Layinki Saamueeli 5:1-25
5 Yannate gedensaanni Israeelete gaꞌre baala Daawitiwa Kebirooni dagge togo yitu: “Kuneeti! Ninke maalakkiitinna* mundeekkiiti.
2 Alba Saaooli mootenke ikke noo waro, olu yannara Israeele massagattohu* ateeti. Qoleno Yihowa ate, ‘Mannaꞌya Israeele allaalatto hattono Israeelete massagaancho ikkatto’ yiinohe.”
3 Konnira Israeelete cimeeyye baala mootenniwa Kebirooni daggu; Moote Daawitino Kebirooni Yihowa albaanni insa ledo gondooro ei. Insano Daawiti Israeelete moote assite buurtu.
4 Daawiti moote ikki woyte 30 diriho; isi 40 diro gashshino.
5 Isi Kebirooni heeꞌre Yihudaho lamala dironna lee agana gashshino; Yerusaalamete heeꞌre qole Israeele baalatenna Yihudaho 33 diro gashshino.
6 Mootenna mannisi Yerusaalamete heedhanno Iyyaabuusoota qasara hakkira haꞌri. Iyyaabuusootuno Daawiti togo yite qacifattu: “Ati horontanni kawira dieatto! Ballootunna naafootu nafa shorritannohe.” Insatero, ‘Daawiti horontanni hakkira dieanno’ yite heddino.
7 Ikkollana Daawiti xaa yannara Daawiti Katama yinannita Tsiyooni qiisho amadi.
8 Konnira Daawiti hakko barra togo yii: “Iyyaabuusoota qasannohu aye manchino Daawiti giwanno* ‘naafootanna balloota’ gudate way haꞌranno boy widoonni saona!” “Ballootunna naafootu minira horo dieꞌanno” yinannihu iseraati.
9 Hakkiinni Daawiti qiishote giddo heeꞌra hanafi; hakko baychono Daawiti Katama yine woshshini;* qoleno isi Gaarratenni* kayse giddo qole gaangaawa huxxa hanafi.
10 Konni garinni Daawiti jawaatanni haꞌri; olantote Magani Yihowano ledosi no.
11 Xiroosi moote Kiraami Daawitiwa manna soy; qoleno isi daguwu haqqe saanquwa, hanaaxenna huxxu kinna boccannore soy; insano Daawitira mine* mina hanaffu.
12 Daawitino Yihowa Israeelete aana gashshootesi kaajjishinotanna mannisi Israeelete daafira yee gashshootesi gotti gotti assinota afi.
13 Daawiti Kebirooninni dayhu gedensaanni, wole duucha irkote galtenna meento adhi; qoleno labballonna seenne lede ili.
14 Isi Yerusaalamete heeꞌre ilino ooso aante noote: Shamua, Shobaabi, Naataani, Salamooni,
15 Yibihaari, Elishua, Nefeegi, Yaafia,
16 Elishaama, Eeliyadanna Elfeleeti.
17 Filisxeemootu Daawiti Israeelete moote ikke buuraminota macciishshituti, insa baalunku iso hassara fultu; Daawitino tenne macciishshiti qiishote giddora ei.
18 Hakkiinni Filisxeemootu dagge xerri xerri yite Refaymi Xeicho* amaddu.
19 Daawitino Yihowa, “Mare Filisxeemoota qasoni? Insa angaꞌyara sayisse aattoe?” yee xaꞌmi. Yihowano Daawitira, “Ee, Filisxeemoota addintanni angakkira sayse eemmohena hadhe qasi” yee qoli.
20 Konnira Daawiti, Baꞌꞌaali-peraatsiimi daye insa hakko qasi. Hatte yannara isi togo yii: “Way dhoosino kofatto gede Yihowa diinnaꞌya albaꞌyaanni coꞌo asse gudino.” Isi hakko baychira suꞌma Baꞌꞌaali-peraatsiimi* yee fushshinohu iseraati.
21 Filisxeemootuno magannansa hakko hunte xooqqu; Daawitinna mannisino haaꞌre haꞌri.*
22 Gedensoonni Filisxeemootu galagalte dagge, xerri xerri yite Refaymi Xeicho* amaddu.
23 Daawiti Yihowa xaꞌmi; ikkollana Isi togo yiisi: “Xaaddote fultooti. Hatteentenni insara badheenni higge doyissite baaka citira albaanni higge marte qasi.
24 Baaka citira aleenni olantote huuro macciishshatto woyte, hobbi ruxxi yiittokkinni qaafo adhi; korkaatuno Yihowa Filisxeemete olanto qasara ate balaxe fulino.”
25 Konnira Daawiti Yihowa hajajinosi gede assi; Filisxeemootano Geebanni kayse Gezeeri geeshsha qasi.
Lekkaalliidi Qaagiishshuwa
^ Noo gedeenni tirriro, “miqichokkiitinna.”
^ Noo gedeenni tirriro, “Israeele fushshattohunna eessattohu.”
^ Woy “Daawiti lubbo gibbanno.”
^ “Isi woshshi” yaano ikkara dandaanno.
^ Woy “Miilonni.” “Wonsha” yitanno tiro afiꞌrinoho Ibiraawootu qaaleeti.
^ Woy “mootete mine.”
^ Woy “Xeichaamo Xawo.”
^ “Diigate Ikkannosihu Dino” yitanno tiro afiꞌrino.
^ Daawitinna mannisi maganna haadhe hadhe huntinoti egennantinote. 1 Duduwo 14:12 lai.
^ Woy “Xeichaamo Xawo.”
