Hosue 17:1-18
17 Despues, nan a tira lòt+ pa sa kua teritorio e tribu di Mánases+ lo a risibí. Mánases tabata e yu hòmber mayó di Yósef.+ Anteriormente, Makir+—kende tabata e yu hòmber mayó di Mánases i tata di Gálad—a haña Gálad i Básan+ komo propiedat pasobra e tabata un guerero ku kurashi.
2 E otro desendientenan di Mánases i nan famianan* tambe a haña algun tereno pa medio di tiramentu di lòt. Tabata trata di e desendientenan* di e siguiente kabesantenan di famia: Abiezer,+ Hélek, Asriel, Síkèm, Héfer i Semida. Nan tur tabata desendiente di Mánases.+ Mánases tabata yu hòmber di Yósef.
3 Awor, Zelófehad,+ yu hòmber di Héfer, no tabatin yu hòmber, sino yu muhé so. Zelófehad tabata ñetu di Gálad, bisañetu di Makir i tatarañetu di Mánases. E yu muhénan di Zelófehad tabata yama Mahla, Noa, Hogla, Milka i Tirsa.
4 Nan a presentá dilanti di Saserdote Eleazar,+ dilanti di Hosue, yu hòmber di Nun, i dilanti di e kabesantenan, i nan a bisa: “Yehova a ordená Moises pa duna nos pida tereno komo herensia meskos ku a duna e ruman hòmbernan di nos tata.”+ E ora ei, di akuerdo ku òrdu di Yehova, nan tambe a haña algun tereno komo herensia meskos ku a duna e ruman hòmbernan di nan tata.+
5 Fuera di Gálad i Básan, ku tabata keda na e otro banda* di riu Yordan,+ e tribu di Mánases a haña dies tereno mas,
6 pasobra e hende muhénan di e tribu di Mánases a haña herensia meskos ku e hende hòmbernan. Gálad tabata propiedat di e otro mitar tribu di Mánases.
7 Frontera di e region di e tribu di Mánases a kore di frontera di Áser te Mikmetat,+ ku tabata keda enfrente di Síkèm.+ Di Mikmetat, nan frontera a sigui den direkshon zùit* i bai e teritorio kaminda e pueblo di En-Tapúa tabata biba.
8 Tapúa tabata teritorio di Mánases, pero e stat Tapúa,+ ku tabata keda na frontera di e region di Mánases, tabata propiedat di e desendientenan di Efraím.
9 Frontera di Mánases a baha bai den direkshon di vaye* Kaná, pasa zùit di e vaye, bai den direkshon nort di e vaye i kaba na Laman Grandi.*+ Efraím tabatin algun stat den teritorio di Mánases.+
10 E region di Efraím tabata keda zùit di e region di Mánases. Pa loke tabata e region di e tribu di Mánases, nan frontera wèst tabata kore pareu ku kosta di Laman Grandi.*+ Un parti di nan frontera nort tabata kore pareu ku frontera di Áser, i nan frontera ost tabata yega te frontera di Ísakar.
11 E tribu di Mánases a haña algun stat den teritorio di Ísakar i algun stat den teritorio di Áser. Tabata trata di e siguiente statnan, inkluso nan pueblonan den bisindario: Bèt-Sean; Íbleam;+ Dor,+ inkluso su habitantenan; En-Dor,+ inkluso su habitantenan; Tának,+ inkluso su habitantenan; i Megido, inkluso su habitantenan. Nan a haña tres teritorio yen di seru.
12 Sinembargo, e desendientenan di Mánases no a logra kore ku e habitantenan di e statnan ei. E kananeonan tabata tèrko; nan a keda insistí pa biba den e region.+
13 Ora e israelitanan a bira poderoso, nan a obligá e kananeonan hasi trabou fòrsá.+ Nan no a logra kore ku e kananeonan kompletamente.+
14 E desendientenan di Yósef a bisa Hosue: “Dikon bo a duna nos* un área asina chikitu komo herensia?+ Nos pueblo ta grandi, danki na Yehova ku a bendishoná nos te ku awor.”+
15 Hosue a kontestá nan: “Si boso pueblo ta grandi i e teritorionan ku boso tin na Efraím+ no ta sufisiente pa boso, rosa e mondinan den region di e perezitanan+ i e mondinan den region di e refaítanan+ pa boso haña mas lugá.”
16 E desendientenan di Yósef a bisa Hosue: “E área yen di seru ku nos a risibí no ta sufisiente pa nos. Ademas, e kananeonan ku ta biba den e vayenan, esta, e kananeonan na Bèt-Sean+ i e kananeonan ku ta biba den e pueblonan den bisindario i e kananeonan ku ta biba den vaye* Yézrel,+ tin garoshi di guera+ ku kuchú di heru na nan wilnan.”*
17 E ora ei, Hosue a bisa e desendientenan di Yósef, esta, e tribu di Efraím i e tribu di Mánases: “Boso pueblo ta un pueblo grandi, i boso ta masha fuerte. No ta e terenonan kaminda boso ta biba so ta di boso; boso lo tin mas tereno.+
18 E mondinan será den boso region yen di seru tambe lo ta di boso.+ Aunke e áreanan ei ta mondi, boso por rosa nan i ekstendé boso teritorio. Boso lo kore ku e kananeonan aunke nan ta fuerte i aunke nan tin garoshi di guera ku kuchú di heru na e wilnan.”*+
