Bon Notisia Segun Marko 12:1-44

TOKA NA

Ilustrashon tokante algun kunukero malbado (1-12)
Dios i Sésar (13-17)
Pregunta tokante resurekshon (18-27)
E dos mandamentunan di mas importante (28-34)
Kristu ta yu di David? (35-37a)
Hesus ta bisa e hendenan pa nan tene kuidou ku e eskribanan (37b-40)
Un biuda pober ta duna dos moneda di poko balor (41-44)

12 Hesus a kuminsá papia ku e hendenan pa medio di ilustrashon. El a bisa nan: “Un hòmber a disidí di planta wendrùif den su kunuku.+ El a traha un tranké rònt di e tereno; el a koba un baki pa machiká wendrùif, i el a traha un toren di vigilansia.+ Despues, el a hür e kunuku ku algun kunukero i biaha pa eksterior.+ ² Ora tabata tempu pa rekohé drùif, el a manda un di su esklabonan bai serka e kunukeronan pa tuma algun wendrùif serka nan. ³ E kunukeronan a gara e esklabo, batié mal batí i mand’é bai man bashí. ⁴ E ora ei, e doño a manda un otro esklabo serka nan. Nan a dal e esklabo ei riba su kabes i insult’é.+ ⁵ E doño a manda un otro esklabo, pero nan a mata e esklabo ei. E doño a manda hopi otro esklabo mas serka e kunukeronan, pero nan a bati algun di nan i mata algun di nan. ⁶ Tabatin un hende mas, e yu stimá di e doño.+ Por último, e doño a manda su yu stimá serka e kunukeronan, pensando: ‘Mi yu sí, nan lo respetá.’ ⁷ Pero e kunukeronan a bisa otro: ‘E hòmber akí ta e heredero.+ Laga nos mat’é, ya nos ta haña e herensia.’ ⁸ Nan a gar’é, mat’é i lastr’é benta pafó di e kunuku di wendrùif.+ ⁹ Kiko doño di e kunuku di wendrùif lo hasi? Lo e bini i mata e kunukeronan ei i hür su kunuku di wendrùif ku otro hende.+ ¹⁰ Skritura ta bisa: ‘E piedra ku e trahadónan a rechasá a bira e piedra di skina di mas importante.’*+ Boso no a yega di lesa esei den Skritura? ¹¹ Skritura ta bisa tambe: ‘Ta Yehova* a pon’é einan, i e ta presioso den nos bista.’+ Boso no a yega di lesa esei?” ¹² Den esei, e hendenan ku tabata kontra Hesus a kuminsá buska moda di arest’é, pasobra nan a ripará ku el a konta e ilustrashon ei ku nan na mente. Pero nan tabatin miedu di e multitut di hende. P’esei, nan a kita bai lag’é.+ ¹³ Nan a manda algun fariseo i algun hende ku tabata apoyá Heródes serka dje pa koh’é den trampa ku su mes palabranan.+ ¹⁴ Ora nan a yega, nan a bisa Hesus: “Maestro, nos sa ku bo ta papia bèrdat i ku bo no ta faboresé niun hende i ku bo no ta wak aparensia. Bo ta siña hende boluntat di Dios na armonia ku loke ta bèrdat. Pues, ta bon pa paga Sésar* belasting? Sí òf nò? ¹⁵ Nos mester paga belasting, òf nos no mester paga?” Hesus a ripará nan hipokresia; p’esei, el a bisa nan: “Dikon boso ta buska moda di laga mi kai den trampa? Mustra mi un denario.”* ¹⁶ Nan a trese un denario p’e. El a puntra nan: “Ken su kara i título ta riba e moneda akí?” Nan a bis’é: “Di Sésar.” ¹⁷ E ora ei, Hesus a bisa nan: “Duna Sésar loke ta di Sésar,+ i Dios loke ta di Dios.”+ Hesus su kontesta a laga nan keda masha impreshoná. ¹⁸ Awor, e saduseonan* tabata bisa ku lo no tin resurekshon.+ Nan a bini serka Hesus i puntr’é:+ ¹⁹ “Maestro, Moises a skirbi un mandamentu pa nos ku ta bisa ku si un hòmber kasá muri bai sin ku e tabatin yu, ruman hòmber di e hòmber ei mester kasa ku e biuda i haña yu ku e señora pa e ruman ku a muri.