1-3. 1) ¿Imastataj bautizakuytawan kausayninchejpi tijrachinallapuni kanqa? 2) Kikin imaspi pantashallanchejpuni chay, ¿imastataj tapurikusunman? (Patapi kaj dibujota qhawariy.)

KEVINQA ^[1] manaraj Jehovaj testigon kashaspa, ashkha watasta qolqerayku pujllaj, cigarrosta pitaj, drogakoj, machaj ima. Jehovamanta yachakuspataj, amigon kayta munarqa. Chaywanpis niraj bautizakushaspa, chay tukuy imasta saqenanpaj kallpachakorqa. Tukuy chaytataj saqerqa Jehovaj yanapayninwan, Diospa Palabranpa yanapayninwan ima (Heb. 4:12).

² Kevinqa bautizakuytawan, sumaj cristiano kananpaj kausayninta tijrachinallanpuni karqa (Efe. 4:31, 32). Sutʼincharinapaj, payqa imamantapis phiñarparikullaj. Repararqataj usqhayllata mana phiñarparikunanpaj mayta kallpachakunan kasqanta. Pay nin: “Qolqerayku pujllayta, cigarrosta pitayta, drogakuyta, machayta saqepuyta atillarqani. Chaywanpis phiñakuyniywan atipachikullajpuni kani”, nispa. Chayrayku Jehovaj yanapayninta mayta mañakorqa. Chantá Bibliata sumajta  estudiarqa. Ajinamantataj ñaupa kausayninta saqeporqa.

³ Niraj bautizakushaspa, noqanchejmanta ashkhas kausayninchejta tijrachinanchej karqa. Ajinamanta Bibliaj nisqanta juntʼarqanchej. Chaywanpis ichá reparanchej Jehová jina, Jesucristo jina astawan ruwanapaj kausayninchejta tijrachinanchejraj kasqanta (Efe. 5:1, 2; 1 Ped. 2:21). Sutʼincharinapaj, ichá reparakunchej anchata quejakusqanchejta, cuento qʼepis kasqanchejta, runata manchachikusqanchejta chayri imapipis pantasqanchejta. Ichapis ashkha watastaña sumaj cristianos kanapaj kallpachakunchej, jinapis kikin imaspi pantashallanchejpuni. Chayrayku ichapis tapurikusunman: “¿Imaraykutaj mana atillanichu kay imasta saqeyta? ¿Imatataj ruwayman Bibliaj nisqanman jina kausayniyta tijrachinallaypajpuni?”, nispa.

4. ¿Imaraykú Jehovata mana kusichiyta atillanchejchu?

⁴ Jehovata munakunchej, tukuy sonqotaj kusichiyta munanchej. Chaywanpis pantaj runas kasqanchejrayku, mana kusichiyta atillanchejchu. Ashkha kutispi Pablo jina ninchej, pay nerqa: “Noqaqa allin kajtapuni ruwayta munani; jinapis mana atinichu”, nispa (Rom. 7:18; Sant. 3:2).

5. 1) ¿Imastataj bautizakunanchejpaj saqerqanchej? 2) ¿Imaraykutaj kallpachakunallanchejpuni tiyan? Sutʼinchay.

⁵ Bautizakunapaj, Jehovaj testigon kanapaj ima, Jehová Diospa chejnisqan imasta saqeporqanchej (1 Cor. 6:9, 10). Chaywanpis pantaj runasllapuni kasqanchejrayku, ashkha watastaña bautizasqa kaspapis pantallanchejpuni (Col. 3:9, 10). Ichá wakin kutisqa mana allin imaspi yuyasunman chayri mana allin imasta munasunman. Manachayri kausayninchejpi imatapis mana atipayta atishallanchejchu. Ichapis chayta atipanapaj ashkha watastaña kallpachakushanchej.

