Layinki Saamueeli 6:1-23
6 Daawiti galagale Israeelete giddonni no yinoonnire 30,000 olanto gamba assi.
2 Hakkiinni Daawitinna ledosi noo manni baalu halaalaanchu Magani Taawoota haaꞌre abbate, kirubeelete aleenni* zuufanete ofollinohu olantote mootichi Yihowa suꞌma woshshinanniwa Baꞌꞌaale-yihuda kae haꞌri.
3 Ikkollana insa, halaalaanchu Magani Taawoota tullote aana noohu Abinaadaabi mininni haaꞌre abbate, haaro gaare aana wortu; Abinaadaabi ooso Oozanna Ahiyo haaro gaare gantanni haadhe hadhu.
4 Konnira tullote aana noohu Abinaadaabi mininni halaalaanchu Magani Taawoota haadhe hadhu; Ahiyono Taawootaho albaanni hige haꞌranni no.
5 Daawitinna Israeelete mini baalu, hoommete haqqenni seekkinoonnihu addi addihu muuziiqu uduunninni, gingilaatunni, kirre afiꞌrinohu muuziiqu uduunninni, dibbetenni, tsenaatsiletenninna simbaaletenni* Yihowa albaanni hagiirrunni sirbi.
6 Ikkollana insa Naakooni ayiddummewa iillituta, saada taawoota tuggara kaꞌu; hakkiinni Ooza angasi diriirse halaalaanchu Magani Taawoota amadi.
7 Hatte yannara Yihowa hanqi Ooza aana buwi; isi ayirrinye xeinore assino daafira, halaalaanchu Magani qoomisi; isino hakko halaalaanchu Magani Taawooti mule rey.
8 Ikkollana Yihowa hanqi Ooza aana buwino daafira, Daawiti hanqi;* hakkonne baycho techo barri geeshsha Phereezi-ooza* yine woshshinanni.
9 Konnira Daawiti hakko barra Yihowa waajjino daafira, “Tini nooha ikkiro, Yihowa Taawooti anewa hiitto ikke daanno?” yii.
10 Daawiti Yihowa Taawoota isi heeꞌrannowa Daawiti Katama massinara dihasiꞌrino. Hatteentenni isi, taawoota Geeti manchi Oobeedi-edoomi minira massinanni gede assi.
11 Yihowa Taawooti Geeti manchi Oobeedi-edoomi mine sase agana keeshshi; Yihowano Oobeedi-edoominna minisi manna baala maassiꞌri.
12 Moote Daawitira, “Halaalaanchu Magani Taawootinni kainohunni Yihowa Oobeedi-edoomi minenna isiha ikkinore baala maassiꞌrino” yine kullisi. Konnira Daawiti halaalaanchu Magani Taawoota, Oobeedi-edoomi mininni Daawiti Katama haaꞌre abbara hagiidhanni haꞌri.
13 Yihowa Taawoota dukkinori lee qaafo hadhuhu gedensaanni, Daawiti mitto bootonna harditino saa kakkali.
14 Daawiti shalaalatenni gannoonni efuude uddiꞌre* Yihowa albaanni woꞌma wolqasinni sirbanni no.
15 Daawitinna Israeelete mini baalu, Yihowa Taawoota hagiirrunni qeexaaꞌlitanninna xurumba ufuuffanni haadhe abbitu.
16 Ikkollana Yihowa Taawooti Daawiti Katama day yannara, Saaooli beetto Melkooli maskootete widoonni eela qolte laꞌanno woyte, moote Daawiti Yihowa albaanni kubbanninna sirbanni no; hakkiinni ise wodanisenni iso misha hanaffu.
17 Konnira insa Yihowa Taawoota, Daawiti qasino dunkaani giddora abbite baychosi wortu. Hakkiinni Daawiti Yihowa albaanni shilqote kakkalonna mittimmate kakkalo shiqishi.
18 Daawiti shilqote kakkalonna mittimmate kakkalo shiqishe kaiti, manna olantote mootichi Yihowa suꞌminni maassiꞌri.
19 Qoleno isi gamba yiinohu Israeelete manni baalaho meya labbaahura, daabbo, saattu laalo qeeqqanna* woynete tima uyinsa; hakkiinni mannu baalu mine minensa haꞌri.
20 Hakkiinni Daawiti umisi mine maassiꞌrara higanni heeꞌreenna Saaooli beetto Melkooli isinni xaaddara fultu. Hakkiinni ise togo yitu: “Israeelete moote soqqamaanosihu seennu borojji albaanni shotu manchi gede ikkanni mullichu kubbe techollawe ayirri!”
21 Hatte yannara Daawiti Melkoolira togo yii: “Ani sirbanni noommohu annakkinna minisi manna agure ane doorinoehunna Yihowa mannira Israeelete massagaancho asse shoominoehu Yihowa albaanniiti. Xaano ikkiro Yihowa albaanni sirba diagureemmo;
22 aneneeto kawiinni roorse shollisheemmo; qoleno aneneeto misheemmo; ati yiittahu seennu borojji albaanni kayinni ayirreemmo.”
23 Konnira Saaooli beetto Melkooli reytu barri geeshsha ila diafidhino.
