Bon Notisia Segun Marko 13:1-37
13 Ora Hesus tabata sali for di tèmpel, un di su disipelnan a bis’é: “Maestro, wak e piedranan i e edifisionan bunita akí!”+
2 Hesus a bis’é: “Bo ta mira tur e edifisionan grandi akí? Ni un di e piedranan akí lo no keda riba otro. Nan tur lo ser bashá abou.”+
3 Ora ku Hesus tabata sintá riba Seru di Oleifi ku bista riba e tèmpel, Pedro, Santiago, Huan i Andres a bini nan so serka dje i puntr’é:
4 “Bisa nos: Ki dia e kosnan ei ku bo a papia di dje lo sosodé? Ora tur e kosnan akí ta yegando na un fin, ki señal lo indiká esei?”+
5 Hesus a bisa nan: “Tene kuidou! No laga ningun hende gaña boso.+
6 Hopi hende lo bini den mi nòmber i bisa: ‘Ta ami ta Kristu.’ Nan lo gaña hopi hende.
7 Ademas, ora boso haña boso ku guera òf tende di guera, no spanta. E kosnan akí tin ku sosodé, pero ainda no ta e fin.+
8 Nashon lo lanta kontra nashon i reino kontra reino.+ Lo tin temblor na vários lugá i skarsedat di kuminda.+ E kosnan ei ta kuminsamentu di kalamidat, manera doló di parto.+
9 I boso, boso mester tene kuidou! Hende lo entregá boso den man di e kortenan lokal,+ i hende lo bati boso den snoa.+ Nan lo hiba boso dilanti di gobernador i dilanti di rei pa mi motibu. E ora ei, boso lo por duna nan testimonio tokante mi.+
10 Ademas, promé ku e fin yega, mester prediká bon notisia na tur nashon.+
11 Ora ku nan bai ku boso pa entregá boso den man di outoridat, no bira nèrvioso i preokupá, pensando kiko pa bisa. Papia loke bini na boso mente na e momento ei, pasobra no ta boso ta papia. Ta spiritu santu ta papia pa boso.+
12 Ruman lo laga mata ruman. Tata lo laga mata yu. Yu lo lanta kontra nan mayornan i laga mata nan.+
13 Tur hende lo odia boso pa motibu di mi nòmber.+ Pero e personanan ku perseverá te na fin+ lo ser salbá.+
14 Ora boso mira ‘e kos repugnante’ ku ta kousa destrukshon+ pará kaminda e no mester ta (lektor usa disernimentu pa komprondé esaki), e ora ei, e hendenan ku ta na Hudea mester hui bai den e serunan.+
15 E hendenan ku ta riba dak* no mester baha abou ni drenta kas pa bai kohe nada.
16 I e hendenan ku ta den kunuku no mester bira bai kas bèk pa kohe paña ni nada otro.
17 Ai di e hende muhénan na estado i ai di e mamanan ku tin yu na lechi den e dianan ei!+
18 Resa pidi Dios bes tras bes pa boso no tin ku hui den wenter,
19 pasobra e periodo ei lo ta un periodo masha difísil.*+ For di prinsipio di kreashon* te ku awor, nunka algu asina no a yega di sosodé ni nunka mas algu asina lo no bolbe sosodé.+
20 Si Yehova* no hasi e periodo di tribulashon ei* kòrtiku, ningun hende* lo no salba. Pero pa motibu di e personanan ku el a skohe, lo e hasi e periodo ei kòrtiku.+
21 Anto si un hende bisa boso: ‘Wak! Ata Kristu aki’ òf ‘Wak! At’é aya!’, no ker’é,+
22 pasobra Kristu falsu i profeta falsu lo presentá,+ i nan lo hasi milager i kos impreshonante pa gaña asta e personanan skohí.
23 P’esei, tene kuidou!+ Mi ta bisa boso tur kos di antemano.
24 Den e tempu ei, despues di e tribulashon ei, solo lo bira skur; luna lo no bria mas;+
25 e streanan lo kai for di shelu i e podernan selestial lo ser sagudí.
26 Dado momento, hende lo mira e Yu di hende+ bini den nubia ku gran poder i gloria.+
27 Riba su òrdu, e angelnan lo sali bai e kuater skinanan di mundu,* for di e punta di mas leu di tera te na e punta di mas leu di shelu, i lo e reuní e personanan ku a ser skohí.+
28 Tuma, por ehèmpel, un palu di figu: Asina ku taki nobo kuminsá sprùit i saka blachi, boso sa ku zomer ta serka.+
29 Di igual manera, ora boso mira e kosnan akí ta sosodiendo, boso por ta sigur ku e Yu di hende ta serka di yega.*+
30 Mi ta sigurá boso: E generashon akí lo no kaba na nada i disparsé promé ku tur e kosnan akí tuma lugá.+
31 Shelu i tera lo disparsé,+ pero mi palabranan sí lo keda pa semper.+
32 Pa loke ta e dia òf e ora, ningun hende no sa, ni e angelnan den shelu ni e Yu. Ta e Tata so sa esei.+
33 Keda alerta i lantá,+ pasobra boso no sa ki tempu ta e tempu stipulá.+
34 Ta manera kaso di un hòmber ku a biaha pa eksterior. El a laga su kas na enkargo di su esklabonan,+ i el a duna kada un di nan trabou. Anto el a duna e pòrtir* òrdu pa keda alerta.+
35 P’esei, keda alerta, pasobra boso no sa ki ora e doño di kas ta yega.+ E por yega anochi, meianochi, ora gai kanta* òf mainta trempan.*+
36 Keda alerta pa e no haña boso drumí ora e yega pasobra e ta yega un ora pa otro.+
37 Loke mi ta bisa boso, mi ta bisa tur hende: Keda alerta.”+
Nota
^ Lit.: “pasobra e dianan ei lo ta dia di tribulashon.”
^ Òf: “For di dia ku Dios a krea mundu.”
^ Lit.: “ningun karni.”
^ Òf: “e dianan ei.”
^ Lit.: “e kuater bientunan.” Esaki ke men bientu for di nort, ost, zùit i wèst.
^ Òf: “e Yu di hende ta na porta.”
^ Òf: “e wardadó di porta.”
^ Òf: “mardugá.”
