Layinki Saamueeli 19:1-43
19 Iyyoaabira, “Moote Abeseloomira wiꞌlanninna dadillanni no” yine kullisi.
2 Mannu baalu moote beettisira lowo geeshsha dadillinota macciishshino daafira, hakko barri qeelle* dadilleho soorrantu.
3 Mannuno hakko barra, ola xooqino daafira saalino manni gede ikke sununni katama higi.
4 Moote alba diphe huurosi naggi asse, “Beettoꞌya, Abeseloomi! Abeseloomi beettoꞌya, beettoꞌya!” yaanni wiꞌli.
5 Hakkiinni Iyyoaabi minira mootenniwa eꞌꞌe togo yii: “Techo barra ate heeshsho,* labballunna seennu oosokki heeshsho, hattono minaamuwikkinna irkote meentikki heeshsho* gatissino soqqamaanokki baala saala duqqitanno gede assootto.
6 Ati gibbannohere baxatto; baxxannohere kayinni giwatto; korkaatuno techo roorrootikkinna soqqamaanokkira mitiiꞌmattokkita leellishootto. Techo ninke baalu goonfeenna Abeseloomi callu gatoommero giwattokkita afoommo.
7 Xa kaꞌe marte soqqamaanokki jawaachishi;* haꞌrattokkiha ikkiro kayinni Yihowanni xaareemmona, techo hashsha mittu manchino ledokki digalanno. Tini qolte anjekkinni kayse techo geeshsha iillinohe qarrinni roore gawajjitannohe.”
8 Hakko daafira moote kae haꞌre katamu waalchi mule ofolli; manna baalahono, “Moote xa katamu waalchiwa ofolle no” yine kulli. Hakkiinni mannu baalu mootenniwa day.
Israeele kayinni mittu mittunku xooqqe mine minensa hadhe no.
9 Israeelete gaꞌre woꞌmate noo manni baalu togo yaanni heewisami: “Moote diinnankenna Filisxeemete anganni gatisinonke; xa kayinni Abeseloominni kainohunni gobba agure xooqino.
10 Mootenke assine buudhinoommohu Abeseloomi olunniwa reyno. Ikkina martine moote galagaltine mayra diabbitinanni?”
11 Moote Daawiti kakkalaanchu Saadooqiranna Abiyaataarira togo yee sokka soy: “Yihudu cimeeyyera togo yiiyye: ‘Israeele baala coydhinori mootete minira iillinona, moote minisira galagaltine abbate kiꞌne mayra gedeꞌnitini?
12 Kiꞌne roduuwaꞌyaati, miqichoꞌyaatinna maalaꞌyaati.* Ikkina moote galagaltine abbate mayra gedeꞌnitini?’
13 Qoleno Amaasara togo yiiyye: ‘Atino miqichoꞌyanna maalaꞌya diꞌꞌikkootto? Xaanni kayisse Iyyoaabi darga olantoꞌya roorricha ikka hoogittoro, Maganu qorichishoe; hakkiinni sainoreno assoe.’”
14 Konnira isi Yihudu manni baalu wodana mittu manchi gede asse qeeli;* insano mootete, “Atinna soqqamaanokki baala galagaltine higge” yite sokka sokku.
15 Mooteno galagale hige Yordaanoosi iilli; Yihudu mannino mootetenni xaadaranna iso dukkise Yordaanoosi saysara Gilgaali day.
16 Hakkiinni Bahuriimi gobbahu Geera beetti Biiniyaamichu Shiimiay, Moote Daawitinni xaadara Yihudu manni ledo rahe haꞌri;
17 isi ledo 1,000 Biiniyaamooti no. Qoleno Saaooli mini soqqamaanchi Siiba 15 labballi oososinna 20 soqqamaanosi ledo moote balaxe rahe Yordaanoosi dirri.
18 Isi* mootete mini manna haaꞌre fushsharanna moote hasiꞌrannore baalare assara lawo tayse sai. Geera beetti Shiimiay kayinni moote Yordaanoosi tayse saꞌꞌara kaita, albasiinni uwe kumbuuli.
19 Isi moote togo yii: “Soꞌroꞌya kiirtootie; qoleno mootichiꞌya Yerusaalametenni fule haꞌri barra ani soqqamaanchikki assoommo soꞌro qaaggooti. Mootichaꞌya tenne wodanaho wodhitooti;
20 korkaatuno ani soqqamaanchikki sao assoommota afoommo; hakko daafira techo mootichiꞌyanni xaadate Yooseefi mine baala balaxe dayommo.”
21 Hatte yannara Tsiruya beetti Abisa, “Yihowa buurinoha rumino daafira, Shiimiay reya dihasiissannosi?” yii.
22 Daawiti kayinni togo yii: “Kiꞌne Tsiruya ooso, konni coyra kiꞌne may eesseennaꞌneeti techo ane aana kaꞌinoonnihu? Techo barra Israeelete giddo mittu manchino reya hasiissannosini? Israeelete moote ikkoommota afoommohu ditechootilla?”
