Layinki Saamueeli 15:1-37
15 Kuni baalu coy ikkihu gedensaanni Abeseloomi saragalla, faradonna albasiinni dodannoha 50 manna qixxeessiꞌri.
2 Abeseloomi soodo gute kae, katamu waalchiwa massitanno doogo mule uurranno. Aye manchino yoo hasiꞌre mootenniwa daanno woyte, Abeseloomi isiwa woshshe, “Hiikko kataminni dayotto?” yaanno. Isino, “Ani soqqamaanchikki mitte Israeelete gaꞌre giddonni dayommo” yaanno.
3 Abeseloomino isira, “Kuꞌlootto coy garahonna halaaleho; kayinni hige ma assinanni mootenniwa hajokki macciishshannohu dino” yaanno.
4 Hakkiinni isi togo yaanno: “Gobbate aana daanya assine shoommoommeꞌꞌero ma danchi bai! Aye manchino coyesi kuꞌlara woy yoo hasiꞌre anewa dayro, ani halaalaancho yoo yeemmosi.”
5 Qoleno mittu manchi kumbuulasira isiwa shiqqi yiiro, Abeseloomi angasi diriirse amade kimmi asse sunqanno.
6 Abeseloomi yoo hasiꞌre mootenniwa daannoha Israeelete manna baala hatto assanno; konni garinni Abeseloomi Israeelete manni wodana moori.
7 Shoolki diri jeefora* Abeseloomi mootete togo yii: “Yihowara xaꞌnoommo xano wonshate Kebirooni haꞌreemmo gede fajjie ballo.
8 Korkaatuno ani soqqamaanchikki, Sooriyaho Geshuuri noommo yannara, ‘Yihowa Yerusaalame qoliero Yihowara kakkalo shiqishiꞌreemmo’* yee xaꞌnoommo.”
9 Hakkiinni moote iso, “Keerunni haꞌri” yii. Isino kae Kebirooni haꞌri.
10 Abeseloomino, “Xurumbu huuro macciishshitinanni heedhinenni, ‘Abeseloomi Kebirooni moohi!’ yitine dudubbe yee Israeelete gaꞌre baalate qotaano soy.”
11 Hakkiinni 200 manni Yerusaalametenni Abeseloomi ledo hakkira haꞌri; insa koyinseennansalla hadhinona gannoonni gano maatiro diaffino.
12 Qoleno Abeseloomi kakkalo shiqishi yannara, Daawiti amaalaancho Akixoofeeli ilamino katami Giilonni woshshiishi. Abeseloomi ganino ganora halamanno manni kiirono lexxitu.
13 Yannate gedensaanni mittu manchi Daawitiwa daye, “Israeelete manni wodani Abeseloomiwa higino” yee kulisi.
14 Hakkiinni Daawiti Yerusaalamete ledosi noo soqqamaanosi baala baychonkonni togo yii: “Ninke giddonni Abeseloomi anganni gatannohu dinona kaꞌe xoonqona! Rahe daye amade shaannonkekki gedenna katamano bisetenni gudannokki gede, amme kawiinni ranke baꞌnona!”
15 Mootete soqqamaanono, “Ninke soqqamaanokki mootichinke yaannore baalare assate qixxaamboommo” yite qoltu.
16 Hakko daafira moote minisi manna baala anga adhe fule haꞌri; tonne irkote meentosi kayinni mine* agaranno gede hakko agure haꞌri.
17 Mootenna ledosi fulino manni Beeti-merihaaqi iilliti, hakko uurri.
18 Ledosi fultino soqqamaanosi baala, Keritaawootu baalu, Pheleetootunna Geetinni iso haꞌrunse daynohu 600 manni, moote laꞌꞌanna albasiinni sai.*
19 Hakkiinni moote Itay yinanniha Geeti mancho togo yii: “Ninke ledo haꞌrattohu mayraati? Ati gobbakkinni qafadante dayottoha ikkootto daafira, higge haaru moote ledo heeꞌri.