6, 7. 1) Pantaj runas kaspapis, ¿imaraykutaj Jehovaj amigosnin kayta atisunman? 2) ¿Imaraykutaj perdonanawanchejta Jehovamanta mañakunallanchejpuni tiyan?

⁶ Pantaj runas kaspapis, Jehovata sirviyta, paywan amigos kayta atinchej. Nitaj qonqanachu Jehovaj amigosnin kasqanchejta, pay allin imasta noqanchejpi rikusqanrayku, rejsinanchejta munasqanrayku ima (Juan 6:44). Jehovaqa yacharqa pantaj runas kasqanchejta, pantaj runas kasqanchejraykutaj juchallinchej, pantanchej ima. Jinapis Jehovaqa amigosnin kananchejta munarqa.

⁷ Jehová mayta munakuwasqanchejrayku, may munasqa Wawanta kay Jallpʼaman kachamorqa kausayninta juchanchejrayku qonanpaj (Juan 3:16). Pantajtinchej, Jehovamanta perdonanawanchejta mañakusunman. Jesús kausayninta qosqanraykutaj, Jehovaqa perdonawanchej, amigosninllanpuni kananchejtataj saqewanchej (Rom. 7:24, 25; 1 Juan 2:1, 2). Jesusqa juchasninkumanta pesachikojkunarayku wañorqa. Chayrayku pantaykuspa chʼichipaj qhawakunchej chayqa, Jehovamanta perdonanawanchejta mañakuna. Perdonanawanchejta mana mañakojtinchejqa, makisninchejta chʼichi kashajtin mana mayllakuyta munay jina kanman. Mayta agradecekunchej pantaj runas kajtinchejpis Jehová amigosnin kananchejta saqewasqanchejmanta (1 Timoteo 1:15 leey).

8. ¿Imaraykú kallpachakunallanchejpuni tiyan mana pantanapaj?

⁸ Chantapis kallpachakunallanchejpuni tiyan mana pantananchejpaj. Jehovaqa niwanchej imayna runastachus amigosninpaj  qhawasqanta (Sal. 15:1-5). Chayrayku Jehovaj amigosnin kayta munanchej chayqa, pay jina, Wawan jina ruwananchejpaj kallpachakunanchej tiyan. Sajra munayninchejta atipanapajpis kallpachakunanchej tiyan, atikojtintaj chinkachinanchej tiyan. Ashkha watastaña bautizasqas kaspapis, sumaj cristianos kanapaj kallpachakunallanchejpuni tiyan (2 Cor. 13:11).

9. ¿Imaynatá yachanchej “mosoj runa kaywan pʼachawan jina” pʼachallikunallanchejtapuni?

⁹ Apóstol Pablo cristianosman nerqa: “Ñawpa sajra kawsayniykichejpi karqa, chay mawkʼa runamanta tʼaqakuychej, imaraykuchus chayqa sajra munaynimpa atipasqan, chʼawkiyasqantaj. Qankunaqa mosojman tukuychej sonqoykichejpa yuyaynimpi. Chay mosoj runa kaywan pʼachawan jina pʼachallikuychej, mayqenchus Diosman jina ruwasqa, cheqan kaypi, cheqamanta santo kaypiwan kashan, chaywan”, nispa (Efe. 4:22-24). Kayqa niyta munan kausayninchejta tijrachinapaj kallpachakunallanchejpuni kasqanta, “mosoj runa kaywan pʼachawan jina” pʼachallikunallanchejpuni kasqanta ima. Chayrayku Jehovata unaytaña sirvispapis, kʼacha kaykunasninmanta yachakuyta atillanchejpuni. Bibliataj yanapallawasunpuni sumaj cristianos kanapaj, Jehová jina ruwanapaj ima.

10. 1) ¿Imatataj ruwananchej tiyan Bibliaj nisqanman jina kausayninchejta tijrachinallapajpuni? 2) ¿Ima tapuykunatataj tapurikusunman?