+ ²⁰ Nos sa di un kaso di shete ruman hòmber. E ruman hòmber mayó a kasa ku un señora, pero e hòmber a muri bai sin ku e tabatin yu. ²¹ E di dos ruman hòmber a kasa ku e biuda pero e tambe a muri bai sin ku e tabatin yu. A sosodé meskos ku e di tres ruman hòmber ²² i e otro ruman hòmbernan. Tur shete ruman hòmber a muri bai sin ku nan tabatin yu. Despues di tempu, e señora tambe a fayesé. ²³ Ora ta bai tin resurekshon, esposa di kua di e shete rumannan lo e ta? Pasobra nan tur shete tabatin e komo esposa.” ²⁴ Hesus a bisa nan: “Boso ta kiboká, pasobra boso no ta komprondé loke Skritura ta bisa ni boso no sa kon Dios ta usa su poder.+ ²⁵ Hende ku lanta for di morto lo no kasa; ni hòmber ni muhé lo no kasa. Nan lo ta manera angel den shelu.+ ²⁶ Pa loke ta e echo ku hende morto lo ser resusitá, boso no a lesa den buki di Moises, den e relato tokante e mata di sumpiña, ku Dios a bisa Moises: ‘Ami ta Dios di Ábraham, Dios di Ísak i Dios di Yákòb’?+ ²⁷ Dios no ta Dios di e mortonan, sino di e hendenan bibu. Boso ta kompletamente kiboká.”+ ²⁸ Un sierto eskriba ku a yega serka i sigui e kòmbersashon a ripará ku Hesus a kontestá e saduseonan masha bon mes. P’esei, el a puntra Hesus: “Kua mandamentu ta e mandamentu di mas importante?”*+ ²⁹ Hesus a kontest’é: “E mandamentu di mas importante* ta esaki: ‘Skucha, o Israel: Yehova* ta nos Dios. Ta un Yehova* so tin. ³⁰ Bo mester stima Yehova,* bo Dios, ku henter bo kurason, ku henter bo alma,* ku henter bo mente i ku tur bo forsa.’+ ³¹ E di dos mandamentu ta esaki: ‘Stima bo próhimo meskos ku bo mes.’+ No tin ningun otro mandamentu mas importante ku eseinan.” ³² E eskriba a bis’é: “Maestro, bo a papia bon. Loke bo a bisa ta bèrdat: ‘Ta un Dios so tin. No tin ningun otro Dios fuera di dje.’+ ³³ Hende mester stima Dios ku henter nan kurason, ku tur nan kapasidat di komprondé i ku tur nan forsa. I nan mester stima nan próhimo meskos ku nan mes. E dos mandamentunan ei ta muchu mas importante ku tur ofrenda kimá òf sakrifisio.”+ ³⁴ Hesus a mira ku e eskriba a kontestá na un manera inteligente. P’esei, Hesus a bis’é: “Bo no ta leu for di e Reino di Dios.” E ora ei, ningun hende no tabatin kurashi di puntra Hesus nada mas.+ ³⁵ Hesus a sigui siña hende den tèmpel. E tabata bisa e hendenan: “Dikon e eskribanan ta bisa ku Kristu ta yu di David?+ ³⁶ David mes a bisa pa medio di spiritu santu:+ ‘Yehova* a bisa mi Señor: “Sinta na mi man drechi te ora mi pone bo enemigunan bou di bo pia.”’+ ³⁷ David tabata yama Kristu ‘Señor.’ Pues, kon Kristu por ta yu di David?”+ Tabatin hopi hende presente. Nan tur tabata skucha Hesus ku smak. ³⁸ Ora Hesus tabata siña e hendenan, e tabata bisa nan: “Tene kuidou ku e eskribanan. Nan gusta kana rònt den paña largu. I riba plasa, nan gusta pa hende kumindá nan ku rèspèt.+ ³⁹ Den snoa, nan ta bai sinta te dilanti.* I na bankete, nan gusta e lugánan di mas prominente.+ ⁴⁰ Nan ta probechá di e biudanan; nan ta kita nan propiedatnan for di nan.* Anto pa bista di hende, nan ta hasi orashon largu. E eskribanan lo risibí un sentensia mas pisá.” ⁴¹ Hesus a bai sinta kaminda e tabatin bista riba e kahanan di plaka,+ i e tabata mira kon e hendenan tabata tira plaka den e kahanan. Tabatin hopi hende riku. Nan tabata tira hopi moneda den e kahanan.+ ⁴² Dado momento, a bini un biuda pober. El a tira dos moneda masha chikitu di poko balor* den un di e kahanan di plaka.+ ⁴³ Hesus a yama su disipelnan serka dje i bisa nan: “Mi ta sigurá boso: E biuda pober ei a tira mas sèn ku tur e otro hendenan ku a tira plaka den e kahanan di plaka,+ ⁴⁴ pasobra nan tur a tira for di loke nan tin èkstra, pero e biuda ei a tira tur su plaka, maske e ta den nesesidat.* El a tira tur loke e tabatin pa biba di dje.”+