Layinki Saamueeli 14:1-33
14 Tsiruya beetti Iyyoaabi, mootete wodani Abeseloomi laꞌꞌara quqquxaminota huwati.
2 Hakkiinni Iyyoaabi manna Teqoa soye mitte mancho abbisiise isera togo yii: “Eeggatena dadillino mancho labbe xiddu uddano uddiꞌri; zayteno buudhitooti. Shiidhe lowo yanna dadillitino mancho gede ikki.
3 Mootenniwa hadhe togo yite kuli.” Hakkiinni Iyyoaabi maytannoro kulise.
4 Teqoitte manchono mootenniwa marte uulla ubbe kumbuulte, “Mootichaꞌya kaaꞌlie ballo!” yitu.
5 Mooteno, “Maaho wole?” yee xaꞌmise. Iseno togo yitu: “Ani gunnittete; minaanniꞌya reyno.
6 Ane soqqamaanchokkira lame labballi ooso nooe; insa lamunku xawoho giwantu. Hakkiinni hoolannohu nookki daafira, mittu koꞌonne gane shii.
7 Kune fiixinke baalu ane soqqamaanchokki aana kaino; insa ragiꞌrannohu iso ikkinota affinoha ikkirono, ‘Rodoosi shiino daafira* isono shineemmona sayisse uyinke’ yitanni no. Insa gattinota hexxoꞌya* hunte uullate aaninni minaanniꞌya suꞌminna sirchi hawamanno gede assitaraati.”
8 Hakkiinni moote manchote, “Coyekki ani biddi asseemmona ati minikkira haꞌri” yiise.
9 Hatte yannara Teqoitte mancho mootete togo yitu: “Mootichaꞌya, mootenna zuufaanesi keeraano ikkitino daafira, sao aneranna anniꞌya minira ikkito.”
10 Moote kayinni, “Xaate aye manchino waadihero anewa abbi; isi layinkita diqarrisannohena” yiise.
11 Ise kayinni togo yitu: “Mundeete rabbisiꞌrannohu beettoꞌya gawajjannokki gedenna shaannokki gede, moote Maganosi Yihowa qaagona.” Hakkiinni isi, “Heeshshote Magani Yihowanni xaareemmona, beettikkihu umisi dananchi giddonni mittu nafa uulla diuwanno” yii.
12 Manchono, “Mootichaꞌya, ani soqqamaanchokki mitto coye coyiꞌreemmana macciishshie ballo” yitu. Isino “Coyiꞌrixa!” yiise.
13 Manchono togo yitu: “Ikkina ati Maganu manni aana togoo coye assate hedoottohu mayraati?
14 Ninke baalunku reyneemmoreeti; hinkiila dandiinannikkihu baattote aana duꞌnamino way gedeereeti. Ikkollana Maganu heeshsho* dihunanno; isi fule baino mancho isiwa qolanno faro hasiꞌranno.
15 Tenne mootichiꞌyara kulammara dayommahu mannu waajjeemma gede assinoe daafiraati. Hakko daafira ani soqqamaanchokki togo yee hedumma: ‘Xa moote hasaawiseemma. Miteekke moote borojjichosi xaꞌmidhinore assara dandaanno.
16 Moote kuꞌloommare macciishshe, anenna mitto beettoꞌya Maganu uynonke raggenni hunankera hasiꞌranno manchi anganni gatisankera dandaanno.’
17 Hakkiinni ani soqqamaanchokki, ‘Mootichiꞌya coyiꞌrinori fooliishsho ooe’ yuumma; korkaatuno mootichiꞌya danchanna busha bade afate halaalaanchu Magani sokkaasinchi gedeeho. Maganikki Yihowa ate ledo ikko.”
18 Mooteno mancho, “Xaꞌmeemmohere baala maaxittakkinni kulie” yiise. Manchono, “Mootichaꞌya, eeggatena xaꞌmie” yite qoltu.