¹⁰ Tukuypis imatachus Biblia nisqanta kasukuyta munanchej. Chaywanpis kausayninchejta tijrachillaytapuni munanchej chayqa, mayta kallpachakunanchej tiyan. ¿Imaraykutaj mayta kallpachakunanchej tiyan? ¿Manachu Jehová yanapawasunman mana kallpachakuspalla cheqan kajta ruwanapaj?

11-13. ¿Imaraykutaj Jehová suyan cheqan kajta ruwanapaj kallpachakunanchejta?

¹¹ Jehovaj tukuy ima ruwasqasninpi tʼukurispaqa, imatapis ruwananpaj may atiyniyojpuni kasqanta reparanchej. Sutʼincharinapaj, Inteqa may atiyniyoj. Sapa segundotaj may chhika kʼanchayta, may chhika calorta ima wijchʼun. Chaykunamantataj pisisitulla necesitakun Jallpʼapi kausay kananpaj (Sal. 74:16; Isa. 40:26). Chantapis Jehovaqa kay Jallpʼapi kaj kamachisninman necesitajtinku atiyta qon (Isa. 40:29). Sutʼita rikunchej Jehová munanman chayqa may atiyniyoj kasqanrayku yanapawasunman mana kallpachakuspalla cheqan kajta ruwanapaj. Chantá, ¿imaraykú chayta mana ruwanchu?

¹² Jehovaqa sapallanchejmanta ajllayta atinapaj jina ruwawarqanchej. Chayrayku saqewanchej payta kasukuytachus manachus ajllananchejta. Kasukuyta ajllajtinchej, imatachus munasqanta ruwanapaj kallpachakojtinchej ima, payta munakusqanchejta, agradecekusqanchejta ima rikuchinchej. Satanasqa Jehová mana allintachu kamachin nispa nin. Chaywanpis Jehovata kasukuspa pay kamachinawanchejta munasqanchejta rikuchinchej. Jehovataj payta sirvinapaj kallpachakusqanchejta jatunpaj qhawan (Job 2:3-5; Pro. 27:11). Mana atikullajtinpis cheqan kajta ruwanapaj mayta kallpachakojtinchejqa, Jehovaman cheqa sonqo kasqanchejta, kamachinawanchejta munasqanchejta ima rikuchinchej.

¹³ Jehovaqa pay jina kʼacha kaykunata rikuchinapaj kallpachakunanchejta niwanchej (Col. 3:12; 2 Pedro 1:5-7 leey). Jehovaqa imatachus yuyasqanchejwan, imachus sonqonchejpi kasqanwan ima mana atipachikunata munanchu (Rom. 8:5; 12:9). Jehová munasqanman jina ruwaspaqa,  sumaj cristianosman tukunapaj Biblia yanapashawasqanchejta rikunchej. Chaytaj mayta kusichiwanchej.

14, 15. ¿Imatataj ruwasunman Jehovaj kʼacha kaykunasninta rikuchinapaj? (“ Biblia, mañakusqanku ima kausayninkuta tijracherqa”, nisqa recuadrota leey.)

¹⁴ ¿Imatataj ruwasunman kʼacha kaykunasniyoj kanapaj, Jehovata kusichinapaj ima? Imatachus noqanchej tijrachinanchejpi yuyanamantaqa, Jehová yanapanawanchejta saqena. Romanos 12:2 nin: “Ama kay pacha runaspa yuyasqankuman jina kausayman yachakuychejchu; astawampis sonqoykichejpi, yuyayniykichejpi ima mosojyachisqa kaychej. Ajinapi yachankichej imaynachus Diospa munaynin kasqanta kʼacha, Diosta kusichej, juntʼasqataj”, nispa. Imatachus Jehová ruwananchejta munasqanta yachanapajqa, ima yanapastachus qowasqanchejwan yanapachikuna. Chayrayku Bibliata sapa pʼunchay leena tiyan, leesqanchejpi tʼukurina tiyan, Jehovamantataj atiyninta mañakuna tiyan (Luc. 11:13; Gál. 5:22, 23). Chayta ruwajtinchejqa Jehová yanapawasunchej imaschus kusichisqanta entiendenapaj, chantapis pay jina yuyayta yachakusunchej. Ajinamantataj imatachus yuyasqanchej, ruwasqanchej, nisqanchej ima Jehovata astawan kusichenqa. Jinapis cheqan kajta ruwanapaj kallpachakunallapuni tiyan (Pro. 4:23).

