Layinki Saamueeli 16:1-23
16 Daawiti ilaalu guunxonni shiima geeshsha saita, Memfiboste soqqamaanchi Siiba 200 daabbo, 100 balasete qeeqqa, 100 arri laalchi* qeeqqanna jawu gambaychira woyne lame harrera hogowe isinni xaadara haꞌri.
2 Hakkiinni moote Siiba, “Kuri abboottohu mayraati?” yii. Siibano togo yee qoli: “Harre mootete mini manni gulufara, daabbonna arri laalcho wedellu itara, woyne kayinni halalla daafurino manni agara abboommo.”
3 Hakkiinni moote, “Mootichikki beetti mama no?” yee xaꞌmi; Siibano mootete togo yii: “Isi, ‘Techo Israeelete mini anniꞌya gashshoote qolannoe’ yee hede Yerusaalamete gatino.”
4 Mooteno, “Xaate Memfibosteha ikkinohu baalu ateho” yiisi. Siibano, “Albakkiinni kumbuuleemmo. Mootichaꞌya albakkiinni ayirrinye afiꞌreemmo gede assie” yii.
5 Moote Daawiti Bahuriimi yinanniwa iillita, Saaooli fiixa ikkinohu Geera beetti Shiimiay Daawiti rumanni day.
6 Shiimiay moote Daawitinna soqqamaanosi baalate, isira guranna qiniiteenni noo manni baalahonna wolqaataamma olamaasinera kinna olloli.
7 Shiimiay iso togo yaanni rumi: “Fuli, fuli kawiinni; mundeete manchi! Tidhoottokkihu kuni!
8 Saaooli mine shootto daafiranna isiwiinni gashshoote adhootto daafira, Yihowa mundeete rabbisanni noohe; Yihowa gashshoote kayinni beettikki Abeseloomira aanno. Ati mundeete mancho ikkootto daafira, kune qarru hasanni noohe!”
9 Hakkiinni Tsiruya beetti Abisa mootete, “Kuni reyno woshichi mootichaꞌya rumannohu mayraati? Mare umosi mureemmona fajjie ballo” yii.
10 Moote kayinni togo yii: “Kiꞌne Tsiruya ooso, anera kiꞌne ledo may nooe? Yihowa, ‘Daawiti rumi!’ yee worinosina rumoena agurre. Ikkina, ‘Togo mayra assatto?’ yaannosihu nooni?”
11 Hakkiinni Daawiti Abisaranna soqqamaanosira baalate togo yii: “Kune iloommo beettinni shaaera* hasanni nooe; ikkina kuni Biiniyaamichi assanni noori dhagge mayra ikkiꞌne? Yihowa rumi yee woreennasiitina rumoena agurre!
12 Miteekke Yihowa gadadoꞌya lae, techo rumote darga Yihowa danchumma assaera dandaanno.”
13 Daawitinna mannisi doogo amade eelallitte dirri; Shiimiayno ilaalaho qacce amade Daawiti widoonni haꞌranni Daawitinna mannasi rumi; qoleno isi insara kinna ollolanninna buko aanaho fincanni haꞌri.
14 Gedensoonni mootenna ledosi noo manni baalu hedinowa iilli; insa lowo geeshsha daafurino daafira, hakko fooliishshiꞌri.
15 Hatte mereero Abeseloominna Israeelete manni baalu Yerusaalame iilli; Akixoofeelino ledonsa no.
16 Daawiti jaali* Arkaawichu Kuusi Abeseloomiwa eiti, “Moote hegerera mooho! Moote hegerera mooho!” yii.
17 Hatte yannara Abeseloomi Kuusi, “Jaalikkira ammanamino baxille leellishattohu konni garinniiti? Jaalikki ledo haꞌroottokkihu mayraati?” yii.
18 Kuusino Abeseloomira togo yii: “Deeꞌni hatto horo diasseemmo; ani halameemmohu Yihowa, kuni manninna Israeelete manni baalu doorino manchiraati. Isi ledo heeꞌreemmo.
19 Lede yeemmona, soqqama hasiissannoehu ayeraati? Mootete beettira diꞌꞌikkino? Annikkira soqqamummonte gede aterano soqqameemmo.”
20 Hakkiinni Abeseloomi Akixoofeelira, “Xa hanni ma assinummoro woyyannoro kulie” yii.
21 Akixoofeelino Abeseloomi togo yii: “Annikki mine* agarara wore haꞌrinohu irkote meentisi ledo goxi. Hakkiinni Israeelete manni baalu, annikki boshshiꞌre giwannohe gede assiꞌroottota macciishshanno; atera halantannorino jawaante afidhanno.”
22 Hakko daafira insa mineho aanaanni seekkinoonni darga* Abeseloomira dunkaana qassu; Abeseloomino Israeelete manni baalu laꞌꞌanna annisihu irkote meenti ledo goxi.
23 Hatte yannara Akixoofeeli amaale halaalaanchu Magani qaali gede assine laꞌnanni. Daawitino Abeseloomino Akixoofeeli amaale baala hakko garinni laꞌanno.*