20 Dayottohu beꞌrootilla; ikkina techo ani haꞌrummowa baalawa haꞌratto gede asse mayra raateesseemmohe? Xa roduuwakki haadhe higi; Yihowano ammanamino baxillenna ammanama leellishohe!”
21 Itay kayinni mootete togo yii: “Heeshshote Magani Yihowanninna heeshshonniha ikkakkinni xaareemmona, ani soqqamaanchikki reyummorono heeꞌrummorono ati haꞌrittowa baalawa haꞌreemmo!”
22 Daawitino Itay, “Maahoyyena kaixa” yii. Hakko daafira Geeti manchi Itay mannisinna maatensa baalate ledo haꞌri.
23 Kuni manni baalu saꞌꞌanno woyte, gobbate noo manni baalu huuronsa naggi asse wiꞌlanni no; mooteno Qeedirooni Xeichiwa uurre no; mannu baaluno halallira massitanno doogo widoonni sai.
24 Saadooqino hakko no; halaalaanchu Maganiha gondooru taawoota dukkino Leewaawootino ledosi no; insano halaalaanchu Magani Taawoota uulla wortu; mannu baalu katamunni fule xeicho tayse saihu gedensaanni, Abiyaataari kae haꞌri.
25 Ikkollana moote Saadooqira togo yii: “Halaalaanchu Magani Taawoota katama qolle; Yihowa albaanni ayirrinye afiꞌrummoro, isi galagale qolaeranna taawootanna iso worranni darga laeemmo gede assaera dandaanno.
26 Ikkollana isi, ‘Ani atenni dihagiidhoommo’ yiiero, dancha lawe leellinosire baala ane aana assona.”
27 Moote kakkalaancho Saadooqi togo yii: “Ati ajuuja laꞌꞌatto mancho diꞌꞌikkootto? Keerunni katama higi; lamenta ooso yaano beettokki Akimaꞌꞌaasinna Abiyaataari beetto Yoonaataani haadhe higi.
28 Kiꞌnewiinni duduwu iillae geeshsha ani halalla noo lawo* mule keeshsheemmo.”
29 Konnira Saadooqinna Abiyaataari halaalaanchu Magani Taawoota Yerusaalame massitu; insano hakko keeshshitu.
30 Daawiti wiꞌlanni Ejedhete Ilaala* fuli; isi umo gugguꞌle mulla lekkanni haꞌranni no. Ledosi noo manni baaluno umo gugguꞌle wiꞌlanni fuli.
31 Daawitira, “Abeseloomi ledo gano gantinori giddo mittu Akixoofeeliiti” yine kullisi. Daawitino, “Yihowaꞌya ballo, Akixoofeeli amaale gowwu manchi amaale gedeeta assi!” yii.
32 Daawiti mannu bashsho Maganoho kumbuulanno ilaali guunxo iilliti, Arkaawichu Kuusinni xaadi; Kuusi hakko uddanosi dare, umohono buko giggishshiꞌre no.
33 Ikkollana Daawiti iso togo yiisi: “Ledoꞌya haꞌrittoro duha ikkattoe.
34 Kayinni katama higge Abeseloomira, ‘Mootichaꞌya, ani ate soqqamaanchooti. Alba annikki soqqamaanchooti; xa kayinni ate soqqamaanchooti’ yiittoro, Akixoofeeli amaale shuffitanno gede assite kaaꞌlattoera dandaatto.
35 Kakkalaanchu Saadooqinna Abiyaataari hakko ledokki heedhanno. Mootete mininni macciishshattore baala, kakkalaanchu Saadooqiranna Abiyaataarira kuli.
36 Hakko lame oosonsa yaano, Saadooqi beetti Akimaꞌꞌaasinna Abiyaataari beetti Yoonaataani ledonsa no; kiꞌneno macciishshitinire baalare insa widoonni sokkeꞌꞌe.”
37 Hakko daafira, Abeseloomi Yerusaalame eita, Daawiti jaali* Kuusi katama haꞌri.
