Layinki Saamueeli 13:1-39
13 Daawiti beetti Abeseloomira Tiimaari yinanniti xuma rodoo noosi; Daawiti beetti Aminoonino ise baxi.
2 Aminooni rodoosi Tiimaarinni kainohunni lowo geeshsha yaadino daafira dhiwami; korkaatuno ise seemo ikkitino daafira, ise aana mittoreno assa dandaannokkiha lawinosi.
3 Aminoonira Iyyoonaadaabi yinanni jaali noosi; isi Daawiti rodii Shiimiahi beettooti; Iyyoonaadaabi lowo geeshsha hayyicha manchooti.
4 Konnira isi Aminooni, “Mootete beetto, barru baala togo yaadattohu mayraati? Dikulattoe?” yii. Aminoonino, “Rodiiꞌya Abeseloomi rodoo Tiimaari baxoommo” yee qoli.
5 Iyyoonaadaabino isira togo yii: “Dhiwamoottoha labbe daallasikkira goxi. Hakkiinni annikki laꞌꞌahera dayro, ‘Rodooꞌya Tiimaari sagale* uytannoe gede assi ballo. Ise dhiwamino manchira uynanni sagale ani laꞌꞌanna worte chuucishshoena’ yii.”
6 Hakko daafira Aminooni dhiwaminoha lawe goxi; mooteno laꞌꞌasira day. Hakkiinni Aminooni mootete, “Rodooꞌya Tiimaari dagge ani laꞌꞌanna lame tima* gante chuucishshannoe gede assi ballo yii.”
7 Daawitino, “Rodiikki Aminooni minira marte sagale* worisi ballo” yee kulara Tiimaariwa manna soy.
8 Tiimaarino kaꞌe rodiise Aminooni minira martanno woyte isi goxe no. Hakkiinni ise bullee haadhe isi laꞌꞌanna liisse tima gantu.
9 Hakkiinni ise mixashshotenni fushshite itanno gede uytusi. Aminooni kayinni ita giwe, “Baalunku kawiinni fulle!” yii. Mannu baaluno fule haꞌri.
10 Aminoonino Tiimaari, “Angakkinni chuucishattaena sagale* goxoommowa haadhe abbie” yii. Tiimaarino gantinoha lame tima haadhe rodiise Aminooni goxe noowa massitu.
11 Ise sagale massitusita cuꞌme amade, “Rodooꞌya amo ane ledo goxi” yiise.
12 Ise kayinni togo yitusi: “Agurie ballo rodooꞌya! Togoo coye Israeelete giddo assine diegenninoonnina shollishshootie. Konne mancaꞌꞌa coye assitooti.
13 Anino saala duqqe hiitto ikke heeꞌre afeemma? Atino Israeelete giddo noohu shollaataamu manni gedeeha ikkatto. Eeggatena konne coye mootete kuli; isino ane atera dihoꞌlannohena.”
14 Isi kayinni yitinore macciishsha giwe, giddeesse seyate shollishise.
15 Hakkiinni Aminooni ise boshshiꞌre giwi; isi ise alba baxinosehunni roore giwi. Hakkiinni “Rakke mininni fuli!” yiise.
16 Hatte yannara ise, “Rodooꞌya, xa ane mininni fushshite shorrattoeha ikkiro, assootikki koꞌiinni roore bushannona aguri!” yitusi. Isi kayinni yitinota macciishsha giwi.
17 Hakkiinni isi soqqamannosi wedellicha woshshe, “Eeggatena tenne mancho albiꞌyanni fushshite mine cufi” yii.
18 (Ise hakka woyte lowo geeshsha biifado uddano uddidhe no; korkaatuno hatte yannara mine assiꞌrinokkihu mootete seenni togoo uddano uddiꞌranno.) Konnira soqqamaanchu ise gobbara fushshe mine cufi.
19 Tiimaarino umoho buluulo fincidhu; uddidhinota biifado uddano dartu; hakkiinni umo cuꞌmidhe raartanni hadhu.
20 Hatte yannara rodiise Abeseloomi togo yiise: “Rodiikki Aminooni wonaanku ledokki no? Rodooꞌya xa sammi yii. Isi rodookkiiti. Tenne daafira calla heddanni yaaddooti.” Hakkiinni Tiimaari mannuwiinni baxxite, rodiise Abeseloomi mine heedhu.