23 Hakkiinni moote Shiimiayra, “Horo direyatto” yee qaale eisi.
24 Saaooli beetti beetti Memfibosteno mootetenni xaadara day. Isi moote fule haꞌre keerunni higi barri geeshsha, lekka dihayishshiꞌrino,* ereeda dimeexxino, uddanono dihayishshiꞌrino.
25 Isi mootetenni xaadara Yerusaalame* dayta, moote iso, “Memfiboste, ledoꞌya haꞌroottokkihu mayraati?” yee xaꞌmi.
26 Isino togo yee qoli: “Mootichaꞌya, soqqamaanchiꞌya xagarinoe. Ani soqqamaanchikki naaficha ikkoommo daafira soqqamaanchoꞌya, ‘Mootete ledo haꞌreemmona harrichoꞌya koorie’ yoommo.
27 Isi kayinni mootichiꞌyara ane soqqamaanchikki suꞌma hunino. Ikkollana ati mootichiꞌya halaalaanchu Magani sokkaasinchi gedeeha ikkootto daafira, dancha lawe leellihere baala assi.
28 Anniꞌya mini manni baalu reyo hasiissannoreeti; ati kayinni ane soqqamaanchokki sagale ledokki ittannori wido assoottoe. Ikkina kawiinni sae moote maa xaꞌmiꞌra dandeemmo?”
29 Ikkirono moote isira, “Leellinoena lowore coydhooti. Baatto atinna Siiba beeqqitinanni gede assoommo” yii.
30 Memfibosteno mootete, “Mootichiꞌyalla keerunni minisira higi geeshsha, isi baalankare adhona” yii.
31 Hakkiinni Giiliyaadichu Berzeeli moote dukkise Yordaanosi saysara Roogiliiminni Yordaanoosi day.
32 Berzeeli 80 diri geerchooti; isi hoqino dureessa ikkinohura, moote Mahanaymi noo yannara sagale shiqishanni towatinosi.
33 Konnira moote Berzeeli, “Yerusaalamete sagale aanni towateemmohena ledoꞌya kai” yiisi.
34 Berzeeli kayinni mootete togo yii: “Konni diriꞌyanni mootete ledo Yerusaalame ma assammora haꞌreemmo?
35 Xa anera 80 diro ikkinoe. Ikkina busha dancha bade afeemmoni? Ani soqqamaanchikki iteemmorinna ageemmori nyammo badeemmoni? Labballunna meya faarsaano huuro macciishshe afeemmoni? Ikkina ani soqqamaanchikki mootichiꞌyara duha mayra ledeemmo?
36 Ani soqqamaanchikki moote Yordaanoosi geeshsha massummoro ikkannoe. Mootichaꞌya, anera kageeshshi elle mayra assattoe?
37 Ani soqqamaanchikki katamaꞌya higeemmo gede fajjie ballo. Hakko anniꞌyanna amaꞌya waammawa madaarriero woyyannoe. Soqqamaanchikki Kimihaami kayinni kuneeti. Isi ate mootichiꞌya ledo haꞌreenna dancha lawe leellihere baala assisi.”
38 Konnira moote, “Kimihaami ledoꞌya haꞌranno; anino dancha lawe leellihere asseemmosi; aterano xaꞌmiꞌrittore baala asseemmohe” yii.
39 Mannu baalu Yordaanoosi tayse saꞌꞌa hanafi; mooteno haꞌrara kaiti, Berzeeli sunqe maassiꞌrisi; hakkiinni Berzeeli qaesi higi.
40 Moote Gilgaali haꞌrita, Kimihaamino ledosi haꞌri. Yihudu manni baalunna daratu Israeelete manni moote dukkise saysi.
41 Hakkiinni Israeelete manni baalu mootenniwa daye togo yii: “Roduuwinke Yihudu manni atenna minikki manna mannikki baalu ledo maaxe Yordaanoosi saysinohu mayraati?”
42 Hakkiinni Yihudu manni baalu Israeelete mannira togo yee qoli: “Hatto assinoommohu moote fiixanke ikkinohuraati. Tennera kiꞌne may giiriꞌne? Mootete woxinni intoommori nooni? Woy mitore uyne egenninoonninke?”
43 Ikkollana Israeelete manni Yihudu mannira togo yee qoli: “Ninke tonne gaꞌre ikkinoommo daafira, Daawiti gashshootira kiꞌnenni roore lowo qeechi noonke. Ikkina kiꞌne ninke mayra mishshininke? Mootenke qolate ninke balaxa dihasiissannonke?” Ikkollana Yihudu manni coyiꞌrinori Israeele manni coyiꞌrinorinni roore wolqa afiꞌri.*
Lekkaalliidi Qaagiishshuwa
^ Woy “gato.”
^ Woy “lubbo.”
^ Woy “lubbo.”
^ Noo gedeenni tirriro, “soqqamaanokki wodanira coyiꞌri.”
^ Woy “mundeeꞌyaati.”
^ Noo gedeenni tirriro, “qafadi.”
^ “Insa” yaano ikkara dandaanno.
^ Noo gedeenni tirriro, “lekkasi ditowaaxxino.”
^ “Yerusaalametenni” yaano ikkara dandaanno.
^ Woy “qeeli.”