19 Hakkiinni moote, “Konni baalu coy giddo Iyyoaabi no?” yee xaꞌmi. Manchono togo yite qoltu: “Mootichaꞌya heeshshonniha ikkakkinni* xaareemmana, coy ati yiitto gedeeti;* korkaatuno tenne asseemma gede hajajinoehunna tenne baala coyiꞌreemma gede kulinoehu soqqamaanchokki Iyyoaabiiti.
20 Soqqamaanchikki Iyyoaabi tenne assinohu coye soorrara yeeti; ikkollana mootichiꞌya halaalaanchu Magani sokkaasinchi gedee hayyichaati; isi baattote aana ikkanno coye baala afino.”
21 Hakkiinni moote Iyyoaabira, “Maahoyye, ati hedoottore asseemmo. Hadhe wedellicha Abeseloomi haadhe abbi” yii.
22 Hatte yannara Iyyoaabi uulla uwe kumbuule, moote galati. Hakkiinni isi togo yii: “Mootichaꞌya, ani soqqamaanchikki xaꞌmiꞌroommore assootto daafira, techo ate albaanni ayirrinye afiꞌroommota afoommo.”
23 Hakkiinni Iyyoaabi kae Geshuuri haꞌre Abeseloomi Yerusaalame haaꞌre abbi.
24 Ikkirono moote, “Isi minisira higona; ane alba kayinni laoonke” yii. Hakko daafira Abeseloomi minisira higi; mootete albano dilaino.
25 Israeele baalate giddo xummete Abeseloomi geeshsha egennaminohu mittu manchino dino. Lekkasi hoowinni kayse umisi qoonchi geeshsha isi horo kullannire diafiꞌrinoho.
26 Umisi dananchi lowo geeshsha ayirrannosi daafira, diru kiiro mudhanno; dananchisi mootete mini kinchi keenaasinchinni* keennanni woyte, 200 seqile* ikkanno.
27 Abeseloomira sase labballi oosonna Tiimaari yinanniti mitte meya beetto noosi. Ise lowo geeshsha xumate.
28 Abeseloomi lame diro woꞌma Yerusaalamete heeꞌri; ikkollana isi mootete alba dilaino.
29 Hakko daafira Abeseloomi mootenniwa soyasira hasiꞌre manna soye Iyyoaabi woshshi; ikkollana Iyyoaabi isiwa didayno. Xaano isi lede layinkimeeshsho manna soy; isi kayinni daa giwi.
30 Jeefote isi soqqamaanosi togo yii: “Iyyoaabi gati noohu ane gati muleeti; hakko isira boodu hayxu noosina martine giira qasse.” Hakko daafira Abeseloomi soqqamaano hadhe gateho giira qassu.
31 Hatte yannara Iyyoaabi kae Abeseloomi minira mare isira, “Soqqamaanokki gateꞌya giira qassinohu mayraati?” yii.
32 Abeseloomino togo yee qoli: “Kuneeti! Anewa daattora woshshoommohe; ati kayinni didayotto. Mootenniwa marte togo yite kulattora hasiꞌroommo: ‘Geshuurinni dayommohu mayraati? Hakko heeꞌroommoro woyyannohu baino. Xaano mootete alba laꞌꞌa hasiꞌreemmo; ani busha ikkummoro isi shooena.’”
33 Hakko daafira Iyyoaabi mootenniwa mare tenne kuli. Mooteno Abeseloomi woshshi; hakkiinni Abeseloomi mootenniwa eꞌꞌe albasiinni uwe kumbuuli. Mooteno Abeseloomi kimmi asse sunqisi.
Lekkaalliidi Qaagiishshuwa
^ Woy “lubbosi hunino daafira.”
^ Sirchiseta jeefote hexxo leellishshanno.
^ Woy “lubbo.”
^ Woy “lubbokkinni.”
^ Woy “ati yiittori gudisame garaho.”
^ Konne kincho “mootete seqile” yinoonnihu, mootete mine worrannihura woy wolu keenaasinchinni baxxinoha ikkino daafira ikkara dandaanno.
^ 2.3 kiilo giraame balla ikkitanno. Guwuursha B14 lai.
