“දුෂ්ටයෝ තණකොළ මෙන් වැඩෙන්නෝය. නපුරු ක්‍රියා කරන්නෝ සශ්‍රීක වන්නෝය. නමුත් අන්තිමේදී ඔවුහු සදහටම විනාශ වී යන්නෝය.”—ගීතාවලිය 92:7.

අපි කලින් ලිපියෙනුත් බලපු විදිහට මේ ලෝකේ තියෙන දුෂ්ටකම් එන්න එන්නම වැඩි වෙනවා. හැබැයි ඒ ගැන පුදුම වෙන්න ඕනෙ නැහැ. මොකද බයිබලේ 2 තිමෝති 3:1-5 කියන්නේ “අවසාන කාලයේදී” මිනිසුන්ගේ දුෂ්ටකම් වෙන කවදාටත් වඩා වැඩි වෙනවා කියලයි. අවසාන කාලය කියද්දී එතන කතා කරන අවසානය මොකක්ද? ඒ, දුෂ්ට මිනිසුන්ගේ අවසානය. දිගින් දිගටම දෙවියන්ට අකීකරු වෙන අයව ඔහු ළඟදීම විනාශ කරනවා. ඊටපස්සේ මේ පොළොවේ ඉතුරු වෙන්නේ දෙවියන්ට කීකරු, යහපත් අය විතරයි.—ගීතාවලිය 37:29.

“සමාදානය ලබා දෙන දෙවි සාතන්ව ඔබේ පාද යට දමා පොඩි කරන්නේය.”—රෝම 16:20.

සාතන් සහ භූතයන් ඇතුළු හැම දුෂ්ටයෙක්ම විනාශ වුණාට පස්සේ මේ පොළොව සාමයෙන් පිරිලා ඉතිරිලා යනවා. එදාට කිසිම කෙනෙක් අපිව “බිය ගන්වන්නේ නැහැ” කියලා අපේ නිර්මාතෘ පොරොන්දු වෙලා තියෙනවා.—මීකා 4:4.

‘දෙවි ඔවුන්ගේ ඇස්වලින් සියලු කඳුළු පිස දමන්නේය. මරණයද තවත් නොවන්නේය. වැලපීමද හැඬීමද වේදනාවද තවත් නොවන්නේය.’—එළිදරව් 21:4.

සාතන් නිසා, ආදම් සහ ඒව නිසා, අපේම පව්කාරකම නිසා ඇති වෙලා තියෙන හැම නරක දෙයක්ම දෙවියන් සම්පූර්ණයෙන්ම නැති කරලා දානවා. එදාට අපි දුක් විඳින්නේවත් ලෙඩ වෙන්නේවත් නැහැ. ඒ විතරක් නෙමෙයි කිසිම කෙනෙක් මැරෙන්නෙත් නැහැ. අපේ නිර්මාතෘට ආදරය කරන, ඔහුට කීකරු වෙන අයට හැමදාටම සතුටින් ජීවත් වෙන්න පුළුවන්. ඒත් එයාලා ජීවත් වෙන්නේ කොහේද?

“වැලි කතරද වියළි දේශයද සතුටෙන් පිනා යන්නේය. පාළුකරය කෙතේ මලක් මෙන් පිබිදී ප්‍රීතියෙන් ඉපිල යන්නේය.”—යෙසායා 35:1.

දෙවියන් ළඟදීම හැම නරක දෙයක්ම නැති කළාට පස්සේ මුළු පොළොවම ලස්සන පාරාදීසයක් වෙනවා. ඒ කාලේදී මල් වතුවලින්, ලස්සන උයන්වලින් පොළොව පිරිලා තියෙයි. රස නහර පිනවන කෑම ඇති තරම් ලැබෙයි. (ගීතාවලිය 72:16) එදාට සාගර, ඇළදොළ සහ ගංගා පිරිසිදු වෙන නිසා ජීවීන්ට කිසිම හානියක් වෙන්නේ නැහැ. “පරිසර දූෂණය” කියන වචනෙවත් අපිට මතක් වෙන එකක් නැහැ. මිනිස්සු හැමෝම තමන්ටම කියලා ගෙයක් දොරක් හදාගෙන සතුටින් ජීවත් වෙයි. ආයේ කවදාවත් දුප්පත්කම නිසා, ගෙයක් දොරක් නැති නිසා, කන්න බොන්න දෙයක් නැති නිසා මිනිස්සු දුක් විඳින්නේ නැහැ.—යෙසායා 65:21, 22.

“මිය ගිය අය නැවත ජීවත් වනු ඇත.”—යෙසායා 26:19.

මරණය නිසා වෙන් වුණු ඔයාගේ ආදරණීයයන්ව දකින්න ඔයා ආසයිද? සියලු බලැති දෙවියන් පොරොන්දු වෙලා තියෙනවා මැරුණු අයට ආයෙත් ජීවත් වෙන්න අවස්ථාව දෙනවා කියලා. ඒ අයව දකිද්දී ඔයාට කොච්චර සතුටක් දැනෙයිද? ඒ අය ඔයාව දකිද්දී එයාලට කොච්චර සතුටක් දැනෙයිද? ඇත්තටම ඒ පොරොන්දුව විශ්වාස කරන්න අපිට පුළුවන්. මොකද බාල, මහලු හුඟදෙනෙක්ට දෙවියන් ආයේ ජීවිතය දීපු අවස්ථා ගැන බයිබලේ තියෙනවා. ඒ වගේම යේසුස් මැරුණු අයට ආයේ ජීවිතය දෙනවා හුඟදෙනෙක් දැකලත් තියෙනවා.—ලූක් 8:49-56; යොහන් 11:11-14, 38-44.