Layinki Saamueeli 12:1-31
12 Hakko daafira Yihowa Naataani Daawitiwa soy. Isino Daawitiwa eꞌꞌe togo yii: “Mittu katamira lamu manchi no; mittu dureessaho; mittu qole buxichoho.
2 Dureessu manchira lowo geꞌreewinna saada noosi;
3 buxichu manchira kayinni hidhinota mitte geꞌrechu wiliiꞌlicho agurranna woluri dinosi. Isi tenne wiliiꞌlicho towaatannose; iseno isinna oososi ledo mitteenni heedhe lophitu. Noosita shiima sagale ledosi ittanno hattono finiinchisinni agganno; qoleno kikkiꞌlasira goxxanno. Ise isira qaaqqosi gedeeti.
4 Gedensoonni dureessu manchira wosinchu day; ikkollana isi konni wosinchira sagale qixxeessate umisi geꞌreewinna saada giddonni mitteno dihaaꞌrino. Hatteentenni isi wosinchoho buxichu manchi wiliiꞌlicho haaꞌre gorrino.”
5 Hatte yannara Daawiti manchoho lowo geeshsha hanqe Naataanira togo yii: “Heeshshote Magani Yihowanni xaareemmona, tenne assino manchi reya hasiissannosi!
6 Isi tenne assinohuranna mararro leellishinokki daafira, wiliiꞌlichote darga shoole ero baata hasiissannosi.”
7 Hakkiinni Naataani Daawitira togo yii: “Hakku manchi ateeti! Israeelete Magani Yihowa togo yaanno: ‘Israeelete moote asse ani umiꞌya shoomoommohe; Saaooli angannino gatisoommohe.
8 Mootichikki mine oommohe; mootichikki minaamuwano kikkiꞌlakkira woroommo; Israeeletenna Yihudu mineno oommohe. Kuni ajoommehero kawiinni roorinore asseemmohe.
9 Ikkina Yihowa albaanni busha coye assite qaalesi shotisoottohu mayraati? Hiticha Ooriyo bisetenni shootto! Hakkiinni iso Amoonootu bisenni shiittohu gedensaanni, galtesi adhootto.
10 Hitichu Ooriyo galte adhite ane shotisoottoe daafira, xaate bise minikkinni difaffanno.’
11 Yihowa togo yaanno: ‘Kuneeti minikkinni ate aana bao abbeemmo; qoleno illekki laꞌanna minaamuwakki wolu manchira* eemmo; isino barra baqaaqa minaamuwikki ledo goxanno.
12 Ati konne coye maaxante assoottoha ikkirono, ani kayinni Israeele baalate albaanni barra baqaaqa* reqecci asseemmo.’”
13 Hakkiinni Daawiti Naataanira, “Yihowa aana cubbo loosoommo” yii. Naataanino Daawitira togo yii: “Yihowa cubbokki maaranno.* Atino direyatto.
14 Ikkollana konne coye assite Yihowa lowo geeshsha mishootto daafira, ilaminohu qaaqqikki reyanno.”
15 Hakkiinni Naataani minisira haꞌri.
Yihowano Ooriyo minaama Daawitira iltino qaaqqo qoomamunni ganeenna dhiwami.
16 Daawiti qaaqqisi daafira halaalaancho Magano eeggifate huucciꞌri. Qoleno itanna aga agure xoomi; hattono hashsha woꞌma uulla goxe gali.
17 Konnira minesi noo cimeeyye dagge mulesi uurrite, uullanni kayissasira woꞌnaaltu; isi kayinni uullanni kaꞌꞌanna ledonsa sagale ita giwi.
18 Lamalki barra qaaqqu rey; Daawiti soqqamaano kayinni qaaqqu reynota isira kula waajjitu. Insa togo yitu: “Qaaqqu lubbote heeꞌreenna, Daawiti hasaawinsoommo; isi kayinni ninke yinoommore dimacciishshino. Ikkina xa qaaqqu reynota hiitto assine kulleemmo? Isi umosi gawajjara dandaanno.”
19 Daawiti soqqamaanosi hashaashantanna laiti, qaaqqu reynota afi. Hakkiinni isi soqqamaanosi, “Qaaqqu reyni?” yee xaꞌmi. Insano, “Ee reyno” yite qoltu.
20 Konnira Daawiti uullanni kai. Hakkiinni hayishshiꞌre zayte buudhe uddano soorriꞌre Yihowa minira haꞌre kumbuuli. Hakkunni gedensaanni, minisira* haꞌre sagale uynannisi gede xaꞌmiꞌre iti.
21 Soqqamaanosino iso togo yite xaꞌmitu: “Hatto assoottohu mayraati? Qaaqqu lubbote heeꞌreenna, xoomootto hattono wiꞌlootto; qaaqqu reyanni heeꞌreennanni kayinni kaꞌe sagale itootto.”
22 Isino togo yee qoli: “Qaaqqu lubbote heeꞌreenna xoomoommohunna wiꞌloommohu, ‘Miteekke Yihowa marare qaaqqo gatisaekka?’ yeeti.
23 Xa qaaqqu reynona ma assiꞌrammora xoomeemmo? Iso galagale abba dandeemmo? Ani isiwa haꞌreemmo ikkinnina isi anewa dihiganno.”
24 Daawitino minaamasi Bersaabehi sheshifachishi. Hakkiinni isewa eꞌꞌe ledose goxi. Iseno gedensoonni labbaa qaaqqo iltu; suꞌmano Salamooni* yee fushshisi. Yihowano iso baxisi;
25 qoleno Yihowa baxinosi daafira masaalaanchu Naataani widoonni sokka soye suꞌmasi Yidiidiyahi* yii.
26 Iyyoaabi Amoonootu katama Raaba qasi; qoleno isi mootoollate katama* amadi.
27 Konnira Iyyoaabi Daawitiwa manna soye togo yii: “Raaba qase way katamma* amadoommo.
28 Xa gattino olanto gamba assite katama doyissite amadi. Hakkunni kaꞌa katama ani doyisse amade ayirrinye adheemmo.”*
29 Konnira Daawiti olanto baala gamba asse Raaba haꞌre katama qase amadi.
30 Hakkiinni isi Malkaami uminni baꞌlatto adhi. Baꞌlatto mitte taalaante* culka ikkitanno; aaniidono ayirradda kinnanni seesiinsoonni. Baꞌlattono Daawiti umira worri. Qoleno isi katamunni lowo qafado adhi.
31 Hakko heeꞌranno mannano abbe kinna muranno gede, qara afiꞌrino uduunninni hattono siwiilu meesanenni loosanno gedenna xuube seekkanno gede assi. Isi Amoonootu katamma baalate hatto assino. Jeefote Daawitinna olanto baala Yerusaalame higgu.
Lekkaalliidi Qaagiishshuwa
^ Woy “olliichikkira.”
^ Noo gedeenni tirriro, “arrishshote albaanni.”
^ Woy “cubbokki saꞌꞌanno gede assanno.”
^ Woy “mootete mine.”
^ “Keere” yitanno tiro afiꞌrinoho Ibiraawootu qaaleeti.
^ “Yahi Baxannoho” yitanno tiro afiꞌrino.
^ Woy “gashshootu katama.”
^ Katamu waa afiꞌranno buꞌa leellishshannota ikkitara dandiitanno.
^ Noo gedeenni tirriro, “katamu ane suꞌminni woshshamanno.”
^ Mitte taalaante 34.2 kiilo giraame ikkitanno. Guwuursha B14 lai.
