Hosue 22:1-34
22 Hosue a manda yama e tribu di Ruben, e tribu di Gad i mitar tribu di Mánases.
2 El a bisa nan: “Boso a hasi tur loke Moises, sirbidó di Yehova, a ordená boso,+ i boso a hasi tur loke mi a ordená boso.+
3 Durante tur e tempu ei ku a pasa, te e dia di awe,+ boso no a bandoná boso rumannan. Ademas, boso a kumpli fielmente ku e mandamentunan di Yehova, boso Dios.+
4 Yehova, boso Dios, a duna boso rumannan sosiegu, manera el a primintí nan.+ Pues, boso por bai boso kas* bèk awor. Boso por bai boso teritorionan na e otro banda* di riu Yordan, e teritorionan ku Moises, sirbidó di Yehova, a duna boso.+
5 Un kos sí: Kumpli ku tur e mandamentunan ku tin den Lei i ku tur e instrukshonnan ku Moises, sirbidó di Yehova, a duna boso.+ Stima Yehova, boso Dios,+ i semper hasi su boluntat.*+ Kumpli ku su mandamentunan,+ i keda leal* na dje.+ Sirbié+ ku henter boso kurason i ku henter boso alma.”*+
6 Hosue a bendishoná nan, i nan a bai kas.
7 Moises a duna mitar di e tribu di Mánases Básan komo herensia,+ i Hosue a duna e otro mitar di e tribu di Mánases un region na parti wèst di riu Yordan,+ kaminda nan por a biba huntu ku nan rumannan. Hosue a bendishoná nan,* i nan a bai kas.
8 El a bisa nan: “Regresá boso kas ku hopi rikesa, ku masha hopi bestia, ku plata, ku oro, ku koper, ku heru i ku hopi paña.+ Bai ku tur loke boso a kohe komo botin+ for di boso enemigunan, i kompartí e botin ei ku boso rumannan.”
9 E ora ei, e desendientenan di Ruben, e desendientenan di Gad i mitar tribu di Mánases a bai laga e otro israelitanan. Nan a sali for di Silo, na Kánan, i nan a bai bèk Gálad,+ e teritorio ku nan a haña komo nan lugá di biba, manera Yehova a ordená pa medio di Moises.+
10 Ora ku e desendientenan di Ruben, e desendientenan di Gad i e mitar tribu di Mánases a yega e region den bisindario di riu Yordan, na Kánan, nan a traha un altar grandi i impreshonante pegá ku riu Yordan.
11 Mas despues, e otro israelitanan a tende hende bisa:+ “E tribu di Ruben, e tribu di Gad i mitar tribu di Mánases a traha un altar na frontera di Kánan, wèst di Yordan, den region di e israelitanan.”
12 Ora e israelitanan a haña sa esei, henter e pueblo* di Israel a reuní na Silo+ pa bai bringa kontra e tribunan ei.
13 E israelitanan a manda Fínehas,+ yu hòmber di Saserdote Eleazar, bai Gálad serka e desendientenan di Ruben, e desendientenan di Gad i mitar tribu di Mánases.
14 Dies kabesante a bai Gálad huntu ku Fínehas. Kada kabesante a representá un tribu di Israel. Nan tur tabata kabesante di nan famianan. E famianan ei tabata algun di e míles di famianan israelita.+
15 Ora nan a yega Gálad, nan a bisa e tribu di Ruben, e tribu di Gad i mitar tribu di Mánases:
16 “Esaki ta loke henter e pueblo* di Yehova a bisa: ‘Dikon boso a kometé un akto di infieldat+ kontra Dios di Israel? Dikon boso a bira lomba pa Yehova i traha un altar pa boso mes? Dikon boso a rebeldiá kontra Yehova?+
17 Nos no a siña nos lès ora nos a peka na Péòr? Boso a lubidá e plaga ku e pueblo di Yehova a hañ’é kuné?+ Te awe, nos ta sufri konsekuensia di e piká ei.
18 Ainda boso ke bira lomba pa Yehova? Si boso rebeldiá kontra Yehova, lo e rabia ku henter e pueblo di Israel.+
19 Òf ta impuru boso teritorio ta? Si ta asina, krusa bini teritorio di Yehova,+ kaminda e tabernakel di Yehova ta,+ i keda biba serka nos. Boso no mester rebeldiá kontra Yehova, trahando un otro altar fuera di e altar di Yehova, nos Dios.+ Esei ta laga parse ku nos tambe ta rebelde.
