Kasin Nanonotan Yo?

Naapresia yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

• Antoy makasengeg ya inawat a tampol so Krismas diad Korea?

Walay kadaanan a sisiaen ed Korea tan ed arum niran daldalin nipaakar ed sakey a dios ed kusina ya impasen dan ondalan ed pasngaway asewek tan tarok toray regalo ed Disyembre. Ontan met, kayari Guerra Mundial II, nanbubunog iray sundalo na E.U. na saray regalo tan tulong ed saray simbaan diman.​—12/15, pahina 4, 5.

• Bilang kasumpalan na Isaias 21:8, anton “taga-bantay” so impasen na Dios ed panaon tayo?

Saray alanaay espiritun Kristiano, a manlilingkor bilang managbantay a klase, so amasakbay ed totoo nipaakar ed kabaliksan na saray nagagawa ed mundo a manusumpal ed propesiya na Biblia. Natutulongan da met iray estudyante na Biblia a mangamta tan paliisay agmakasulatan iran doktrina tan agagamil.​—1/1, pahina 8, 9.

• Sioparay “Polish Brethren”?

Sikaray melag a relihyoson grupo nen koma-16 tan koma-17 iran siglo diad Poland ya amaseseg ed itumbok ed Biblia tan diad ontan et impulisay iray peles a bangat na simbaan, a singa say Trinidad, panbinyag ed kapangiyanak, tan impierno. Asabin sikaray pirmin pinasegsegang tan pinaskar a pinataynan ed arum a daldalin.​—1/1, pahina 21-3.

• Akin a saray propesiya na Biblia et napanmatalkan imbes di saray prediksion na saray futurologist odino astrologo?

Saray totoon mankuan a propeta so napapaneknekan ya agnapanmatalkan lapud ibabaliwala ra si Jehova tan say Biblia. Saray propesiya lambengat ed Biblia so makatulong ed sika ta pian naamtaan mo no panon a saray ebento et mitukoyan ed gagala na Dios, a magnayon a pakagunggunaan mo tan say pamilyam.​—1/15, pahina 3.

• Antoy pigaran alutor na ebidensia a mamapaneknek a sikatayoy manbibilay la ed kaunoran iran agew?

Naiimano tayoray epekto na inkibasileng nen Satanas manlapud tawen. (Apocalipsis 12:9) Manbibilay tayo la ed panaon na kaunoran ya “ari” ya asalambit ed Apocalipsis 17:9-11. Say bilang na puron alanaan a Kristianos so ondaraiset, balet ompatnag a pigara ed sikara so siansia nin wadia ed dalin sano onggapo so baleg a kairapan.​—1/15, pahina 12, 13.

• Kapigan nisulat so libron Habacuc, tan akin a paninteresan tayo itan?

Sayan libro ed Biblia so nisulat nen ngalngali 628 K.K.P. Lugan toy panangukom nen Jehova sumpad kadaanan a Juda tan Babilonia. Tutukoyen to met so madibinon panangukom ya asingger lan onsabi ed kaplesan a marelmeng a sistema.​—2/1, pahina 9.

• Iner so pakaromogan tayo ed Biblia nipaakar ed makabat a simbawa na sakey ya ina parad saray makayarin asawan bibii?

Say unor a kapitulo na libron Uliran, kapitulo 31, so ekselentin lapuan ed ontan a konseho.​—2/1, pahina 30, 31.

• Akin a misalsalamat tayo ta imparungtal nen Jehova so “kanonotan nen Kristo” ed sikatayo? (1 Corinto 2:16)

Diad panamegley na rekord na Ebanghelyo, nipaamta ed sikatayo nen Jehova iray kanonotan, liknaan, aktibidades, tan prayuridad nen Jesus. Makatulong iya ed sikatayon lalon magmaliw a singa si Jesus, nagkalalo la ed kaimportantian na kimey ed manangisalbay bilay a panagpulong tayo.​—2/15, pahina 25.

• Kasin eebatan na Dios iray pikakasi natan?

On. Anggaman ipapanengneng na Biblia ya ag-eebatan na Dios so amin a pikakasi, papaneknekan na modernon-agew iran eksperiensia a mabetbet ton eebatan iray pikakasi na totoon paliligliwa tan patutulongan ed sikato ed saray pamaakaran a singa say panresolbi ed saray problema nipaakar ed panamaley.​—3/1, pahina 3-7.

• Antoy nagawaan tayo pian nagamoran so biskeg na Dios?

Nakerew tayo itan diad pikakasi, nagamoran tayo so biskeg ed espiritual manlapud Biblia, tan napabiskeg diad Kristianon panlilimog.​—3/1, pahina 15, 16.

• Panon a natulongan na atateng iray anak da a nagkalalon nagunggunaan manlapud saray Kristianon miting?

Tutulongan daray anak da a mansiansian aliing, anganko diad pampainawa ra nin unona. Napaseseg iray ugugaw a mangala na “saray nota,” a singa say panmarka ed papel kada nausar so kabisado iran salita odino ngaran.​—3/15, pahina 17, 18.

• Anto so pigaran bengatlan naaralan tayo manlapud ehemplo nen Job?

Inyuna nen Job so relasyon to ed Dios, agto inlablabi so kapara ton totoo, nanmatoor ed asawa to, inasikaso to so espiritualidad na pamilya to, tan ed impanmatoor to ed silong na subok.​—3/15, pahina 25-7.

• Kasin lugan na Biblia so nisekreton kodigo a mangiter na aralem a pakatalos ed nitanda iran mensahe?

Andi. Saray nibabagan walaray nikuan a niamot a kodigo so nibaga met no nipaakar ed sekular a liblibro. Saray nikuan a kodigo diad Biblia so nipatalos ya anggapoy kabaliksan panamegley na nambabangil ya espeling diad Hebreo iran manuskrito.​—w-E 4/1, pahina 30, 31.