Igitabo cya mbere cya Samweli 1:1-28

  • Elukana n’abagore be (1-8)

  • Hana wari ingumba, asenga asaba umwana (9-18)

  • Samweli avuka nyuma agahabwa Yehova (19-28)

1  Hari umugabo w’i Ramatayimu-sofimu* mu karere k’imisozi miremire ya Efurayimu witwaga Elukana, akaba yari umuhungu wa Yerohamu, umuhungu wa Elihu, umuhungu wa Tohu, umuhungu wa Sufi wakomokaga kuri Efurayimu.  Yari afite abagore babiri, umwe yitwaga Hana undi akitwa Penina. Penina yari afite abana, ariko Hana we nta bana yagiraga.  Buri mwaka, uwo mugabo yavaga mu mujyi w’iwabo, akazamuka akajya i Shilo gusenga* Yehova nyir’ingabo no kumutambira igitambo. Aho ni ho abahungu ba Eli babiri, ari bo Hofuni na Finehasi, bakoreraga Yehova ari abatambyi.  Umunsi umwe Elukana agiye gutamba igitambo, yafashe inyama kuri icyo gitambo, aha Penina umugore we n’abahungu be bose n’abakobwa be bose.  Hana we yamuhaye inyama nziza kurusha izindi kubera ko ari we yakundaga cyane. Ariko nta bana Yehova yari yaramuhaye.*  Penina* yahoraga acyurira Hana, kugira ngo amubabaze kuko nta bana Yehova yari yaramuhaye.  Ibyo ni byo Penina yakoreraga Hana buri mwaka. Igihe cyose Hana yazamukaga agiye ku nzu ya Yehova, Penina yaramusererezaga ku buryo yariraga cyane akananirwa kurya.  Ariko umugabo we Elukana akamubaza ati: “Hana, urarizwa n’iki? Kuki utarya? Kuki ubabaye cyane?* Ese kuba umfite, ntibiruta kugira abahungu 10?”  Igihe bari bakiri i Shilo, bamaze kurya no kunywa, Hana arahaguruka. Icyo gihe Eli umutambyi yari yicaye ku ntebe iruhande rw’umuryango w’urusengero* rwa Yehova. 10  Hana yari afite agahinda kenshi, nuko atangira gusenga Yehova arira cyane. 11  Ahiga umuhigo ati: “Yehova nyir’ingabo, niwita ku kababaro kanjye, ukanyibuka njyewe umugaragu wawe, ntunyibagirwe ukampa umwana w’umuhungu, nzamuha Yehova amukorere igihe cyose kandi ntazigera yogoshwa umusatsi.” 12  Nuko amara umwanya munini asengera imbere ya Yehova, Eli amwitegereza. 13  Hana yasengeraga mu mutima, iminwa ye ikanyeganyega ariko ijwi ntiryumvikane, bituma Eli akeka ko yasinze. 14  Aramubwira ati: “Uzakomeza gusinda ugeze ryari? Reka inzoga.” 15  Hana aramusubiza ati: “Oya databuja, ndi umugore wishwe n’agahinda,* nta divayi cyangwa inzoga nanyoye, ahubwo ndabwira Yehova ibiri mu mutima wanjye byose. 16  Ntutekereze ko ndi umugore utagize icyo amaze, kubera ko umubabaro mwinshi n’agahinda ari byo byatumye mara igihe kinini nsenga.” 17  Eli aramusubiza ati: “Igendere amahoro, Imana ya Isirayeli iguhe ibyo uyisabye.” 18  Nuko Hana aramubwira ati: “Urakoze kuba unyitayeho njyewe umugaragu wawe.” Uwo mugore ava aho aragenda, ararya, ntiyongera kugaragaza ko ababaye. 19  Bazinduka kare mu gitondo bunamira Yehova, hanyuma basubira iwabo i Rama. Elukana aryamana n’umugore we Hana, maze Yehova yita* kuri uwo mugore. 20  Nuko mu gihe kingana n’umwaka* Hana aratwita kandi abyara umwana w’umuhungu amwita Samweli,* kuko yavugaga ati: “Namusabye Yehova.” 21  Nyuma y’igihe Elukana azamukana n’abo mu rugo rwe bose, bajya gutamba igitambo yatambiraga Yehova buri mwaka n’igitambo cye cyo guhigura umuhigo. 22  Ariko Hana we ntiyazamuka, ahubwo abwira umugabo we ati: “Uyu mwana namara kuva ku ibere* nzamujyana. Azajya* imbere ya Yehova, agumeyo.” 23  Umugabo we Elukana aramubwira ati: “Kora ibyo wumva bikwiriye.* Guma mu rugo kugeza igihe azavira ku ibere. Yehova azakore ibyo uvuze.” Uwo mugore aguma mu rugo akomeza konsa umwana we kugeza avuye ku ibere. 24  Nuko uwo mwana akimara kuva ku ibere, Hana arazamuka amujyana i Shilo, ajyana n’ikimasa gifite imyaka itatu, ifu,* n’ikibindi kinini cya divayi, maze yinjira mu nzu ya Yehova ari kumwe n’uwo mwana. 25  Nuko babaga icyo kimasa, maze uwo mwana w’umuhungu bamushyira Eli. 26  Hana aravuga ati: “Databuja, ndahiriye imbere yawe ko ari njye wa mugore wari uhagararanye nawe hano nsenga Yehova. 27  Uyu mwana ni we nasabaga, none Yehova yasubije isengesho ryanjye aramumpa. 28  Nanjye muhaye* Yehova. Azaba uwe igihe cyose azaba akiriho, kuko namuhaye Yehova.” Nuko Elukana yunamira Yehova.

Ibisobanuro ahagana hasi

Cyangwa “w’i Rama, wakomokaga kuri Sufi.”
Cyangwa “kunamira.”
Mu rurimi iki gitabo cyanditswemo ni “Yehova yari yaramuzibye inda ibyara.”
Cyangwa “undi mugore wa Elukana.”
Cyangwa “Kuki umutima wawe utishimye?”
Ni ukuvuga, ihema ryo guhuriramo n’Imana.
Cyangwa “ndi umugore ufite umutima ubabaye.”
Mu rurimi iki gitabo cyanditswemo ni “yibuka.”
Bishobora no kuvugwa ngo: “Igihe kigeze.”
Bisobanura “izina ry’Imana.”
Cyangwa “gucuka.”
Mu rurimi iki gitabo cyanditswemo ni “nzamumurikira Yehova.”
Mu rurimi iki gitabo cyanditswemo ni “ibyo ubona ko ari byiza.”
Mu rurimi iki gitabo cyanditswemo ni “efa y’ifu.” Ni ukuvuga ifu yashoboraga kujya mu kintu cya litiro 22. Reba Umugereka wa B14.
Mu rurimi iki gitabo cyanditswemo ni “namutije.”