¹⁵ Sapa pʼunchay Bibliata leespapis, publicacionesninchejwan Bibliata estudianapaj yanapachikuna. Ajinamanta Jehová jina kʼacha kaykunata rikuchisun. Wakin hermanosqa sumaj cristianos kanankupaj, ima sajra ruwaytapis atipanankupaj parlaj versiculosta, Torremanta Qhawaj, ¡Despertad! revistaspi yachaqanasta ima, marcaykunku chayri señalaykunku sapa kuti qhawaykurinankupaj.

16. ¿Imaraykutaj mana llakikunanchejchu tiyan kausayninchejta mana usqhayllatachu tijrachishasqanchejta reparaspa?

¹⁶ Jehová jina kʼacha kaykunasta rikuchinapaj mayta kallpachakunallanchejpuni tiyan. Imaraykuchus ichapis reparanchej sumaj cristianosman tukunapaj mana usqhayllatachu kausayninchejta tijrachishasqanchejta, chaypajqa pacienciakuna tiyan. Ichapis ñaupajtaqa Biblia nisqanman jina ruwanapaj mayta kallpachakunanchej kanqa. Chaywanpis ama saykʼunachu. Jehová jina ruwanapaj, yuyanapaj astawan kallpachakusun chayqa, pay jina yuyayta, cheqan kajta ruwayta ima atillasun (Sal. 37:31; Pro. 23:12; Gál. 5:16, 17).

17. Jehovaman cheqa sonqollapuni kasun chay, ¿imatataj aswan qhepaman ruwayta atisun?

¹⁷ Mayta suyakushanchej tumpamantawan manaña pantaj runas kananchejta, Jehovatataj wiñaypaj sirvinanchejta. Imaraykuchus chay tiempopeqa manaña kunan jina ni imapi pantananchejpaj kallpachakunachu kanqa, Jehová jinataj ruwayta atillasun. Chaywanpis Jesús kausayninta qosqanrayku Jehovata yupaychayta atinchej. Kausayninchejta tijrachinapaj, Biblianejta Jehová yachachiwasqanchejta kasukunapaj kallpachakullasunpuni chayqa, Jehovata kusichiyta atisunchej.

18, 19. ¿Imaynatá yachanchej kausayninchejta tijrachinapaj Biblia atiyniyoj kasqanta?

¹⁸ Kevinqa mayta kallpachakorqa mana usqhayta phiñakunanpaj. Imatachus Bibliapi leesqanpi tʼukurerqa, chayman jina kausakunanpajtaj kallpachakorqa. Hermanospa yuyaychayninkutapis kasukorqa. Kausayninta tijrananpaj watas pasajtinpis, tiemponman siervo ministerial jina llankʼarqa. Anciano jinataj 20 watastaña llankʼashan. Jinapis kallpachakunallanpuni tiyan mana usqhayta phiñakunanpaj.

¹⁹ Kevin jina, noqanchejpis sumaj cristianos kanallapajpuni kallpachakuyta atinchej. Chayta ruwasun chayqa Jehovaj sumaj amigosnin kasunchej (Sal. 25:14). Jehovata kusichinanchejrayku kausayninchejta tijrachinapaj tukuy imata ruwasunchej chayqa, Jehová yanapawasunchej kausayninchejta tijrachinapaj. Ajinamantataj rikusunchej Biblia kausayninchejta tijrachinapaj atiyniyoj kasqanta (Sal. 34:8).