Hosue 24:1-33
24 Hosue a reuní tur e tribunan di Israel na Síkèm. El a manda yama e ansianonan di Israel, e kabesantenan, e huesnan i e otro hendenan den puesto di outoridat,+ i nan a presentá dilanti di e Dios berdadero.
2 Hosue a bisa henter e pueblo: “Esaki ta loke Yehova, Dios di Israel, ta bisa: ‘Hopi tempu pasá,+ boso antepasadonan+—entre otro, Taré, tata di Ábraham i Nákòr—tabata biba na e otro banda di riu Eufrátes.* Nan tabata sirbi otro dios.+
3 Ku tempu, mi a saka Ábraham, boso antepasado,+ for di e otro banda di riu Eufrátes,* i mi a lag’é pasa den henter Kánan. Mi a laga su desendientenan bira hopi.*+ Mi a bendishon’é, i el a bira tata di Ísak.+
4 Ísak a bira tata di Yákòb i Esou.+ Esou, mi a duna seru Seír, komo propiedat.+ Anto Yákòb i Yákòb su yu hòmbernan a baha bai Egipto.+
5 Mas despues, mi a manda Moises i Áròn,+ i mi a kastigá Egipto ku plaga,+ i mi a saka boso for di einan.
6 Ora ku mi a saka boso tatanan for di Egipto,+ e egipsionan a persiguí boso tatanan ku garoshi di guera i ku koredó di kabai te na Laman Kòrá. Boso tatanan a yega Laman Kòrá.+
7 Nan a kuminsá sklama na Yehova pa yudansa.+ E ora ei, mi* a laga un skuridat reina entre boso i e egipsionan. Mi a laga laman basha bini riba e egipsionan i tapa nan.+ Ku boso mes wowonan, boso a mira loke mi a hasi na Egipto.+ Despues, boso a biba hopi aña* den desierto.*+
8 Mi a hiba boso teritorio di e amoreonan. E amoreonan tabata biba na e otro banda* di riu Yordan, i nan a bringa kontra boso.+ Mi a entregá nan den boso man, i boso por a poderá di nan teritorio. Mi a eliminá nan tur.+
9 Despues, Rei Bálak di Móab, yu hòmber di Zipor, a kuminsá un guera kontra Israel. El a manda yama Bálam, yu hòmber di Béòr, pa maldishoná boso.+
10 Pero mi a nenga di skucha Bálam.+ Bes tras bes, mi a pon’é bendishoná boso.+ Asina, mi a libra boso for di su man.+
11 Despues, boso a krusa riu Yordan,+ i boso a yega Yériko.+ E kabesantenan* di Yériko, e amoreonan, e perezitanan, e kananeonan, e heteonan, e guirgasitanan, e heveonan i e yebuseonan a bringa kontra boso, pero mi a entregá nan den boso man.+
12 Mas promé, mi a laga boso enemigunan sinti nan mes desesperá,* i nan a haña nan ta hui pa boso. Mi a kore ku e dos reinan amoreo tambe.+ No ta boso spadanan ni boso bognan a pone boso logra viktoria.+
13 Mi a duna boso un pais ku boso no a traha duru p’e i vários stat ku boso no a konstruí.+ Anto boso a bai biba den e statnan ei. Boso ta kome loke kunuku di wendrùif i loke hòfi di oleifi ta produsí. Sí, boso ta kome loke boso no a planta.’+
14 P’esei, teme* Yehova i sirbié fielmente.*+ Sòru pa boso ta hende ireprochabel.* Deshasí di tur e diosnan ku boso antepasadonan a sirbi na otro banda di riu Eufrátes* i na Egipto,+ i sirbi Yehova.
15 Si boso no ke sirbi Yehova, skohe awe ta ken boso ke sirbi: e diosnan ku boso antepasadonan a sirbi+ na otro banda di riu Eufrátes*+ òf e diosnan di e amoreonan ku tabata biba kaminda boso ta biba awor.+ Pa loke ta ami i e hendenan di mi kas, nos lo sirbi Yehova.”
16 E pueblo a bisa: “Hamas nos lo pensa di bandoná Yehova i bai sirbi otro dios.
17 Ta Yehova, nos Dios, a saka nos i nos tatanan for di Egipto,+ kaminda nos tabata katibu.+ El a hasi milager* grandi den nos bista.+ Durante henter nos biahe, el a protehá nos. Nos a pasa via teritorio di vários pueblo, pero Dios a protehá nos di tur e pueblonan ei.+
18 Yehova a kore ku tur e pueblonan ku tabata biba na e pais akí promé ku nos. El a kore ku e amoreonan tambe. P’esei, nos tambe lo sirbi Yehova, pasobra e ta nos Dios.”