21 Moote Daawiti konne coye baala macciishshiti lowo geeshsha hanqi. Ikkollana Aminooni bayra beettosi ikkinohura lowo geeshsha baxannosi daafira, iso dadillisa dihasiꞌrino.
22 Abeseloomino Aminoonira tenne teꞌenne diyiino; korkaatuno Abeseloomi, Aminooni rodoosi Tiimaari shollishino daafira iso giwino.
23 Lamu diri gedensaanni, Efireemi katami mule Baꞌꞌaali-hatsoori yinanniwa Abeseloomi manni geꞌreewisira orda haxanni no; Abeseloomino mootennita labballi ooso baala jilaho woshshi.
24 Hakko daafira Abeseloomi mootenniwa mare togo yii: “Ani soqqamaanchikki geꞌreewiꞌyara orda haxanni noommona, eeggatena mootenna soqqamaanosi ledoꞌya hadhona.”
25 Moote kayinni Abeseloomira, “Deeꞌni beettoꞌya. Ninke baalunku haꞌnummoro duha ikkineemmohe” yii. Abeseloomi ledosi haꞌranno gede hige hige huuccinoha ikkirono, moote kayinni giwi; hatteentenni iso maassiꞌrisi.
26 Hakkiinni Abeseloomi, “Ati haꞌra giwittoro rodiiꞌya Aminooni ledonke haꞌranno gede assi ballo” yii. Mooteno, “Aminooni ate ledo mayra haꞌranno?” yii.
27 Abeseloomi kayinni wotto worisi; hakko daafira Daawiti, Aminooninna mootenniti labballi ooso baala hadhanno gede assi.
28 Hakkiinni Abeseloomi soqqamaanosi togo yee hajaji: “Seekkitine laꞌe. Anino Aminooni woyne age dimbanno woyte, ‘Aminooni shiiyye!’ yeemmoꞌne; kiꞌneno shitinanni. Hajajoommoꞌnehu aneetina waajjitinoonte. Jawaatte; worbuulle ikke.”
29 Hakko daafira Abeseloomi soqqamaano isi hajajinonsa garinni Aminooni shitu; hakkiinni wole mootete ooso baala kaꞌe mittu mittunku gaangonsa guluffe xooqqu.
30 Insa doogote heedheenna Daawitira, “Abeseloomi mootete ooso baala shee gudino; mittuno digatino” yine kullisi.
31 Hatte yannara moote kae uddanosi dare uulla diriire uwi; soqqamaanosi baalano uddanonsa darte mulesi uurritu.
32 Ikkirono Daawiti rodii Shiimiahi beetti Iyyoonaadaabi togo yii: “Mootichaꞌya, mootennita labballi ooso baala shine gundoonnihu gede assite heddooti; reynohu Aminooni callaati. Tenne assinanni gede hajajinohu Abeseloomiiti; isi Aminooni rodoosi Tiimaari shollishi barrinni kayse tenne assate mixiꞌre no.
33 Xaano ikkiro mootichaꞌya, ‘Mootennita labballi ooso baala shine gundoonni’ yaanno duduwo ammantooti;* reynohu Aminooni callaatina.”
34 Hatte mereero Abeseloomi xooqe bai. Gedensoonni katamu agaraanchi isira badheenni ilaalu mule noo doogo amade lowo manni daanni nooha lai.
35 Hatte yannara Iyyoonaadaabi moote togo yii: “Ani soqqamaanchikki yuummonte gede kuneeti mootete ooso higgino.”
36 Isi coyiꞌre kaꞌꞌanni heeꞌreennanni mootete ooso huuronsa naggi assite wiꞌlitanni eꞌu; mootenna soqqamaanosi baalano hururante wiꞌlitu.
37 Abeseloomi kayinni xooqe Geshuuri moote Amihuudi beetti Talmaywa haꞌri. Daawitino beettisira lowo barra wiꞌli.
38 Abeseloomi xooqe Geshuuri haꞌrihu gedensaanni, hakko sase diro keeshshi.
39 Jeefote Moote Daawiti Abeseloomiwa haꞌrate quqquxami; korkaatuno isi Aminooni shiiꞌre manchitinohu sheshifatino.*
