Layinki Saamueeli 4:1-12
4 Saaooli beetti Iyyaabuste,* Abeneeri Kebirooni reynota macciishshiti, mase shiili;* Israeele baalano shabbarantu.
2 Saaooli beettira gaadaanote albisoota ikkinohu lamu manni noosi; mittu suꞌmi Baꞌꞌaanahiiti; wolunnihu qole Reekaabiiti. Insa Biiniyaami gaꞌrehu Beꞌꞌeerootichu Rimooni oosooti. (Korkaatuno Beꞌꞌeerooti Biiniyaami gaꞌre gede assine kiirranni.
3 Beꞌꞌeerooti manni xooqe Gitaymi haꞌri; insa techo barri geeshsha hakko wole gobba manna ikkite heedhanno.)
4 Saaooli beetti Yoonaataanira lekka naafinohu mittu qaaqqi noosi; Iyziraeelinni Saaoolinna Yoonaataani daafira kulanno duduwi day yannara, isi ontu diriho; hakkiinni awuutosi iso baydhe xooqqu; ikkollana ise lowo geeshsha masse xooqqanni heedheenna qaaqqu uwe naaficha ikki. Suꞌmisi Memfibosteeti.
5 Beꞌꞌeerootichu Rimooni ooso Reekaabinna Baꞌꞌaanahi barru taalo arrishsho iibbite heedheenna Iyyaabustewa hadhu; hatte yannara isi mine fooliishshiꞌre no.
6 Insa sinde adhitannoha labbe minira caꞌu yite eꞌu; Iyyaabusterano godowa qasse xoroorrissu; hakkiinni Reekaabinna rodiisi Baꞌꞌaanahi xooqqe baꞌu.
7 Insa minira eꞌanno woyte, isi holge daallasisira goxe no; insano iso qasse shituhu gedensaanni umosi murtu. Hakkiinni umosi haadhe Areba massitanno doogo amadde hashsha woꞌma hadhanni galtu.
8 Hakkiinni insa Iyyaabuste umo haadhe Kebirooni noohuwa Moote Daawitiwa abbite togo yitu: “Lubbokki* hasanni noohu diinikki Saaooli beetti Iyyaabuste umi kuneeti. Yihowa techo barra Saaoolinna sirchosi mootichiꞌyara rabbisino.”
9 Ikkollana Daawiti, Beꞌꞌeerootichu Rimooni ooso Reekaabiranna rodiisi Baꞌꞌaanahira togo yee qoli: “Qarru baalu giddonni gatisinoehu* heeshshote Magani Yihowanni xaareemmona,
10 mittu manchi dancha duduwo abbinoeha laweennasi ‘Saaooli reyno’ yee kulieta, iso amade Tsiqilaagi shoommo. Isi anewiinni afiꞌrino baꞌraarshi konneeti!
11 Ikkina minesi daallasisira goxe nooha keeraancho mancho shiinohu bushu mannira hakkiinni saino qorichi dihasiisanno? Mundeesira kiꞌne xaꞌmanna kiꞌne baattote aaninni haaꞌre hoola dihasiissannoe?”
12 Hakkiinni Daawiti mannisi insa shaanno gede hajaji. Insano angansanna lekkansa murte, Kebirooni noo kofatto mule suttu. Ikkollana Iyyaabuste umo haadhe Kebirooni Abeneeri waammawa madaartu.