19 Hosue a bisa e pueblo: “Boso tin sigur ku boso por sirbi Yehova? Pasobra e ta un Dios santu;+ e ta eksigí pa boso adorá e so.*+ Lo e no pordoná boso aktonan di rebeldia ni boso pikánan.*+
20 Si boso bandoná Yehova i bai sirbi dios falsu,* despues di tur e kosnan bon ku el a hasi pa boso, lo e bira kontra boso i kaba ku boso.”+
21 E pueblo a bisa Hosue: “Nò; nos lo sirbi Yehova!”+
22 Hosue a bisa e pueblo: “Di boso propio boluntat, boso a skohe pa sirbi Yehova.+ Boso mes ta testigu di esei.” Nan a kontest’é: “Sí, nos ta testigu!”
23 Hosue a bisa nan: “Si ta asina, deshasí di e diosnan falsu* ku boso tin, i sirbi Yehova, Dios di Israel, ku henter boso kurason.”
24 E pueblo a bisa Hosue: “Nos lo sirbi Yehova, nos Dios, i nos lo obedes’é!”
25 E dia ei, Hosue a sera un pakto ku e pueblo na Síkèm. Anto el a saka un dekreto ku nan mester a kumpli kuné.
26 Hosue a skirbi tur kos den buki di Lei+ di Dios. Despues, el a pone un piedra+ masha grandi mes bou di e palu grandi ku tabata keda banda di e lugá sagrado di Yehova.
27 Hosue a bisa henter e pueblo: “Wak! E piedra akí lo sirbi komo nos testigu, pasobra el a tende tur loke Yehova a bisa nos. Lo e sirbi komo boso testigu pa boso no nenga boso Dios.”+
28 Despues, Hosue a despedí di e pueblo, i kada hende a bai e teritorio ku el a haña komo herensia.+
29 Mas despues, Hosue, yu hòmber di Nun i sirbidó di Yehova, a muri na edat di 110 aña.+
30 Nan a der’é na Timnat-Sera,+ den e teritorio ku el a haña komo herensia. Timnat-Sera tabata keda nort di seru Gaas den e serunan na Efraím.
31 Israel a keda sirbi Yehova durante henter Hosue su bida i durante henter bida di e ansianonan ku a sigui biba despues di Hosue i ku a mira tur loke Yehova a hasi pa Israel.+
32 Nan a dera e restunan* di Yósef,+ ku e israelitanan a bini kuné for di Egipto, na Síkèm, riba e pida tereno ku Yákòb a kumpra pa 100 pida plata*+ serka e yu hòmbernan di Hámòr.+ Hámòr tabata tata di Síkèm. E pida tereno ei tabata herensia di e desendientenan di Yósef.+
33 Eleazar, yu hòmber di Áròn, tambe a muri.+ Nan a der’é riba Seritu di Fínehas den e serunan na Efraím.+ Seritu di Fínehas tabata un seritu ku Fínehas, yu hòmber di Eleazar, a haña komo propiedat.
Nota
^ Lit.: “di E Riu.”
^ Lit.: “di E Riu.”
^ Lit.: “a multipliká su simia.”
^ Lit.: “dia.”
^ Lit.: “el.”
^ Esta, na parti ost.
^ Òf posiblemente: “E doñonan di tereno.”
^ Òf: “laga boso enemigunan drenta pániko; laga boso enemigunan sinti nan angustiá.”
^ Lit.: “sirbié den bèrdat.”
^ Òf: “Sòru pa boso ta hende rekto; Keda íntegro.”
^ Lit.: “di E Riu.”
^ Lit.: “di E Riu.”
^ Lit.: “señal.”
^ Òf: “Lo e no pordoná boso si boso violá lei ni si boso kometé piká.”
^ Òf: “ku ta eksigí deboshon eksklusivo.”
^ Lit.: “dios estranhero.” Òf: “dios ku otro nashon ta sirbi.”
^ Lit.: “e diosnan estranhero.” Òf: “e diosnan ku otro nashon ta sirbi.”
^ Lit.: “e wesunan.”
^ Lit.: “kesita.” Un tipo di plaka antiguo di balor deskonosí.
