assinannihu umi barra yaano hayxe gamba assinanni yannaraati.
10 Hakkiinni Aya beetto Ritsifa gide gamba assa hananfihunni kayisse, iiminni xeenu reeshshu aana dirra geeshsha xiddu uddano haadhe kinchu aana kartu; ise barra iimi cea reeshshu aana ofoltara, hashsha kayinni moychu shiqqi yaara diwortino.
11 Daawitira, Saaooliti irkote galte Aya beetto Ritsifa assitinore kullisi.
12 Konnira Daawiti haꞌre Saaoolinna beettisi Yoonaataani miqqa Iyyaabiisi-giiliyaadi massagaanowiinni* haaꞌri; kuni manni tenne miqqa Filisxeeme Gilboa Saaooli shitu barra, isinna Yoonaataani reeshsha suntoonnihu Beeti-shaani gudumaaliwiinni moore adhino.
13 Isi Saaoolinna beettisi Yoonaataani miqqa hakkiinni haaꞌre abbi; insano shinoonni* manni reeshsha gamba assitu.
14 Hakkiinni insa Saaoolinna beettisi Yoonaataani miqqa Biiniyaami gobbara Tsela Saaooli anni Qiisi waammawa madaartu. Insa moote hajajinonsare baalare assituhu gedensaanni, Maganu baattote daafira huuccidhinore macciishshi.
15 Filisxeemetenna Israeelete mereero olu galagale kai. Hakko daafira Daawitinna soqqamaanosi dirrite Filisxeeme qassu; Daawiti kayinni daafuri.
16 Refaymi sirchi Yishibi-benoobi yinanni manchi Daawiti qasara kai; isi 300 seqile* ikkitannota camote urdenna haaro bise qodhe no.
17 Tsiruya beetti Abisano kaaꞌlasira day; isi Filisxeemicha qase shii. Hatte yannara Daawiti manni isira togo yee xaari: “Xaate olaho ledonke dihaꞌratto! Israeelete caabbicho xoyissitooti!”
18 Hakkunni gedensaanni Goobi yinanniwa Filisxeemootu ledo xaano olu kai. Hatte yannara Huushawichu Sibekay Refaymi sircho Saafi shii.
19 Xaano Goobi yinanniwa Filisxeemootu ledo olu kai; Beetelihemete gobba manchi Yaꞌꞌaare-orgiimi beetti Elihanaani wenenchu geeshshi daabbira worroonni urde amaxxinoha Geeti mancho Gooliyaadi shii.
20 Geeti olu galagale kai; hakkiicho lamente angara lewu lewu qubbichi lamente lekkarano lewu lewu qubbichi mitteenni 24 qubbe noosihu mittu jigeessu manchi no; isino Refaymi sirchooti.
21 Isi Israeele qacifatino daafira Daawiti rodii Shiimiay beetti Yoonaataani shii.
22 Kuri shoolunku Geeti heedhannore Refaymi sirchooti; insa Daawitinna soqqamaanosi anga gooffino.
Lekkaalliidi Qaagiishshuwa
^ Noo gedeenni tirriro, “hangeemmo.” Angansanna lekkansa hiiqqaqqite haggannota leellishshanno.
^ “Meroobi” yaano ikkara dandaanno.
^ “Baattote annuwiwiinni” yaano ikkara dandaanno.
^ Noo gedeenni tirriro, “hangoonni.”
^ 3.42 kiilo giraame balla ikkitanno. Guwuursha B14 lai.