20 Kòrda loke a pasa pa motibu di Ákan,+ desendiente* di Zera. Ora el a kohe algun kos kondená na destrukshon,* el a desobedesé Dios. Dios a rabia ku henter e pueblo di Israel.+ Anto no ta Ákan so a muri pa motibu di su piká; mas hende tambe a muri.’”+
21 E hòmbernan di e tribu di Ruben, e hòmbernan di e tribu di Gad i e hòmbernan di mitar tribu di Mánases a bisa e kabesantenan di e famianan di Israel:*+
22 “Yehova, ku ta Dios riba tur dios,*+ sa pakiko! Yehova, ku ta Dios riba tur dios, sa pakiko! Israel tambe lo haña sa pakiko. Si nos a rebeldiá kontra Yehova, i si nos tabata infiel na dje, laga nos pèrdè nos bida awe.
23 Si nos a traha un altar pa ofresé ofrenda kimá, ofrenda di grano i sakrifisio di pas,* Yehova lo kastigá nos pa esei, pasobra nos lo tabata desobediente na Yehova.+
24 Mas bien, ta pa un otro motibu nos a traha e altar. Nos tabata preokupá ku, den futuro, boso yunan lo por bisa nos yunan: ‘Kiko boso tin di haber ku* Yehova, Dios di Israel?
25 Yehova a pone riu Yordan komo un frontera entre nos i boso. Boso, ku ta di e tribu di Ruben i di e tribu di Gad, no tin nada di haber ku* Yehova.’ I boso yunan lo por stroba nos yunan di adorá* Yehova.
26 P’esei, nos a bisa: ‘Laga nos traha un altar, no pa ofresé ofrenda kimá ni pa otro sakrifisio,
27 sino pa e sirbi komo testigu entre nos i boso+—entre nos desendientenan* i boso desendientenan—ku nos tambe ta sirbi Yehova; nos tambe ta ofresé ofrenda kimá, sakrifisio di pas+ i otro sakrifisio. E ora ei, boso yunan lo no por bisa nos yunan den futuro: “Boso no tin nada di haber ku* Yehova.”’
28 P’esei, nos a bisa: ‘Si den futuro, nan bisa nos i nos desendientenan* esei, e ora ei nos lo kontestá nan: “Ata un réplika ei di e altar di Yehova ku nos antepasadonan a traha. E altar ei no ta pa ofresé ofrenda kimá ni pa otro sakrifisio; e ta sirbi komo un testigu entre nos i boso.”’
29 Nos no a ni pensa mes pa rebeldiá kontra Yehova ni pa bira lomba pa Yehova.+ Hamas nos lo traha un otro altar pa ofresé sakrifisio! Nos lo ofresé ofrenda kimá, ofrenda di grano i otro sakrifisio solamente riba e altar di Yehova, nos Dios, ku ta dilanti di su tabernakel.”+
30 Ora Saserdote Fínehas i e kabesantenan ku tabata huntu kuné, esta, e kabesantenan di e famianan di Israel,* a tende loke e desendientenan di Ruben, e desendientenan di Gad i e desendientenan di Mánases a bisa, nan a keda trankil.+
31 Saserdote Fínehas, yu hòmber di Eleazar, a bisa e desendientenan di Ruben, e desendientenan di Gad i e desendientenan di Mánases: “Awor nos sa ku Yehova ta ku nos, pasobra boso no a kometé un akto di infieldat kontra Yehova. Yehova lo no kastigá nos.”
32 Despues ku nan a kaba di papia ku e tribu di Ruben i ku e tribu di Gad na Gálad, Saserdote Fínehas, yu hòmber di Eleazar, i e kabesantenan a bai bèk Kánan, i nan a konta e otro israelitanan tur kos.
33 E israelitanan a keda satisfecho ku e informe. E israelitanan a alabá Dios, i nan no a papia mas di ataká e tribu di Ruben i e tribu di Gad ni di destruí nan teritorio.
34 Anto e tribu di Ruben i e tribu di Gad a duna e altar un nòmber,* pasobra nan a bisa: “E altar ta sirbi komo un testigu pa nos ku Yehova ta e Dios berdadero.”
Nota
^ Lit.: “tènt.”
^ Esta, na parti ost.
^ Lit.: “i kana den su kamindanan.”
^ Òf: “keda pegá.”
^ Posiblemente, “nan” tabata referí na e hendenan di e tribu di Ruben, na e hendenan di e tribu di Gad i na e hendenan di mitar tribu di Mánases.
^ Lit.: “asamblea.”
^ Lit.: “asamblea.”
^ Lit.: “yu hòmber.”
^ Òf: “e kabesantenan di grupo di mil israelita.”
^ Òf: “Yehova, Dios, e Ser Divino.”
^ Òf: “Boso tambe ta sirbidó di.”
^ Òf: “no ta sirbidó di.”
^ Lit.: “nos generashonnan.”
^ Òf: “Boso no ta sirbidó di.”
^ Lit.: “i nos generashonnan.”
^ Òf: “e kabesantenan di grupo di mil israelita.”
^ Aparentemente, nan a yama e altar “Testigu.”
