Hosue 18:1-28
18 Henter Israel* a reuní na Silo.+ Einan, e israelitanan a harma e tènt di reunion,*+ pasobra Kánan a ser konkistá i e israelitanan por a poderá di nan teritorionan.+
2 Ainda tabatin shete tribu di Israel ku no a haña nan herensia.
3 P’esei, Hosue a bisa e israelitanan: “Riba kiko boso ta warda? Poderá di e pais ku Yehova, Dios di boso antepasadonan, a duna boso!+
4 Skohe tres hòmber for di kada tribu. E hòmbernan ei mester kana pasa den e pais i traha mapa di e teritorionan ku nan tribu lo mester haña komo herensia. Despues, nan mester bini bèk serka mi.
5 Nan mester parti e sobrá áreanan di e pais den shete sekshon.+ E region na parti zùit+ lo keda di Huda, i e region nort di Huda lo keda di e desendientenan di Yósef.+
6 Boso mester eksplorá e sobrá áreanan di e pais, traha mapa di e áreanan ei i parti e teritorio den shete sekshon. Trese deskripshon di e sekshonnan ei pa mi, i lo mi tira lòt+ den presensia di Yehova, nos Dios, pa boso.
7 E levitanan sí lo no haña teritorio meskos ku boso,+ pasobra nan herensia ta enserá sirbi na kas di Yehova.+ Gad, Ruben i mitar tribu di Mánases+ a haña nan herensia kaba na parti ost di riu Yordan. Moises, sirbidó di Yehova, a duna nan nan teritorionan.”
8 E ora ei, e hòmbernan ku mester a traha mapa di e sobrá áreanan di e pais a prepará pa bai. Hosue a duna nan e siguiente òrdu: “Bai, i kana pasa den e pais, traha mapa di e teritorionan i bini bèk serka mi. Ami lo tira lòt den presensia di Yehova, aki na Silo,+ pa boso.”
9 Anto e hòmbernan a bai. Nan a bai wak e sobrá áreanan di e pais; nan a traha mapa di e teritorionan, i nan a deskribí e statnan. Nan a parti e sobrá áreanan di e pais den shete sekshon, i nan a registrá tur kos den un buki. Despues, nan a bai bèk serka Hosue na e kampamentu na Silo.
10 Hosue a tira lòt pa konsultá ku Yehova pa nan na Silo.+ Einan, Hosue a repartí e teritorionan entre e israelitanan. Kada tribu a haña un region.+
11 E promé lòt a kai riba e tribu di Bènyamin. E famianan di e tribu di Bènyamin a haña e área ku tabata keda entre e region di Huda+ i e region di e desendientenan di Yósef.+
12 Nan frontera nort tabata kore for di riu Yordan, subi pasa nort di Yériko,+ sigui subi pasa e serunan den direkshon wèst i yega te e desierto* pegá ku Bèt-Aven.+
13 Djei, nan frontera nort a sigui bai Luz, esta, Bètel,+ pasa zùit di Luz i baha bai Átaròt-Adar,+ ku tabata un pueblito riba e seru ku tabata keda zùit di Bèt-Hóròn Abou.+
14 For di e seru ei, esta, e seru ku tabata keda zùit di Bèt-Hóròn, nan frontera wèst a bai den direkshon zùit i bai kaba na Kíriat-Baal, esta, Kíriat-Yearim,+ ku tabata un stat di Huda. Esei tabata Bènyamin su frontera wèst.
15 Di Kíriat-Yearim, nan frontera zùit a bai den direkshon wèst; e frontera a sigui bai den direkshon di e fuente di awa di Neftoa.+
16 Djei, nan frontera zùit a baha bai te pia di e seru ku tabata keda enfrente di vaye Bèn-Hínòm,+ ku tabata keda nort di vaye Refaím,+ baha bai te vaye Hínòm, zùit di e stat di e yebuseonan,+ i sigui baha bai En-Rogel.+
17 Di En-Rogel, nan frontera zùit a sigui den direkshon nort, pasa En-Sémes i bai Guelilòt, ku tabata keda enfrente di subida Adumim.+ Di Guelilòt, nan frontera a baha bai te piedra+ di Bohan.+ Bohan tabata nòmber di un desendiente di Ruben.
18 Di piedra di Bohan, nan frontera zùit a sigui kore pasa na banda nort di barika di e seru ku tabata keda enfrente di Áraba i baha bai te Áraba.
19 Nan frontera zùit a pasa nort di Bèt-Hogla+ i kaba na bahia di Laman Salu*+ (na parti nort), na boka di riu Yordan. Esei tabata nan frontera zùit.
20 Nan frontera ost tabata kore pareu ku oria di riu Yordan. Eseinan tabata e fronteranan di e region ku e famianan di e tribu di Bènyamin a haña komo herensia.
21 E famianan di e tribu di Bènyamin a haña e siguiente statnan: Yériko, Bèt-Hogla, Émèk-Késis,
22 Bèt-Áraba,+ Zemaraim, Bètel,+
23 Avim, Para, Ofra,
24 Kefar-Amoni, Òfni i Gueba;+ 12 stat i nan pueblitonan.
25 Fuera di e statnan ei, nan a haña Gábaòn,+ Rama, Béròt,
26 Mispe, Kefira, Moza,
27 Rékèm, Irpel, Tarala,
28 Zela,+ Ha-Elèf, Yébus,* esta, Herúsalèm,+ Guibea+ i Kíriat; 14 stat i nan pueblitonan.
Esei tabata herensia di e famianan di e tribu di Bènyamin.
